Мыекъопэ къэралыгъо технологическэ университетым шIэныгъэ-техническэ творчествэмкIэ Урысые зэнэкъокъоу «Шустрик» зыфиIорэр мы мафэхэм щыкIуагъ.
Проектнэ IофшIэным кIэлэеджакIохэр пыщэгъэнхэм ар фытегъэпсыхьагъ. НыбжьыкIэхэм зэхэгъэуцон-къэугупшысын амалэу яIэхэм ахагъэхъоныр, конструированием, моделированием афэщэгъэнхэр, джащ фэдэу макетхэр ашIынхэм фэгъэсэгъэнхэр ары зэхэщакIохэм пшъэрылъ шъхьаIэу зыфагъэуцужьыгъэр.Шiэныгъэ-техническэ лъэныкъомкIэ предприятие цIыкIухэм хэхъоныгъэ ягъэшIыгъэнымкIэ Фондыр ары зэнэкъокъум икIэщакIор. Мысатыу организацие пчъагъэ ащ иIэпыIэгъу.Къэзэрэугъоигъэхэм шIуфэс псалъэкIэ закъыфигъэзагъ инновациехэм адэлэжьэгъэнымкIэ Фондым ишъолъыр лIыкIоу, МКъТУ-м научнэ IофшIэнымкIэ ыкIи инновационнэ хэхъоныгъэмкIэ ипроректорэу Татьяна Овсянниковам. Ащ къызэриIуагъэмкIэ, 2023-рэ илъэсым къыщегъэжьагъэу Мыекъопэ къэралыгъо технологическэ университетыр Адыгэ Республикэм илIыкIоу мы зэнэкъокъум хэлажьэ. КIэлэцIыкIу ыкIи ныбжьыкIэ сэнаущыгъэр игъом къыхэгъэщыгъэнымкIэ ыкIи IэпыIэгъу фэхъугъэнымкIэ мыщ мэхьанэшхо зэриIэр ащ къыхигъэщыгъ.
Iофтхьабзэм къыдыхэлъытагъэу экспертмэ проекти 6 зэхафыгъ. Зэнэкъокъум хэлэжьагъэхэм къагъэлъэгъуагъэмэ ащыщ «Формы света» зыфиIорэр. «Игра-ходилка» зыфиIорэр зы куп ипроект, «Космический мусор» ыкIи «Робот-помощник» зыфиIорэмкIи зыкъагъэлъэгъуагъ. Зэнэкъокъум хэмытэу къухьэшIыным фэгъэхьыгъэу зы проект шъхьэихыгъэ къашIыгъ. КIэлэеджакIохэм яIофшIагъэхэр къагъэлъэгъуагъэх, упчIэмэ яджэуапхэр къаратыжьыгъэх. Ахэм япроектхэм уасэ къафашIыгъ.Шъолъыр едзыгъом изэфэхьысыжьхэмкIэ, текIоныгъэ къыдэзыхыхэрэр финалым ихьащтых ыкIи япроектхэм экспертнэ уасэ къафашIыщт.ДЕЛЭКЪО Анет.