Iэшъынэ А.
Тыгъуасэ зыкI къэралыгъо ушэтынхэм ятын аублагъ. Мыгъэ апэрэу ар мэкъуогъум и 1-м рагъэжьагъ. ТарихъымкIэ, литературэмкIэ ыкIи химиемкIэ нэбгырэ 807-мэ заушэтыгъ.
Мы мафэм Мыекъопэ лицееу N 19-м къыщызэIуахыгъэ пунктым тыщыIагъ. Мыщ тарихъымкIэ ыкIи литературэмкIэ ныбжьыкIэхэм зыщаушэтыгъ. ЗэкIэмкIи класс 15-мэ ныбжьыкIэхэр ачIэсыгъэх.Пунктым ипащэу Наталья Андреевам къызэрэтитIуагъэмкIэ, литературэмкIэ заушэтынэу нэбгырэ 34-рэ, тарихъыр атынэу нэбгырэ 156-рэ къекIолIагъ. Ахэм апае литературэмкIэ кабинети 3, тарихъымкIэ 12 агъэхьазырыгъ. Джащ фэдэу хэушъхьафыкIыгъэу апэрэ къатым тет зы кабинет агъэнэфагъ, зипсауныгъэкIэ илэгъухэм акIэмыхьэрэ нэбгыри 3-мэ тарихъымкIэ ащ зыщаушэтыгъ. Шапхъэм къызэрэдилъытэу сыхьатитфым къыкIоцI IофшIэнхэр агъэцэкIэнхэу ахэм фитыныгъэ яIагъ, ар сыхьатрэ ныкъорэкIэ нахьыб.— Ушэтыным изэхэщэн зэхъокIыныгъэ фэхъугъэп. Нэбгырэ пэпчъ пшъэрылъ гъэнэфагъэ тиI, пшъэдэкIыжь тэхьы. Классхэм ачIэт кIэлэегъаджэхэм адакIоу пэIудзыгъэ шIыкIэм тетэу лъыплъакIохэми япшъэрылъхэр агъэцакIэ. Хабзэ зэрэхъугъэу, кIэлэеджакIохэм яфитыныгъэхэр къэухъумэгъэнхэм тынаIэ лъэшэу тет, — еIо Наталья Андреевам.Апэрэ ушэтыныр республикэм зэрифэшъуашэу щыкIуагъ, чIыпIэ пэпчъ гъэсэныгъэ учреждениехэм ялIыкIохэм ягъусагъэх хэбзэ къулыкъушIэхэр, медицинэм иIофышIэхэр. Джащ фэдэу нэфынэм епхыгъэ ошIэ-дэмышIагъэ къэмыхъуным «Кубаньэнерго» зыфиIорэм иIофышIэхэри лъыплъагъэх.АР-м икъэралыгъо аттестационнэ къулыкъу къызэриIуагъэмкIэ, мы илъэсым литературэр нэбгырэ 82-мэ, тарихъыр — 355-мэ, химиер 370-мэ атынэу щытыгъ. ТарихъымкIэ ушэтыным IофшIэн 21-рэ къыдилъытэщтыгъ. Сыхьати 3-рэ такъикъ 30-рэ ахэр къашIыгъэх. Шапхъэу щыIэмкIэ тарихъымкIэ анахь макIэу балл 32-рэ къырахын фае. ЛитературэмкIэ IофшIэн 11 агъэцэкIэнэу щытыгъ. ЗэкIэмкIи сыхьати 3-рэ такъикъ 55-рэ уахътэу яIагъэр. Ушэтыныр зытыхэрэм орфографическэ словарь агъэфедэн алъэкIыгъ, ахэр ежь къыздамыхьэу ушэтыныр зыщыкIорэ еджапIэм къащыратыгъэх. Сыхьати 3-рэ такъикъ 50-м къыкIоцI химиер атыгъ, ащ IофшIэн 32-рэ къыдыхэлъытэгъагъ. Ушэтыныр атыгъэу агъэкIоным пае анахь макIэу балл 36-рэ къырахынэу щыт. Шапхъэхэм адиштэу Д. И. Менделеевым ихимическэ элементхэр зэрыт тхьапэхэр, нэмыкI хэушъхьафыкIыгъэ таблицэхэр агъэфедэнхэу амал яIагъ, джащ фэдэу программэ зимыIэ калькуляторхэри аIыгъынхэ фитэу шапхъэм къыделъытэ.Сыхьатыр 10-м конвертхэр къызэIуахыгъэх, IофшIэнхэр рагъэжьагъэх. Зэфэхьысыжьхэр охътабэ темышIэу къэнэфэщтых. Ар зыфэмытыгъэхэм е ушъхьагъу зэфэшъхьафхэм апкъ къикIыкIэ къемыкIолIэшъугъэхэм IэпэчIэгъэнэ мафэ яIэщт.Джы мэкъуогъум и 4-м урысыбзэмкIэ заушэтыщт, ар шIокI имыIэу зэкIэми атын фае. Ащ ыуж мэкъуогъум и 8-м — хьисапымкIэ, и 11-м обществознаниемкIэ ыкIи физикэмкIэ заушэтыщт. Мы мазэм и 15-м биологиер, географиер ыкIи инджылызыбзэр (тхэнымкIэ), и 18-м ыкIи и 19-м инджылызыбзэр (жэрыIокIэ) ыкIи информатикэр атыщтых.Мэкъуогъум и 22-м къыщегъэжьагъэу и 25-м нэс IэпэчIэгъэнэ мэфэщтых. Бэдзэогъум и 8-м ыкIи и 9-м шIоигъоныгъэ зиIэхэм ежь къыхахыгъэ зыушэтыныр кIатыкIыжьын алъэкIыщт.ДЕЛЭКЪО Анет.