Зы пшъэрылъ зэдыряIэу

Адыгеим и ЛIышъхьэу КъумпIыл Мурат шъолъыр конференциеу «Мой бизнес. Точка роста» зыфиIорэм икъызэIухын хэлэжьагъ.

Бизнесым, экспортым хэхъоныгъэ ягъэшIыгъэным, ныбжьыкIэ предпринимательствэм нахь кIэгъэгушIугъэнхэм, къэралыгъо IэпыIэгъу ятыгъэнымкIэ Iофтхьабзэу зэрахьащтхэм ар афэ­гъэхьыгъагъ ыкIи ащ къекIолIэгъагъэх бизнесым, хабзэм, хэхъоныгъэм иинститутхэм ялIыкIохэр. ЗэIукIэр аублэным ыпэкIэ республикэм и ЛIышъхьэ чIыпIэхэм къащыдагъэкIырэ продукцием икъэгъэлъэгъон нэIуасэ зыфишIыгъ. Творческэ индустрием хэхьэрэ пкъы­гъохэр, шхыныгъо зэфэшъхьафхэр, къэ­гъагъэхэр, мебелыр, пхъэм хэшIыкIыгъэ пкъыгъохэр, цуакъэхэр, дыгъэ зэфэ­шъхьафхэр ащ къырахьылIэгъагъэх.Нэужым конференцием икъызэIухын аублагъ. КъумпIыл Мурат бизнесым илIыкIохэм шIуфэс къарихыгъ ыкIи ­Адыгеим иэкономикэ ихэхъоныгъэ предпринимательхэм яIахьышхо зэрэхашIы­хьэрэр къыхигъэщыгъ. Бизнес цIыкIумрэ гурытымрэ республикэм къыщахьыжьырэ зэхэубытэгъэ продуктым ызыщанэ фэдиз атефэ, Iоф зышIэрэ ятIонэрэ цIыф пэпчъ предпринимательствэ цIыкIумрэ гурытымрэ алъэныкъокIэ мэлажьэ.

