АМ
ЗэлъашIэрэ бзылъфыгъэ усакIоу Емыж МулиIэт Ибрахьимэ ыпхъум фэгъэхьыгъэ литературнэ пчыхьэзэхахьэу «Гум ибзэпсхэр» зыфиIорэр АР-м и Лъэпкъ тхылъеджапIэ мы мафэхэм щызэхащагъ.
Ащ усакIом итворчествэ зикIасэхэр, ар зышIэщтыгъэхэр, деджагъэхэр, телерадиокомпаниеу «Адыгеим», гуманитар ушэтынхэмкIэ Адыгэ республикэ институтэу Т. КIэращэм ыцIэ зыхьырэм яIофышIэхэм ащыщхэр, АКъУ-м адыгэ филологиемрэ культурэмрэкIэ ифакультет икIэлэегъаджэхэр, студентхэр, тхэкIо-усакIохэр ыкIи литературнэ клубэу «Тхылъеджэм» хэтхэр хэлэжьагъэх.МулиIэт усэкIо къодыягъэп, ащ игулъытэ-гурышэ щыIэныгъэм ылъэныкъуабэм анэсыгъагъ, ар усэкIуагъ ыкIи драматургыгъ, зэдзэкIэкIо-сценаристыгъ, тележурналистыгъ ыкIи режиссерыгъ.МулиIэт пасэу усэныр зыгу къыщыущыгъэгъэ бзылъфыгъ. Аскъэлэе гурыт еджапIэм щеджэщтыгъ иусэ нэфынэ фабэхэр Теуцожь район гъэзетым ыкIи журналэу «Зэкъошныгъэм» къащыхиутыхэ зэхъум. 1970-рэ илъэсым Адыгэ тхылъ тедзапIэм къыщыдэкIыгъэ ныбжьыкIэ тхэкIо купым ятхылъэу «Гъэтхэ къэгъагъэхэр» зыфиIорэм МулиIэт иусэхэр къыдэхьагъэх. Ащ къыкIэлъыкIуагъэх ежь иусэхэр зыдэт тхылъхэр: «Къэзыгъэзэжьыгъэ орэдхэр», «Тамыгъэ шъэф», «Нэфынэ лъаг», «Къэгъэгъэ шIуцI», «Горное озеро» зыцIэ тхылъыр урысыбзэкIэ, «ТхьэлъэIу», нэмыкIхэри.
МулиIэт шIэныгъэ-гъэсэныгъэ дэгъу иIагъ: Москва дэт Литературнэ институтэу М. Горькэм ыцIэ зыхьырэр 1980-рэ илъэсым къыухыгъ. Адыгэ къэралыгъо драматическэ театрэм илитературнэ IофышIэу, мы лъэныкъом ипащэу 1985 — 1991-рэ илъэсхэм щылэжьагъ. 1991 — 1993-рэ илъэсхэм АР-м ителерадиокомпание иредакторыгъ, 1993 — 1994-рэ илъэсхэм журналэу «Зэкъошныгъэм» поэзиемкIэ иотдел иIофышIагъ.1967-рэ илъэсым къыщегъэжьагъэу ытхыхэрэр хиутыщтыгъэх. Усэхэр тхьэтын шъыпкъэу къыIутэкъущтыгъэх, ау ахэм ямызакъоу, ащ пьесэхэр ытхыщтыгъэх ыкIи зэдзэкIын Iофышхо мыпсынкIэри къыдэхъущтыгъ, классическэ литературнэ произведениехэм ащыщхэр игуапэу зэридзэкIыгъэх, ащкIэ адыгэ культурэм хахъо фишIэу. Ащ ипьесэу «Уадыгэба, кIал» зыфиIорэр адыгэ театрэмкIэ лъэныкъуакIэу хъугъэ, трагикомедиеу «Хьэм игъолъыпI» зыфиIорэр мэхьанэу кIоцIылъымкIэ цIыфыбэр зылъызыщэу гъэпсыгъэ.Емыжым иусэхэр гулъэчIэ мэшIо макъэр зыхэIукIырэх ыкIи ахэм шIогъэшIэгъонэу лIэужыкIэр яджэщтыгъ. МулиIэт цIыф гъэшIэгъон, гумыпсэфэу, сыдигъуи щыIэныгъэм щыхъурэ-щышIэрэм чанэу хэлажьэщтыгъ. Усэхэр зэритхырэм имызакъоу, сыдигъуи республикэм икультурнэ щыIакIэ ыгупчэ итыгъ, проект зэфэшъхьафхэу адыгэ культурэм ыкIи бзэм ихэгъэхъонкIэ рахъухьэхэрэм хэшIыкI афыриIэу ахэлажьэщтыгъ. ИгъэпсыкIэ-шIыкIэкIэ, иIоф шъыпкъагъэу фыриIэмкIэ узылъызыщэу ыкIи узыкIырыплъынэу щытыгъ.МулиIэт мы илъэсым мэлылъфэгъум и 4-м къызыхъугъэр илъэс 75-рэ хъугъэ, ау къыгъэшIагъэр — 72-рэ. Литературнэ зэхахьэм хэлэжьагъэхэм янахьыбэр тхакIор дэгъоу зышIэщтыгъэхэр ары. Ахэм ащыщ Унэрэкъо Рае. МулиIэт ипоэзие аукъодыеу щымытэу, гум, псэм амакъэ щызэхапшIэхэу, ухэтми иусэ пычыгъо закъуи укъигъэущэу, уиушэтэу зэрэщытыр, иусэхэр ямышIыкIэу зэрэушъагъэхэр, хэбдзын зэрэхэмылъыр, зэкIэ ащ итхыгъэхэр адыгэ литературэм идышъэ фонд зэрэхэхьагъэхэр Рае ыкIи Iофтхьабзэм хэлэжьагъэхэм кIагъэтхъыгъ.Пчыхьэзэхахьэр М. Емыжым ищыIэныгъэ ыкIи итворчествэ афэгъэхьыгъэ тхылъ къэгъэлъэгъонымрэ мультимедийнэ лъэтегъэуцомрэ къагъэбаигъ.МулиIэт игушъхьэкIэн лъапIэу — итхылъхэр щэIэфэхэкIэ, ащ ыцIэ ащыгъупшэщтэп. Ахэм гукъэбзэгъэ-лъэшыгъэу ахэлъым, псэм ымакъэу ахэткIухьагъэм, джыри бэрэ цIыфхэр зылъащэщтых.Мамырыкъо Нуриет.