Урысыем щыпсэурэ лъэпкъхэм языкIыныгъэ и Илъэс мыгъэ Адыгэ РеспубликэмкIэ итамыгъэ шъхьаIэ хъущт кушъхьэфачъэр.
Урысыем и Мафэрэ кушъхьэфачъэм тесым и Дунэе мафэрэ яхэгъэунэфыкIын къыдыхэлъытагъэу тишъолъыр икъэлэ шъхьаIэ мэкъуогъум и 6-м спорт-культурнэ мэфэкIышхо щызэхащэщт. Зэкъошныгъэм игупчэ щызэрэугъоищтых Адыгеим щыпсэухэрэр ыкIи ихьакIэхэр. Ахэр кушъхьэфачъэхэм атесхэу къэчъэщтых, зэрэзэнэкъокъущтхэм дакIоу, япсауныгъи агъэпытэщт, заушэтыщт.Спортым ыкIи патриотизмэм ямэфэкI мэкъуогъум и 6-м пчэдыжьым сыхьатыр 8-м аублэщт. Iофтхьабзэм хэлажьэхэрэр атхыщтых, ахэм номер гъэнэфагъэхэр аратыщтых, нэужым километрэ 18 зэрылъ гъогууанэр къачъыщт. Мыщ хэлэжьэн зылъэкIыщтхэр 2012-рэ илъэсым къэхъугъэхэр ыкIи ахэм анахьыжъхэр ары.МэфэкIыр унагъоми тегъэпсыхьагъ, арышъ, пчэдыжьым сыхьатыр 10-м къыщегъэжьагъэу 11:30-м нэс Зэкъошныгъэм игупчэ мы спорт лъэпкъым пыщэгъэ кIэлэцIыкIухэм зыщаушэтын алъэкIыщт. Ахэр къызэдэчъэщтых, гъогууанэр метри 100-м къыщыублагъэу километрэм нэсыщт.Лъэныкъо зэфэшъхьафхэмкIэ анахь дэгъоу зыкъэзыгъэлъэгъуагъэхэр зэхэщакIохэм къыхагъэщыщтых. Ащ дакIоу республикэм итворческэ купхэм концерт къатыщт, шIухьафтын лъапIэхэр зэрылъ велолотерее зэхащэщт. ЦIыфэу къэзэрэугъоигъэхэр зыщышхэнхэ алъэкIыщт чIыпIэхэри зэIухыгъэщтых.Мы мафэр псауныгъэм, спортым ыкIи гушIуагъом ямэфэкI шъыпкъэ хъунэу зэхэщакIохэр щэгугъых. Нэбгырэ пэпчъ зэригъэгъотын ылъэкIыщт кушъхьэфачъэр мызыгъэгум зыкIыныгъэм ыкIи уихэгъэгу шIу плъэгъуным ятамыгъэ хъущт.