ГухэлъышIухэмкIэ зэнэкъокъу

НыбжьыкIэ проектхэмкIэ Урысые зэнэкъокъоу «Воплоти свою мечту» зыфиIорэм иаужырэ лъэныкъохэу «Зэтегъэпсыхьанымрэ» «ГуфэкIонымрэ» якIэух едзыгъо мы мафэхэм Мыекъопэ къэралыгъо технологическэ университетым щыкIуагъ.

2013-м къыщегъэжьагъэу илъэс къэс мы зэнэкъокъур апшъэрэ еджапIэм щызэхащэ, кIэлэеджакIохэм ыкIи студентхэм лъэныкъо зэфэшъхьафхэмкIэ гухэлъэу яIэхэр къызыщыраIотыкIырэ проектхэр къыщагъэлъагъох. Мыгъэ ныбжьыкIэхэр лъэныкъуитфыкIэ зэнэкъокъугъэх. Ахэр: «Предпринимательствэр», «ИТ ыкIи цифрэ технологиехэр», «Медиар», «Зэтегъэпсыхьаныр» ыкIи «ГуфэкIоныр».

НыбжьыкIэ проектхэмкIэ Урысые зэнэкъокъоу «Воплоти свою мечту» зыфиIорэм ипащэу Светлана Новиковам къызэрэтиIуагъэмкIэ, Iофтхьабзэм хэлажьэхэрэм япчъагъэ илъэс къэс хэхъо.— Мыгъэ зэнэкъокъум иапэрэ едзыгъо куп 309-рэ хэлэжьагъ, ахэм ащыщэу финалым 60-р ихьагъ. Лъэныкъо пэпчъ куп 12 щызэнэкъокъугъ, ныбжьым елъы­тыгъэу ахэр гощыгъагъэх. Мы илъэсым зэкIэмкIи шъолъыр 28-мэ ялIыкIохэр хэлэжьэнхэу япроектхэр къагъэхьыгъэх, ахэм ащыщэу шъолъыр 17-мэ яныбжьыкIэхэр финалым ихьагъэх. Хабзэ зэрэхъу­гъэу, Адыгеим имызакъоу нэмыкI шъо­лъырхэм ащыщхэри хэлажьэх, ахэм пэIудзыгъэ шIыкIэм тетэу япроектхэр къыраIотыкIых. Мыгъэ Донецкэ ыкIи Луганскэ народнэ республикэхэм, Къырым ыкIи Урысыем ишъолъыр зэфэ­шъхьаф­хэм ащыщхэр хэлэжьагъэх. Къагъэхьазырыгъэ проектхэр гъэшIэгъоных, мэхьанэшхо яI. Лъэныкъохэм ащыщэу «ГуфэкIоным» нахьыбэ къыхэлэжьагъ, сыда пIомэ, мы аужырэ илъэсхэм волонтер, гуфэкIо купэу гурыт еджапIэхэм, гурыт сэнэхьат зыщызэрагъэгъотырэ ыкIи апшъэрэ еджапIэхэм ащызэхащэхэрэр нахьыбэ хъугъэ, — къыIуагъ Светлана Новиковам.

