Э. Лаутеншлегер
Социальнэ IофышIэм и Мафэу къэблагъэрэм фэгъэхьыгъэ мэфэкI Iофтхьабзэ АР-м и Къэралыгъо филармоние тыгъуасэ щыкIуагъ.
Ащ хэлэжьагъэх АР-м и Правительствэ и Тхьаматэ игуадзэу, финансхэмкIэ министрэу Виктор Орловыр, Къэралыгъо Советым — Хасэм и Тхьаматэу Владимир Нарожнэр, АР-м IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч, депутатхэр, муниципальнэ образованиехэм япащэхэр, социальнэ лъэныкъом иIофышIэхэр ыкIи иветеранхэр.АР-м и ЛIышъхьэу КъумпIыл Мурат ыцIэкIэ къэзэрэугъоигъэхэм къафэгушIуагъ АР-м и Правительствэ и Тхьаматэ игуадзэу Виктор Орловыр. Ахэм яIофшIэн мэхьэнэ ин зэриIэр ащ къыIуагъ ыкIи ащ зищыIэныгъэ фэзыгъэхьыгъэхэу, илъэсыбэрэ щылэжьагъэхэм «Адыгэ Республикэм цIыфхэр социальнэу къэухъумэгъэнхэмкIэ изаслуженнэ IофышI» зыфиIорэ щытхъуцIэр къазэрафагъэшъошагъэр къэзыушыхьатырэ тхылъхэр аритыжьыгъ. Ахэр ЦIыпIынэ Жанет — АР-м IофшIэнымкIэ ыкIи социальнэ хэхъоныгъэмкIэ и Министерствэ иотдел ипащ, Наталья Иванченкэр (Тэхъутэмыкъое район), Наталья Ткачевар (Красногвардейскэ район), Светлана Волчанскаяр (Красногвардейскэ район), Наталья Ивановар (Мыекъуап).Адыгэ Республикэм и ЛIышъхьэ и Рэзэныгъэ тхылъхэр аратыжьыгъэх Джэджэ районым и КЦСОН-м ипащэу Зэзый Рэмэзан, Уджыхъу МулиIэт — Теуцожь районым и КЦСОН иIофышI, Анатолий Мищенкэр — АР-м исоциальнэ-зэтегъэуцожьын Гупчэу «Доверие» зыфиIорэм иIофышI, ЛIыхъукIэ Нэфсэт — Адыгэкъалэ и КЦСОН иIофышI, Наталья Шумаковар — Мыекъопэ КЦСОН-м иIофышI.АР-м и Къэралыгъо Совет — Хасэм ищытхъу ыкIи ирэзэныгъэ тхылъхэр къэзылэжьыгъэхэми джащ фэдэу аратыжьыгъэх.МэфэкIым къыдыхэлъытагъэу «Социальнэ IофышIэ анахь дэгъу» зыфиIорэ республикэ зэнэкъокъум текIоныгъэ къыщыдэзыхыгъэхэр агъэшIуагъэх. Мы илъэсымкIэ пэрытныгъэр къыдэзыхыгъэр Джэджэ районым исоциальнэ IофышIэу Ольга Сигачевар ары. Мыекъопэ районыр къэзыгъэлъэгъогъэ Юлия Турченюк ятIонэр, Шэуджэн районым щыщ Светлана Коляда ящэнэрэ хъугъэ.АР-м IофшIэнымкIэ ыкIи социальнэ хэхъоныгъэмкIэ и Министерствэ къызэритыгъэмкIэ, пстэумкIи республикэ зэнэкъокъум нэбгыри 104-рэ хэлэжьагъ.Анцокъо Ирин.