ШахматхэмкIэ я 81-рэ зэIухыгъэ чемпионат Мыекъуапэ щыкIуагъ. Мыщ хъулъфыгъэхэр ыкIи бзылъфыгъэхэр хэлэжьагъэх. Iофтхьабзэм кIэщакIо фэхъугъэх Мыекъуапэ физическэ культурэмкIэ ыкIи спортымкIэ и Комитетрэ АР-м шахматхэмкIэ и Федерациерэ. Зэнэкъокъум зыщызыушэтыгъэ нэбгырэ 19-м янахьыбэр ныбжьыкIэх.
Апэрэ турхэм къащегъэжьагъэу медальхэм нэбгыриплI зэрафэбэнэщтыр къэнэфагъ. Адыгеим ипервенствэ гъогогъу пчъагъэрэ текIоныгъэ къыщыдэзыхыгъэ Александр Цысь (Апшеронскэ район) ыкIи Мыекъуапэ щыщ Николай Удовиченкэр нахь къахэщыщтыгъэх. Ахэм ауж итых кIэлэ ныбжьыкIэхэу Артем Гарпуцрэ Даниил Козленкэмрэ.
Удовиченкэр Цысь нахь лъэшыгъ. Ау ящэнэрэ турым Николай Удовиченкэм къытекIуагъ шахматист ныбжьыкIэу Даниил Козленкэр. Удовиченкэмрэ Артем Гарпуцрэ язэIукIэгъу пчъагъэр зэфэдизэу аухыгъ. Александр Цысь зы партие ныIэп шIуахьыгъэр, адрэхэм зэкIэми текIоныгъэр къащыдихыгъ ыкIи апэрэ хъугъэ. Николай Удовиченкэм очкоуи 5,5-рэ ригъэкъугъ, ар ятIонэр. Артем Гарпуца ящэнэрэ чIыпIэр фагъэшъошагъ.Бзылъфыгъэхэм язэнэкъокъу щытекIуагъ Дарья Коноплинар. Джащ фэдэу хагъэунэфыкIырэ чIыпIэхэр къыдахыгъэх Ника Широбоковамрэ Арина Жуковамрэ.