АР-м и ЛIышъхьэ ипресс-къулыкъу
Ощххэр зэлъыпытэу къызэрещхырэм, чIыгум бащэу шынэгъакIэ хэлъ зэрэхъугъэм къахэкIэу ошIэ-дэмышIэ IофхэмкIэ шапхъэр Адыгеим джыри щагъэфедэ. Псыхъохэу Пшызэрэ Лабэрэ лъэшэу зыкъызэраIэтыгъэм ыпкъ къикIыкIэ псыхъо нэпкъхэр къуаджэу Хьатикъуае щыгъэпытэгъэнхэм анаIэ тырагъэты. АР-м и ЛIышъхьэу КъумпIыл Мурат мы чIыпIэм щыIагъ, псыр къимыуным тегъэпсыхьэгъэ Iофтхьабзэхэр зэрэзэрахьэрэр зэригъэшIагъ, оперативнэ зэIукIэгъур зэрищагъ.
Ащ хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, Урысыем ошIэ-дэмышIэ IофхэмкIэ и Министерствэ АдыгеимкIэ и ГъэIорышIапIэ ипащэу Станислав Илющенкэр, тыкъэзыуцухьэрэ дунаим икъэухъумэнкIэ ыкIи чIыопс къэкIуапIэхэмкIэ ГъэIорышIапIэм ипащэу Сергей Колесниковыр, АР-м зыкъэухъумэжьынымкIэ ыкIи ошIэ-дэмышIэ IофхэмкIэ и Комитет итхьаматэу Андрей Колесник, Красногвардейскэ районым ипащэу Гъубжьэкъо Темур, Хьатикъое къоджэ псэупIэм ипащэу Жъыкъо Заур.
Къулыкъу гъэнэфагъэхэм япащэхэм зэIукIэгъум къызэрэщаIуагъэмкIэ, псыхъохэм псэу адэтыр узышIокIы мыхъущт шапхъэхэм джыри ашъхьэдэкIыгъэп. Ау мы охътэ благъэм ощххэр джыри къещхын фэдэу къызэратыгъэм епхыгъэу псыхъохэм язытет чэщи, мафи лъэплъэх. Щынагъом къыкIегъэчыгъэнымкIэ ищыкIэгъэ амалхэр специалистхэм зэрахьэх.
Республикэм ипащэ IофшIэгъу дэкIыгъо зеIэм, псыхъохэм, ахэм къапэIулъ чIыпIэхэм язытет зэригъэшIагъ. Псыр къимыунымкIэ амалэу зэрахьэхэрэм шIуагъэу къакIэкIощтым АР-м и ЛIышъхьэрэ специалистхэмрэ тегущыIагъэх. Джащ пае Адыгеим ошIэ-дэмышIэ IофхэмкIэ и Министерствэ, къэгъэнэжьакIохэм, администрацием, министерствэхэм, къулыкъухэм ялIыкIохэм нэпкъхэм ягъэпытэнкIэ IофшIэн гъэнэфагъэхэр къуаджэу Хьатикъуае щагъэцэкIагъэх: нэпкъ Iушъохэм пшахъо зэрылъ дзыохэр аIуагъэуагъэх, къуладжэхэр агъэкъэбзагъэх, нэпкъхэм чIыгумрэ пшахъомрэ атыримылъэсыкIыным тегъэпсыхьэгъэ Iофтхьабзэхэр зэрахьагъэх.
«Хьатикъуае псыр мызэу, мытIоу къызэрэщиугъэм къеушыхьаты псыхъохэм язытет ренэу гъунэ лъыфыгъэн, ащ тегъэпсыхьэгъэ Iофтхьабзэхэр игъом зехьэгъэнхэ зэрэфаер», — къыIуагъ КъумпIыл Мурат.Урысыем ошIэ-дэмышIэ IофхэмкIэ и Министерствэ АР-мкIэ и ГъэIорышIапIи, нэмыкI къулыкъухэм аIутхэми Iофышхо зэрэзэшIуахыгъэмкIэ зэрафэразэр республикэм ипащэ къыIуагъ. Iофтхьабзэу рахъухьэгъэ пстэури псынкIэу зэшIохыгъэным мэхьанэшхо зэриIэр Адыгеим и ЛIышъхьэ къыхигъэщыгъ, щынэгъопIэ чIыпIэхэм анахьэу анаIэ атырагъэтынэу, тхьамыкIагъо къэхъуным игумэкIыгъо ашъхьарэтыфэ Iофхэм язытет ренэу гъунэ лъафынэу пшъэрылъ афишIыгъ.
ТэхъутэмыкъоерайонымкIэОщхэу къещхыгъэхэм апкъ къикIэу Тэхъутэмыкъое районым ипсэупIэхэм ащыщхэм ячIылъэ унэхэм ящагухэм псы адэт хъугъэ. Ащ идэщын тегъэпсыхьэгъэ Iофыгъохэр зэрахьэх. Анахьэу лъэIухэр къыздикIыхэрэр Инэм, Яблоновскэр ыкIи АдыгеякIэр арых.Районым къызэрэщаIуагъэмкIэ, псым идэщын техникэ 22-рэ нэбгырэ 46-рэ дэлажьэх.Тэхъутэмыкъое район администрацием ипащэу Шъэо Аскэр къызэрэхигъэщыгъэмкIэ, мыхэм ахагъэхъоным джыри пылъых, ау республикэм зэрэпсаоу ыкIи Краснодар краим къызэращещхырэм, вакуумнэ машинэхэм къакIэупчIэрэр зэрэбэм апкъ къикIэу техникэ тедзэм икъещэлIэн къиныгъохэр къыпэкIых.
«Анахь шъхьаIэр — цIыфхэм ямылъку къызэтегъэнэгъэныр ары. Пстэуми апэ тшIыхэрэр унэм ихьанымкIэ ищынагъо зиIэ щагухэр арых. Коммунальнэ къулыкъухэм афэлъэкIыщтыр ашIэ игъом ищыкIагъэр зэшIохыгъэнымкIэ. ЧIыпIэхэм япащэхэм пшъэрылъ афэсшIыгъ лъэIоу щыIэ пстэури амыгъэцакIэу къэмыуцунхэу», — къыIопщыгъ Шъэо Аскэр.