Урысыем и Почтэрэ Адыгеимрэ зэдэлажьэх

Адыгэ Республикэм и Министрэхэм я Кабинет и тхьаматэ игуадзэу ЛIыхэсэ Махьмудрэ Урысыем и Почтэ хэхьэрэ шъолъыр купхэу Москварэ Черноземьемрэ япащэу Ксения Ефимовамрэ зэIукIэгъу зэдыряIагъ. Почтэм иIофшIэн, тапэкIэ ащ тишъолъыр хэхъоныгъэу щишIыщтхэм атегущыIагъэх.

Зэгъусэхэу зэдагъэцэкIэнэу агъэнэфэгъэ пшъэрылъ шъхьа­Iэхэр: шъолъырым ибизнеспае компанием илогистическэ амалхэр гъэфедэгъэнхэр, финанс ыкIи къэралыгъо фэIо-фашIэхэр цIыфхэм зэрифэ­шъуашэу афэгъэцэкIэгъэнхэр, анахьэу пэIудзыгъэ псэупIэ чыжьэмэ ащыпсэухэрэм, нэ­мыкIхэри.«Почтэ инфраструктурэм Адыгеим хэхъоныгъэ щегъэ­шIыгъэным мэхьанэшхо иI. Ащ икъутамэмэ янахьыбэр пэIу­дзыгъэ псэупIэхэм ащыIэх, ахэ­м ащыпсэухэрэмкIэ почтэр ары хэкIыпIэ закъор, финанс, банк, цифрэ сервисхэр агъэфедэнхэ амал зыщагъотырэр. Мы илъэсым Урысыем и Почтэ ишъолъыр гъэIорышIапIэ зычIэт унэу Мыекъуапэ дэтыр игъэ­кIотыгъэу тэгъэцэкIэжьы, ащ тефэщт мылъкур компанием къытIупщыгъ, цIыфхэм фэIо-фа­шIэхэр нахьышIоу зэрафэд­гъэцэкIэщтым ыуж тит. АщкIэ Адыгэ Республикэм и Правительствэ тыдэлажьэмэ ишIуагъэ къэкIощт, зэхэт проектыкIэхэр дгъэцэкIэшъущтых», — къыIуагъ Ксения Ефимовам.Адыгэ Республикэм и Ми­нистрэхэм я Кабинет и Тхьаматэ игуадзэу ЛIыхэсэ Махьмуд зэдэлэжьэныгъэм зэрэфэхьа­зырхэр къыIуагъ ыкIи почтэ къулы­къум социальнэ мэхьа­нэшхо зэриIэр, цIыфхэм зэрящыкIагъэр къыхигъэщыгъ.«Урысые Федерацием и Пре­зидентэу Владимир Путиным къоджэ псэупIэхэм ащыIэпочтэхэр гъэкIэжьыгъэнхэмкIэ игу­къэкI партиеу «Единэ Россием» дыригъэштагъ. А IофшIэным шIуагъэу къытыгъэр непэ тинэрылъэгъу. АР-м и ЛIышъхьэу КъумпIыл Мурат ежь ышъхьэкIэ ащ ынаIэ тырегъэты, почтэ къулыкъур зэтегъэпсыхьэгъэным, цIыфхэм ящыIэкIэ-псэукIэ нахьышIу шIыгъэным ари зэу зэрепхыгъэр ренэу кIегъэтхъы. Джары тэри тызкIыфаер ком­панием зэдэлэжьэныгъэу дытиIэм зедгъэушъомбгъунэу, псэупIэ чыжьэмэ адэт почтэ къута­мэхэр дгъэцэкIэжьынхэу», — къыIуагъ ЛIыхэсэ Махьмудэ.Адыгэ Республикэм почтэ къутэми 135-рэ ит, ахэм яна­хьыбэр къоджэ псэупIэхэм ащыI. 2022-рэ илъэсым къыщыублагъэу гъэкIэжьыгъэным ипро­граммэ къыдыхэлъытагъэу къуа­джэхэм ахэм ащыщ 37-рэ агъэцэкIэжьыгъ.