МКъТУ
Сэнэхьат ухьазырыныгъэмкIэ шъолъыр программэу «Херсонщинэм и ЛIыхъужъхэр» зыфиIорэм хэлэжьэнэу къыхахыгъэ нэбгырэ 12-мэ яеджэн иящэнэрэ едзыгъоу Адыгеим щыкIуагъэр ыкIэм фэкIуагъ.
Мэфи 10-м къыкIоцI ветеранхэр тишъолъыр щыIэхэу экономикэм, шъолъыр ыкIи муниципальнэ гъэIорышIэным афэгъэхьыгъэу яшIэныгъэхэм ахагъэхъуагъ, программэу «Адыгеим и ЛIыхъужъхэр» зыфиIорэм хэлажьэхэрэм аIукIагъэх, яшIэныгъэхэмкIэ зэхъожьыгъэх.Шъугу къэдгъэкIыжьын, Херсон хэкум игубернаторэу Владимир Сальдо яветеранхэм яеджэн иящэнэрэ едзыгъо Адыгеим щылъагъэкIотэным къыкIэлъэIугъ ыкIи АР-м и ЛIышъхьэу КъумпIыл Мурат а гукъэкIым дыригъэштагъ.ШъолъыритIум язэдэлэжьэныгъэ къыдыхэлъытагъэу, мы Iофтхьабзэр зэрифэшъуашэу рагъэкIокIыгъ. Къэралыгъом исистемэ субъектыкIэр щыщ хъунымкIэ егъэджэным къыфыхахыгъэ шIыкIэр лъэгэпIэшIум диштэу зэрэщытыгъэр ащ хэлэжьагъэхэм къыхагъэщыгъ. Шъолъыр гъэIорышIэным икъоу ветеранхэр фагъэхьазырыгъэх.«Херсонщинэм и ЛIыхъужъхэр» зыфиIорэм хэтхэр Адыгеим ихэбзэ къулыкъухэм, чIыпIэ зыгъэIорышIэжьыным, проектнэ советым япащэхэм рагъэджагъэх. Джащ фэдэу сэнэхьат ухьазырыныгъэмкIэ шъолъыр программэу «Адыгеим и ЛIыхъужъхэр» зыфиIорэм хэлажьэхэрэм аIукIагъэх. КъэзэрэшIэжьыгъэхэри къахэкIыгъэх.Херсон илIыхъужъхэм ащыщэу Ярослав Федосеевым къызэриIуагъэмкIэ, къулыкъу зыдихьыгъэ дзэкIолI икъош мыщ щыIукIагъ, а такъикъ лъапIэхэр бэрэ ыгу къэкIыжьыщтых.Еджэн едзыгъом лекциехэм, тренингхэм, практикэхэм анэмыкIэу культурнэ ыкIи зекIо программэхэр къыдыхэлъытэгъагъэх. Адыгеим икультурэыкIи ичIыопс бай Херсон илIыхъужъхэм зэрагъэлъэгъун амал яIагъ.Адыгеим и ЛIышъхьэу КъумпIыл Мурат пчъагъэрэ зэрэхигъэунэфыкIыгъэмкIэ, хэушъхьафыкIыгъэ дзэ операцием иветеранхэм яшэнышIухэу патриотизмэр, пшъэрылъ къинхэм язэшIохынкIэ IэпэIэсэныгъэу аIэкIэлъыр тикъэралыгъо хэхъоныгъэ ышIыным фытегъэпсыхьагъэх.IЭШЪЫНЭ Сусан.