Зэдегъэштэн есынымкIэ Къыблэ федеральнэ шъолъырым ипервенствэ къалэу Ростов-на-Дону щыкIуагъ. Мыщ зыныбжь илъэс 13-м емыхъугъэхэм зыщаушэтыгъ. Нэбгыри 160-м ехъумэ яIэпэIэсэныгъэ къагъэлъэгъуагъ, медальхэм афэбэнагъэх. Ростов хэкум, Краснодар краим, Астрахань, Волгоград, Симферополь, Севастополь ыкIи федеральнэ чIыпIэу «Сириусым» ялIыкIохэр зэнэкъокъугъэх.
Адыгэ Республикэр къэзыгъэлъэгъуагъэхэр олимпийскэ резервым испорт еджапIэу Владимир Максимовым ыцIэ зыхьырэм зыщызыгъасэхэрэр ары. Ахэр ныбжьыкIэ дэдэх нахь мышIэми, IэпэIэсэныгъэшхо зэраIэкIэлъыр, мы спорт лъэпкъымкIэ сэнаущыгъэ зыхэлъ спортсменхэр зэрэтиIэхэр къагъэлъэгъуагъ.
Турнирым хэлэжьагъэхэм анахь къахэщыгъэр Мыекъуапэ щыщ Ярослав Стародубцевыр ары. Унэе зэнэкъокъухэм ащ текIоныгъэр къызэращыдихыгъэм дакIоу, Урысыем и КъыблэкIэ анахь узщыгугъын плъэкIыщт спортсменхэм зэращыщыр къыгъэшъыпкъэжьыгъ. Ярослав республикэм дышъэ медаль къыфихьыгъ.
Ау мы гъэхъэгъэ закъор арэп тишъолъыр иIэр. Ярослав Стародубцевымрэ Софья Тришинамрэ лъэныкъоу «микст-дуэт» зыфиIорэмкIэ тыжьын медальхэр къафагъэшъошагъэх. Мы программэр анахь гъэшIэгъонхэм ащыщ, шIокI имыIэу нэбгыритIуми зэдырагъэштэн, зэгурыIонхэ фае.Урысыем изаслуженнэ тренерэу Нина Говорковамрэ спортымкIэ мастерэу Иван Говорковымрэ ныбжьыкIэхэр агъэхьазырыгъэх.