Лъэпшъыкъо Ф.
Адыгэ Республикэм и Сурэт къэгъэлъэгъуапIэ Урысыем исурэтышIхэм я Союз хэтэу, Пшызэ искусствэхэмкIэ изаслуженнэ IофышIэшхоу, изобразительнэ искусствэхэмкIэ Дунэе ассоциацием хэт Виктор Коваленкэм итворчествэ фэгъэхьыгъэ къэгъэлъэгъон къыщызэIуахыгъ. IэпэIасэм ыныбжь илъэс 75-рэ зэрэхъурэм ар фэгъэхьыгъ. Живописым ижанрэ зэфэшъхьафмэ арылъ IофшIэгъи 100 фэдиз ащ хэхьагъ.
АР-м исурэтышIхэм я Союз итхьаматэу Елена Абакумовам зэхахьэр къызэIуихыгъ. Ар Виктор Коваленкэм итворчествэ къытегущыIагъ ыкIи IэпэIасэм илъэсыбэм ылэжьыгъэм къыкIэкIогъэ АР-м культурэмкIэ и Министерствэ ищытхъу тхылъ ритыжьыгъ.— СурэтышIым икъэлэмыпэ къычIэкIыгъэ IэшIагъэхэр непэ нэрылъэгъу къытфэхъугъэх. Искусствэр щыIэныгъэм зэриIотакIор Виктор Коваленкэм къыушыхьатыгъ,— къыIуагъ Елена Абакумовам.— Лъэныкъуабэ къызэлъызыубытырэ къэгъэлъэгъон Виктор Коваленкэм къытфигъэхьазырыгъ. Искусствэм хэхъоныгъэ ышIыным ащ иIахьышхо хэлъ. Исурэтхэм, иIэшIагъэхэм ахэлъ гупшысэр шIыкIэ зэфэшъхьафхэмкIэ къырегъэлъэгъукIы. СурэтышIым жанрэ зэфэшъхьафхэмкIэ Iоф ешIэ,— къыIуагъ Сурэт къэгъэлъэгъуапIэм ипащэу, Адыгэ Республикэмрэ Къэрэщэе-Щэрджэсымрэ язаслуженнэ сурэтышIэу, архитекторэу Бырсыр Абдулахь.
IэпэIасэм исурэт пэпчъ къыбдэгущыIэрэм фэд. Тыкъэзыуцухьэрэ дунаим идэхагъэ фэгъэхьыгъэ IофшIагъэхэр хьалэмэтых. БлэкIыгъэ уахътэм ухэзыщэхэу, дунаим ихъугъэ-шIэгъэ анахь шъхьаIэхэр къизыIотыкIыхэрэр исурэтхэм ахэтых. Ным фэгъэхьыгъэ портретыр, Мэзмае ичIыопс, Хьаджыкъо ипсыхъохэр, къушъхьэу Лэгъо-Накъэ ыкIи нэмыкIхэм ясурэтхэр мыщ щызэхэугъоягъэх.Виктор Коваленкэр къэгъэлъэгъон 200-м ехъумэ ахэлэжьагъ, ахэм азыныкъом дунэе мэхьанэ яI. ИIофшIэн епхыгъэу тын зэфэшъхьафхэр ыкIи рэзэныгъэ тхылъхэр къыфагъэшъошагъэх.— Къэгъэлъэгъоным хэхьэгъэ IофшIагъэ пэпчъ гупшысэ гъэнэфагъэ хэслъхьагъ. Сыкъызщыхъугъэ Адыгеим идэхагъэ къизгъэлъэгъукIыным сыдигъуи сыпылъ. ЛIэужыкIэм сыдэлажьэзэ садэкIэжьы,— къыIуагъ Виктор Коваленкэм.Къэгъэлъэгъоныр Iоныгъом и 13-м нэс зэIухыгъэщт. Искусствэр зышIогъэшIэгъонхэр ащ еплъынхэу зэхэщакIохэм рагъэблагъэх.Лъэпшъыкъо Фатим.