Iэшъынэ А.
Гуманитар ушэтынхэмкIэ Адыгэ республикэ институтэу Т. КIэращэм ыцIэ зыхьырэм славян тхыбзэм ыкIи культурэм, Урысыем щыпсэурэ цIыф лъэпкъхэм языкIыныгъэ и Илъэс афэгъэхьыгъэ мэфэкI еджэнхэр щыIагъэх.
Iофтхьабзэм АКъУ-м, МКъТУ-м ялIыкIохэр, къош республикэхэм, Москва, Краснодар, Сыхъум, Ермэлхьаблэ, Владикавказ къарыкIыгъэхэр, ежь институтым ишIэныгъэлэжьхэр, аспирантхэр, лъэпкъ культурэм иIофышIэхэр хэлэжьагъэх.Научнэ еджэнхэр шIуфэс псэлъэ фабэкIэ къызэIуихыгъ гуманитар ушэтынхэмкIэ Адыгэ республикэ институтым ипащэ игуадзэу, филологие шIэныгъэхэмкIэ докторэу Биданэкъо Марзият.МэфэкI инэу славян тхыбзэм ыкIи культурэм и МафэкIэ къызэхэхьагъэхэм ар къафэгушIуагъ, ямурад ехьыжьагъэ шIуагъэ хэлъэу зэшIуахынэу къафэлъэIуагъ.
Iофтхьабзэм къыдыхэлъытагъэу къиIотыкIынэу «От «Думы о прошлом» до «Крыльев казака». Опыт анализа эволюции авторских взглядов на русскую трагедию XX века» зыфиIорэр къышIыгъ философие шIэныгъэхэмкIэ кандидатэу, АР-м и Къэралыгъо Совет — Хасэм зекIонымкIэ, экологиемкIэ, чIыопсыр гъэфедэгъэнымкIэ икомитет итхьаматэу Евгений Саловым.Ащ къыкIэлъыкIуагъэх гуманитар ушэтынхэмкIэ Адыгэ республикэ институтым тарихъымкIэ иотдел ипащэу Пэнэшъу Аскэр идокладэу «Хазарская проблема в контексте славяно-адыгских контактов» ыкIи мы отделым инаучнэ IофышIэ шъхьаIэу Къандор Руслъан игущыIэу «Новые инициативы российских властей по усилению влияния на черкесские аульные общества Кубанской области» зыфиIохэрэр. АР-м культурэмкIэ и Министерствэ иIофышIэ-эксперт шъхьаIэу Теуцожь Нуриет «Узелковое искусство в русской и адыгской культуре», гуманитар ушэтынхэмкIэ Адыгэ республикэ институтым инаучнэ IофышIэ ныбжьыкIэу Уджыхъу Айтэч «Адыго-славянские культурные связи на языке народной мудрости» зыфиIохэрэм къатегущыIагъэх. Славян тхыбзэм ыкIи культурэм игъорыгъоу лъапсэ зэрагъотыгъэр, шIуагъэу къатыгъэр къэгущыIагъэ пэпчъ къаушыхьатызэ хагъэунэфыкIыгъ.
Еджэнхэм цIыфыбэ ахэлэжьагъ, пэIудзыгъэ шIыкIэм тетэу зигупшысэхэр къизыIотыкIыгъэхэри макIэп. Институтым славян-адыгэ культурэ зэпхыныгъэхэмкIэ иотдел ишIэныгъэ IофышIэ шъхьаIэу ЕмыкI Нурджан «Древняя Никопсия: археологические свидетельства» зыфиIорэр, искусствоведениемкIэ докторэу, АКъУ-м искусствэхэмкIэ и Институт ипрофессорэу Алла Соколо-вам «Репертуарная политика фольклорных коллективов региона» зыфиIохэрэр ыкIи педагогикэ шIэныгъэхэмкIэ кандидатэу Галина Луганскаям М. А. Балакиревым итворчествэ ыкIи Кавказым имузыкальнэ-этнографическэ кIэн урыс музыкэм зэрэщызэдэIорышIэхэр къыраIотыкIыгъ.Я XIX-рэ шIэныгъэ еджэнхэм нэбгырабэ ахэлэжьагъ, яшIошI-еплъыкIэхэр темэ зэфэшъхьафхэмкIэ къыщыраIотыкIыгъэх ыкIи Iофтхьабзэм ыкIэм а зэкIэмкIи зэфэхьысыжьхэр ашIыгъэх.ЦIыфлъэпкъымкIэ бзэ пэпчъ мэхьанэшхо зэриIэр гупшысэ зэфэшъхьафыбэу къыраIотыкIыгъэхэм къаушыхьатыгъ. Бзэр анахь тын лъапIэу хэтрэ цIыфкIи, лъэпкъкIи зэрэщытыр Iофтхьабзэм щыкIагъэтхъыгъ.