Гъэмэфэ мэзищым иапэрэ мазэу мэкъуогъур къихьагъ. ИжъыкIэ къыщегъэжьагъэу мы мазэр шIулъэгъум, унэгъо насыпым, джэныкъом иухъумакIо итхьэу алъытэ.
МэфэпчъымкIэ мэкъуогъум и 1-м гъэмафэр къехьэ, ау астрономием ылъэныкъокIэ мафэмрэ чэщымрэ якIыхьагъэ зэфэдиз зыщыхъурэ мэкъуогъум и 22-р ары гъэмафэр къихьагъэу залъытэрэр.ГидрометеорологиемкIэ ыкIи тыкъэзыуцухьэрэ дунаим иуплъэкIункIэ Гупчэм къызэритыгъэмкIэ, илъэс зэкIэлъыкIохэм уплъэкIунэу ашIыгъэхэмкIэ мэкъуогъу мазэр «шIухьафтынхэмкIэ» баигъэ. Мы аужырэ илъэс 80-м гъэмафэм иапэрэ мазэр нахь фабэу къызщыхэкIыгъэр 2010-рэ илъэсыр ары. Илъэс къэс мэкъуогъум фабэу щыIэр градус 30-м къехъу.Мэкъуогъум фабэр Средиземноморьем къикIыщт. ГурытымкIэ мазэм температурэу щыIэщтыр шапхъэм фэдизыщт ыкIи макIэу шIокIыщт, ощхэу къещхыщтым ибагъэ шапхъэм фэдизыщт.Апэрэ мэфипшIыр. Чэщым фабэу градус 13 —18 щыIэщт, къыхэкIыщт градуси 3 — 8-м зыщынэсыщтри. Мафэм фабэу градус 20 — 25-рэ щыIэщт, градус 31-м кIахьэуи къыхэкIыщт.ЯтIонэрэ мэфипшIыр. Чэщым градуси 12 — 17-рэ, мафэм градус 26 — 31-рэ щыIэщт.Ящэнэрэ мэфипшIыр. Чэщым градуси 14 — 19, мафэм градус 27 — 32-рэ щыIэщт.Мэкъумэщ культурэхэм якъэгъэкIынкIэ мэкъуогъум икъихьагъум гумэкIыгъохэр къыздихьынхэ ылъэкIыщт. Псыхъохэм адэт псыр шапхъэу щыIэхэм ашIокIыщтэп. Ау лъэшэу къызещхырэм, ащ адэт псыр къыдэкIоен ылъэкIыщт.КIАРЭ Фатим.