А. Гусев
Адыгеим и ЛIышъхьэу КъумпIыл Мурат ощххэм апкъ къикIыкIэ псыхъохэм адэт псым зыкъызэриIэтыгъэм фэгъэхьыгъэ зэIукIэр зэрищагъ.
Шъугу къэтэгъэкIыжьы мэфэ пчъагъэ зэлъыпытэу къызэрещхыгъэм ыкIи чIым бащэу шынэгъакIэ зэригъотыгъэм къахэкIэу ошIэ-дэмышIэ IофымкIэ шапхъэхэм республикэр зэратехьагъэр.Iофтхьабзэм хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, ащ игуадзэхэу ЛIыхэсэ Махьмудрэ Хъоткъо Хъызыррэ, АР-м иминистрэхэм я Кабинет и Тхьаматэ игуадзэу, финансхэмкIэ иминистрэу Виктор Орловыр, министрэхэм я Кабинет и Тхьаматэ игуадзэу, АР-м цифрэ, къэбарлъыгъэIэс, телекоммуникационнэ технологиехэмкIэ иминистрэу Шыу Заурбэч, Адыгеим и ЛIышъхьэрэ иминистрэхэм я Кабинетрэ я Администрацие ипащэу Владимир Свеженец, къалэхэм, районхэм, къулыкъу гъэнэфагъэхэм япащэхэр.ЯIофхэм язытет фэгъэхьыгъэу чIыпIэхэм япащэхэм къаIотагъэм КъумпIыл Мурат едэIугъ. Мыекъопэ районым ипащэу Михаил Марьиным къызэриIуагъэмкIэ, ощххэм апкъ къикIыкIэ муниципалитетым ихэпIи 115-мэ, ищагу 271-мэ псыр къакIэуагъ. Зэрар зыхьыгъэ унэхэм арысхэм сомэ мин 30, зихатэ псы дэхьагъэхэм сомэ мини 10 аратынэу агъэнэфагъ.ЖъоныгъуакIэм и 20-м къыщегъэжьагъэу гъэлъэшыгъэ шIыкIэм тетэу Мыекъопэ районым Iоф щашIэ. Непэрэ мафэм ехъулIэу псыр тыди щызэкIэкIожьыгъ. Оперативнэ къулыкъухэмрэ район администрацием иIофышIэхэмрэ чIыпIэ зэжъу ифагъэхэм IэпыIэгъу афэхъугъэх, шIыхьафхэр зэхащагъэх. ТхьамыкIагъом икIэуххэм ядэгъэзыжьын нэбгырэ 70-рэ фэдиз, техникэ 20 хэлэжьагъ.АР-м и ЛIышъхьэ зэрэхигъэунэфыкIыгъэмкIэ, чIыпIэхэм япащэхэр ошIэ-дэмышIэ тхьамыкIагъохэр къызыщыхъурэ чIыпIэхэм ащыIэнхэ, Iофхэм язытет ашъхьэкIэ гъунэ лъафын фае.«ЦIыфхэр шъо къышъущэгугъых. Ренэу ахэм зэпхыныгъэ адышъуиIэн, Iофыгъоу къэтэджыхэрэр псынкIэу зэшIошъухын, Iофхэм язытет алъыжъугъэIэсын ыкIи амалэу зэрахьэхэрэмкIэ цIыфхэм макъэ яжъугъэIун фае», — къыIуагъ КъумпIыл Мурат.Мыекъуапэ имэрэу Геннадий Митрофановым къызэрэхигъэщыгъэмкIэ, Мыекъуапэ дэт унэ 24-мэ псыр арыхьагъ. Ащ фэдэ унэхэм арысхэм сомэ мин 30 зырыз ятыжьыгъэным тегъэпсыхьэгъэ тхылъхэр джыдэдэм агъэхьазырых. ЧъыгхэтэлэжьыпIэу «Весна» зыфиIорэм псыр кIэоныр къызыхэкIыгъэр псышIой рыкIуапIэр зэрэзэщыкъогъагъэр ары. Унэхэм псыр арыкIыжьыгъ, ау щагу заулэмэ джыри ар зэрадэт. ПстэумкIи хэпIэ 74-мэ псыр къакIэуагъ.