Лъэпшъыкъо Ф.
«Семнадцать ценностей» зыфиIорэ культурнэ-гъэсэныгъэ проектым къыдыхэлъытэгъэ фестивалэу «Лъэпкъ Iэпэщысэхэр: тыгъуас, непэ, неущ» зыфиIорэр къалэу Мыекъуапэ щыкIуагъ. Урысыем и Къыблэ иныбжьыкIэхэу цифрэ искусствэм хэщагъэхэр ащ хэлэжьагъэх.Урысыем щыпсэурэ цIыф лъэпкъыхэм языкIыныгъэ и Илъэс къыдыхэлъытэгъэ проектыр зытегъэпсыхьагъэр искусствэм илъэныкъуакIэ тетэу лъэпкъ Iэпэщысэхэм яшIын аIэ къырагъэхьанымкIэ ныбжьыкIэхэм ясэнаущыгъэ къагъэлъэгъоныр ары.Iофтхьабзэм ипэублэ АР-м гъэсэныгъэмрэ шIэныгъэмрэкIэ иминистрэу Евгений Лебедевым къэзэрэугъоигъэхэм шIуфэс къарихыгъ. Хэгъэгум ыкIи Адыгем гъэсэныгъэм хэхъоныгъэ щашIынымкIэ мы фестивалыр зигъо Iофэу зэрэщытыр ащ къыхигъэщыгъ ыкIи мыщ щагъотырэ шIэныгъэхэр къызэрафэфедэжьыщтхэр къариIуагъ.— Гъэсэныгъэм технологие зэфэшъхьафхэр къыхэхьагъэх, цифрэ шIэныгъэм илъэныкъуакIэхэри ахэм ащыщых. Лъэпкъ Iэпэщысэхэр лъэпкъ пэпчъ ынапэх, ищыIэныгъэ щыщых. Ахэм якъэухъумэн ыкIи яхэгъэхъон фестивалыр фэлэжьэщт. ЩыIэныгъэм зэхъокIыныгъэу хэхъухьэхэрэм, уахътэр зэрэлъыкIуатэрэм ялъытыгъэу Iэпэщысэхэр цифрэ искусствэм хэшъущэщтых. АмалыкIэхэм дунаир зэблахъущт, — къыIуагъ министрэм.Нэужым гущыIэ ратыгъ къалэу Москва къикIыгъэ хьакIэу, инновационнэ хэхъоныгъэмкIэ Агентствэм ипащэу Станислав Сахаровым.— «Семнадцать ценностей» зыфиIорэ культурнэ-гъэсэныгъэ проектыр Урысыем ичIыпIэ зэфэшъхьафхэм ащызэхэтщагъ, джы ар непэ Адыгеим къэсыгъ. Iофтхьабзэм къыдыхэлъытэгъэ фестивалым экспертхэр къедгъэблэгъагъэх. Ахэм шIэныгъакIэхэр шъуагъэгъотыщт, проект гъэшIэгъонхэр жъугъэпсынхэ амал шъуиIэщт, — къыIуагъ Станислав Сахаровым.Илъэс 14–м къыщыублагъэу 35-м нэс зыныбжьхэм цифрэ искусствэр ашIогъэшIэгъонэу, джырэ уахътэм диштэрэ шIыкIэхэр агъэфедэзэ Iэпэщысэхэр ашIыгъэх. Проектым къыдыхэлъытэгъагъэх егъэджэн сыхьатхэр, лекциехэр. Ахэр студентхэм ящыкIэгъэ цифрэ лъэныкъохэм афэгъэхьыгъэх. Мэфищым ныбжьыкIэхэм яшIэныгъэхэмкIэ заушэтыгъ, проектхэм ягъэцэкIэн охътэ кIэкIым зэшIуахын фэягъ. АщкIэ Интернетыр къызфагъэфедэн амал яIагъ. Iофтхьабзэм икIэух проект анахь дэгъухэр осэшI купым къыхихыгъэх.Проектэу «Перевал историй» зыфиIорэм текIоныгъэ къыдихыгъ. Мыекъопэ къэралыгъо технологическэ университетым истудентхэм якупхэу «Адыгэ Style» ыкIи «Душа Кавказа» зыфиIохэрэм шIухьафтынхэр афагъэшъошагъэх.Лъэпшъыкъо Фатим.