Iэшъынэ А.
Адыгэ къэралыгъо университетыр кIэщакIо зыфэхъугъэ кIэлэцIыкIумэ яя 5-рэ Дунэе литературнэ зэнэкъокъоу Жэнэ Къырымызэ ыцIэкIэ щытыр мэкъуогъум и 1-м къыщегъэжьагъэу шышъхьэIум и 30-м нэс кIощт.
Мыр илъэс къэс рагъэкIокIы, зыныбжь илъэс 18-м къехъугъэхэр хэлажьэх. Гъэ къэс зэнэкъокъум ыцIэ зэблахъу, мыгъэрэм зэреджагъэхэр — «МэфэкI». Илъэси 3-м къыщегъэжьагъэу 12-м нэс зыныбжь кIэлэцIыкIухэм апае тхыгъэ, зэдзэкIыгъэ, сурэт техыгъэ анахь дэгъухэм якъыхэгъэщын Iофтхьабзэр тегъэпсыхьагъ.Зэнэкъокъум ипшъэрылъхэр: адыгабзэкIэ, къэбэртэябзэкIэ, урысыбзэкIэ кIэлэцIыкIумэ апае тхэхэрэр, цIыкIумэ афэгъэхьыгъэ произведениехэм адэлэжьэрэ сурэтышIхэр, тхыгъэхэр бзищкIэ зэзыдзэкIхэрэр къыхэгъэщыгъэнхэр.Зэнэкъокъум хэлажьэ зышIоигъохэм яIофшIагъэхэр электроннэ почтэу «konkurs.jane@yandex.ru» зыфиIорэм гъэмэфэ мэзищым рагъэхьынхэ алъэкIыщт. ОсэшI купым Iоныгъо ыкIи чъэпыогъу мазэхэм Iоф ышIэщт, текIуагъэхэр шэкIогъум и 15-м къэнэфэщтых. Произведение анахь дэгъухэр зэнэкъокъум итхылъ шъхьаф къыдэхьащтых. Лъэныкъохэм ащытекIуагъэмэ ацIэхэр, алъэкъуацIэхэр зэнэкъокъум ихэхыгъэ сайтэу «http://konkursjane.adygnet.ru» зыфиIорэм ыкIи сайтхэу Вконтакте, Телеграмым къарыхьащтых.Шъугу къэдгъэкIыжьын, 2022-рэ илъэсым Адыгэ къэралыгъо университетым зэнэкъокъур апэрэу зэхищагъ. Илъэс къэс Iофтхьабзэм щытекIуагъэхэм ятхылъ цIыкIухэр университетым итхылътедзапIэ къыщыдагъэкIых ыкIи ахэр Москва щызэхащэрэ Урысые къэгъэлъэгъоным хэлажьэх, электроннэ платформэу «Литресым» рагъахьэх.Лъэпшъыкъо Фатим.