Кощхьэблэ, Шэуджэн, Теуцожь районхэм арыт псыхъохэм зыкъаIэтыгъ, ау псыр нэпкъхэм къадэкIыгъэп. ПсыIыгъыпIэхэм язытет гъунэ лъафы.Красногвардейскэ районымкIэ къуаджэу Хьатикъуае ихэпIи 8-мэ къакIэогъэгъэ чIычIэгъыпсхэр дащыжьыгъэх. Адэмые ищагуищмэ псыр адэхьэгъагъ.Ощхышхохэм апкъ къикIэу Адыгэкъалэ ищагуи 4-мэ псыр адэуцогъагъ. Ощхышхохэм Тэхъутэмыкъое районым хэхьэрэ псэупIэхэу Яблоновскэм, Инэм, АдыгеякIэм зэрар арахыгъ. Анахьэу зэрар зыхьыгъэхэр щагухэмрэ фэтэрыбэу зэхэт унэхэм ячIыунэхэмрэ ары. ТхьамыкIагъом икIэуххэм ядэгъэзыжьын пае техникэ 25-рэ къызфагъэфедагъ.Джэджэ районым ит псыхъохэм псэу адэтыр шапхъэхэм ашIокIырэп. Ощххэм апкъ къикIыкIэ щагуи 4-мэ псыр къадэхьэгъагъ, чIыпIэ зэжъу ифагъэхэм ящыкIэгъэ IэпыIэгъур арагъэгъотыгъ.КIэрэщэ Анзаур зэIукIэгъум къызэрэщиIуагъэмкIэ, Пшызэ бассейн псы гъэIорышIапIэм-рэ муниципалитетхэм япащэхэмрэ ренэу зэпхыныгъэ адыряI. Краснодар, Шапсыгъэ псыIыгъыпIэхэм псэу адэтымрэ адагъэчъырэмрэ ренэу гъунэ алъафы. Росводресурсым икомиссие гидротехническэ псэуалъэхэм язытет ыуплъэкIугъ. ОшIэ-дэмышIэ тхьамыкIагъохэр къэхъунхэ зэрилъэкIыщтым епхыгъэу дамбэхэр зэрагъэпытэщт пкъыгъохэр агъэхьазырыгъэх.«ОшIэ-дэмышIэ Iофхэм апэшIуекIогъэнымкIэ опытышIу тиIэ хъугъэ. Мы лъэныкъомкIэ IофшIэкIэшIоу тIэкIэлъ хъугъэр къыдэтлъытэзэ, сыд фэдэрэ чIыпIэ къини зэпытчын, амалэу, мылъкоу щыIэр зэкIэ къызфэдгъэфедэн фае. ЦIыфхэм IэпыIэгъу ягъэгъотыгъэнымкIэ, псэупIэхэм псынкIэу щыIакIэр ащызэтегъэуцожьыгъэнымкIэ хэти фэлъэкIыщтыр ышIэн фае», — къыIуагъ АР-м и ЛIышъхьэ.Адыгеим и ЛIышъхьэ псыкъиуным гумэкIыгъоу къыздихьыгъэхэм ядэгъэзыжьынкIэ мы охътэ благъэм ашIэн фаехэр къыгъэнэфагъэх. Республикэм ипащэ унэхэми, хапIэхэми псыр адэщыжьыгъэныр муниципалитет пстэуми ащаухынэу, зэщыкъогъэ инфраструктурэр псынкIэу зыпкъ рагъэуцожьынэу пшъэрылъ къафишIыгъ.Псыхъохэм язытет чэщи-мафи гъунэ джыри зэрэлъафыщтыр зэIукIэгъум щыхагъэунэфыкIыгъ. Iофхэм язытет зэрэхьылъэу къэнэжьы. Мы мэфэ благъэхэм лъэшэу къемыщхын фэдэу синоптикхэм къатыгъ. Муниципалитетхэм гъэлъэшыгъэ шIыкIэм тетэу Iоф ашIэ.АР-м и ЛIышъхьэ ипресс-къулыкъукъытырэ къэбархэмкIэЛIышэ Саныет.