Лъэныкъоу «Зэтегъэпсыхьаныр» зыфиIорэм иаужырэ уцугъо зэфэхьысыжьэу фэхъугъэхэм ялъытыгъэу текIоныгъэ къыдэзыхыгъэхэр агъэшIуагъэх. Зэфэхьысыжьхэм къызэрагъэлъэгъуагъэмкIэ, илъэс 14-м къыщегъэжьагъэу 18-м нэс зыныбжьыхэм ащыщэу анахь дэгъоу зыкъэзыгъэлъэгъуагъэхэр Ф. И. Антонца ыцIэ зыхьырэ гурыт еджапIэу N 10-м икIэлэеджакIохэр ары. ЯеджапIэ ищагу изэтегъэпсыхьан, чъыгхэм, къэгъагъэхэм ягъэтIысхьан ар фэгъэхьыгъагъ. ЯтIонэрэ чIыпIэр къыдахыгъ кIэлэцIыкIу гъэсэныгъэ гупчэу «Витязь» зыфиIорэм къыгъэ­хьазырыгъэу «Энергия города» зыфиIорэмрэ Адыгэ республикэ гимназием икIэлэеджакIохэм япроектэу джырэ еджа­пIэр зыфэдэн фаем фэгъэхьыгъэмрэ. Ящэнэрэ чIыпIэр зэдагощыгъ гурыт еджа­пIэу N 10-м, гурыт еджапIэу N 1-у И.П. Вилиным ыцIэ зыхьырэм, гурыт еджапIэу N 1-у Д.А. Iэшъхьэмафэм ыцIэ зыхьырэм якупхэм.

Илъэс 19-м къыщегъэжьагъэу 25-м нэс зыныбжьыхэмкIэ текIоныгъэ къыдахыгъ псэолъэшIынымкIэ, экономикэмкIэ ыкIи правэмкIэ Луганскэ колледжым истудентхэм къагъэхьазырыгъэу яеджапIэ чъыгхэр зэрэщагъэтIысхьащтым ипроект. ЯтIонэрэр зэдагощыгъ Кореновскэ политехническэ техникумымрэ Красногвардейскэ мэкъумэщ-промышленнэ техникумымрэ. Химическэ промышленностымкIэ Армянскэ колледжым, промышленнэ-псэолъэшI ыкIи бытовой технологиемкIэ Северодонецкэ колле­джым, Мыекъопэ къэралыгъо технологическэ университетым ястудентхэм ящэнэрэ чIыпIэр зэдагощыгъ.

Аужырэ лъэныкъоу «ШIушIэным» изэфэхьысыжьхэри бэмышIэу ашIыгъэх. Ахэм къызэрагъэлъэгъуагъэмкIэ, нахьыкIэхэмкIэ апэрэ чIыпIэр къыдихыгъ лицееу N 34-м икуп, ятIонэрэр зэдаго­щыгъ Зуевскэ гурыт еджапIэу N 11-м икупрэ дэеу зэхэзыхыхэрэмрэ зылъэгъу­хэрэмрэ я Адыгэ республикэ еджэпIэ-интернатрэ. Ящэнэрэ хъугъэх Нэхэе Кимэ ыцIэ зыхьырэ гурыт еджапIэу N 9-м, Мыекъо­пэ къэралыгъо технологическэ университетым, Мыекъопэ гимназиеу N 22-м агъэхьазырыгъэ проектхэр.Илъэс 19-м къыщегъэжьагъэу 25-м нэс зыныбжьыхэм якуп текIоныгъэ къы­щыдахыгъ Мыекъопэ къэралыгъо технологическэ университетым истудентхэм. ЯтIонэрэ чIыпIэр зэдагощыгъ Мыекъопэ политехническэ техникумым истудентхэмрэ ыкIи МКъТУ-м истудентхэм Адыгэ республикэ гимназием икIэлэеджакIохэр ягъусэу. Ящэнэрэ хъугъэх Мыекъопэ индустриальнэ техникумым, Пшызэ къэ­ралыгъо университетым, къэбарлъыгъэ­­Iэс технологиехэмкIэ ыкIи экономикэмкIэ Антрацитовскэ колледжым ястудентхэр.Шъугу къэдгъэкIыжьын, текIоныгъэ къыдэзыхыгъэхэр Мыекъопэ къэралыгъо технологическэ университетым чIахьэхэ хъумэ балл тедзэхэр афыхалъытэщтых, джащ фэдэу ахэм ацIэ-алъэкъуацIэхэр Урысые Федерацием и Президент ифондэу «Сэнаущыгъэр ыкIи гъэхъагъэхэр» зыфиIорэм рагъэхьащтых.

ДЕЛЭКЪО Анет.