«Шъо IофшIэпIэ чIыпIэхэр зэхэшъощэх, бюджетым хахъо фэ­шъо­шIы, Адыгеим илъэныкъо шъхьа­IэхэмкIэ — мэкъумэщ къыдэгъэ­кIыжьыным, зекIоным, сатыум алъэныкъокIэ зыпкъитыныгъэ щы­Iэным шъудэлажьэ. А гъэхъэгъэ пстэуми шъуиIахьышхо ахэлъ. КъыдгурэIо бизнесым непэ пэрыо­хъуныгъабэ ыпэкIэ къызэрэкIырэр. Ау, къиныгъохэр щыIэхэми, предпринимательствэ цIыкIумрэ гурытымрэ къахиубытэхэрэм япчъагъэ республикэм нахьыбэ щэхъу. Шъуа­щыщыбэхэм а къиныгъохэр зэрэ­щагъэзыягъэхэм имызакъоу, текIоныгъэ гъэнэфагъэхэри ашIынхэ алъэкIыгъ. Тэ, хабзэм икъулыкъухэм, ренэу тишIуагъэ зэрэшъодгъэкIыщтым тыпылъ. Хэгъэгум и Правительствэ иIэпыIэгъу хэлъэу предпринимательствэ цIыкIумрэ гурытымрэ IэпыIэгъоу яттырэм зетэгъэушъомбгъу, пэрыохъуныгъэу къэуцухэрэми къакIетэгъэчы», — къыIуагъ АР-м и ЛIышъхьэ.Республикэм ипащэ къызэрэхигъэщыгъэмкIэ, Адыгеим иэкономикэ зыкъызэриIэтырэр зэкIэми Iофэу ашIэрэм икIэухэу плъытэн плъэкIыщт. Инвестициехэм алъэныкъокIэ Къыблэ федеральнэ шъолъырыр пштэмэ, апэрэ чIыпIищыр зыIыгъхэм илъэсэу икIыгъэм икIэуххэмкIэ республикэр ахэхьагъ. Инвестициехэр сомэ миллиард 80,4-рэ хъугъэх. НепэкIэ инвестиционнэ проект 20-мэ адэлажьэх, зэхэубытагъэу къэпIон хъумэ, сомэ миллиарди 100-м ар шIокIы. Къы­дэгъэкIыжьыным, мэкъу-мэщым, псэолъэ­шIыным хэхъоныгъэ зэрашIырэри къыхагъэщыгъ.«Къэралыгъо политикэм дедгъа­штэзэ, Урысыем и Президентэу Владимир Путиным пхырищырэ курсым тыдэмыхэу типшъэрылъхэр зэшIотэхых. Ащ пхырищырэ Iофыгъохэм къыдалъытэ чIыпIэхэм Iоф­шIэныр дэгъоу зэращызэхащэрэм дакIоу, цIыфхэм яфэныкъоныгъэхэми ренэу анаIэ атырагъэтыныр. Бизнесым зэкIэлъыкIокIэ гъэнэ­фагъэ иIэу IэпыIэгъу етэты, ащкIэ нахь къекIущт амалхэр, шIуагъэ нахь къызкIэкIощтхэр тэгъэфедэх», — къыIуагъ КъумпIыл Мурат.Лъэпкъ проектэу «ШIуагъэ къэзытырэ ыкIи зэнэкъокъур зылъэпсэ экономикэр» зыфиIорэм къыдилъытэрэ амалхэм шIогъэ гъэнэфагъэ къахьы, а проектым игъэцэкIэн кIуачIэ иIэ зыхъу­гъэм къыщыублагъэу республикэм предпринимательствэ цIыкIумрэ гурытымрэ нахь зыщаушъомбгъуным, хэхъоныгъэ ашIыным сомэ миллиард 1,6-рэ пэIуагъэхьагъ. КъыдэгъэкIыжьыным ылъэныкъокIэ проектхэр пхырызыщырэ бизнесым пае индустриальнэ паркэу Инэм фэгъэкIотэныгъэ зыхэлъ амалхэр рагъэ­гъотызэ зэхащагъ. Илъэсэу икIыгъэм резиденти 8 а лъэныкъомкIэ агъэфедагъ, сомэ миллиарди 8-м ехъу ахэм къыхалъхьагъ.Бизнесым IэпыIэгъу етыгъэнымкIэ амал зэфэшъхьафхэр агъэфедэх — зиIоф зыублэ зышIоигъохэм къащегъэжьагъэу Iоф зышIэрэ предприятиехэм хэхъоныгъэ зэрашIыщтым нэсыжьэу адеIэх. Ащ фэдэ амалхэу агъэфедэхэрэм ащыщых чIыфэ цIыкIухэр, хъызмэтым изехьанкIэ бизнес цIыкIум пылъхэм, социальнэ ыкIи предприниматель ныбжьыкIэхэм грантхэр ятыгъэнхэр, фэгъэкIотэныгъэ хэ­лъэу чIыфэхэр аIэкIэгъэхьэгъэнхэр, Iофым пэIуагъэхьэгъэ мылъкум изы Iахь афэлъэгъужьыгъэныр. Мы илъэсым къыдэгъэкIыжьыным хэхъоныгъэ егъэшIыгъэнымкIэ республикэм и Фондрэ предпринимательствэм IэпыIэгъу етыгъэнымкIэ Фондымрэ яахъщэ хэдгъэхъуагъ. Илъэсэу икIыгъэм къыщегъэжьагъэу къыдэгъэкIыжьыным ипредприятиехэм Урысыем къыщыдагъэкIырэ Iэмэ-псымэхэу ащэфыхэрэм апэIухьэрэ ахъщэм ызыныкъо фэдиз афалъэгъужьыщт. ХэтэрыкIхэм ыкIи цумпэ лъэпкъ зэфэшъхьафхэм адэлажьэхэрэм субсидиеу илъэс къэс сомэ миллиони 100 аIэкIагъахьэ.Ащ нэмыкIэу 2025-рэ илъэсым къыщегъэжьагъэу хэушъхьафыкIыгъэ дзэ операцием хэлажьэхэрэмрэ ахэм яунагъохэм арысхэмрэ яшIуагъэу арагъэ­кIырэм хагъэхъуагъ. Федеральнэ ыкIи партиеу «Единэ Россием» яамалхэр, ащ нэмыкIэу ежьхэм яамалхэр агъэ­фе­дэхэзэ, ветеранхэр предпринимательст­вэм хэщэгъэнхэм, яIоф къызэIуахыныр нахь псынкIэ афэшIыгъэным атегъэ­псыхьэгъэ Iофтхьабзэхэр республикэм ипащэхэм зэрахьэх.Мы зэIукIэм творческэ индустрием ылъэныкъокIэ Iофхэм язытети къы­щыуцугъэх. АР-м и ЛIышъхьэ агу къызэригъэкIыжьыгъэмкIэ, цIыфым игухэлъхэм, ащ амалэу иIэхэм тынаIэ зэратедгъэтыщтым ренэу теусэн фае. УФ-м и Президент пшъэрылъ къыгъэуцугъ 2030-рэ илъэсым ехъулIэу хэгъэгумкIэ творческэ индустрием къытырэр проценти 6-м нэгъэсыгъэнэу. Республикэр фэхьазыр фэгъэкIотэныгъэ зыхэлъ Iэпы­Iэгъур предпринимательхэм аритынэу ыкIи ягухэлъышIухэр пхыращынхэм пае шIыкIэ-амалыкIэхэр ыгъэунэфынхэу.Ипсалъэ къызэфихьысыжьзэ, Адыгеим и ЛIышъхьэ къыкIигъэтхъыгъ хабзэмрэ бизнесымрэ япшъэрылъ зэу зэрэщытыр: экономикэм хэхъоныгъэ егъэшIыгъэныр ыкIи цIыфхэм ящыIакIэ зыкъегъэIэты­гъэныр.«Тэ тызэдэгущыIэным, шъуишIоигъоныгъэхэр зэрэпхырышъущыщт амалхэм тягупшысэным, IэпыIэ­гъумкIэ шIыкIэу дгъэфедэхэрэм та­хэплъэжьыным, пэрыохъуны­гъэхэр щыдгъэзыенхэм тафэхьазыр. Рэхьатэу Iоф шъушIэным, хэхъо­ныгъэ шъушIыным, неущрэ мафэм шъуицыхьэ телъыным апае ищыкIагъэр зэкIэ тапэкIи тшIэщт. Республикэм ихэхъоныгъэ шъуиIахьышхо зэрэхэшъушIыхьэрэм пае сызэрэшъуфэразэр икIэухым къэс­Iонэу сыфай. Анахьэу етIани си­рэзэныгъэ гущыIэхэр зыфэзгъазэ сшIоигъор хэушъхьафыкIыгъэ дзэ операцием ишъолъыр щыIэ ти­дзэкIолIхэр, ахэм яунагъохэр ыкIи Херсон хэкум ирайонхэу тынаIэ зытетхэм ащыпсэухэрэр ары. ЗэIукIэм хэлэжьэгъэ пстэуми са­фэлъаIо сшIоигъу гупшысакIэхэр пхырыщыгъэнхэмкIэ шIуагъэ къэзытыщт зэпхыныгъэ-зэдэлэжьэ­ныгъэ азыфагу илъынэу. ТапэкIи а зэдэлэжьэныгъэм нахь зиушъомбгъунэу шъуфэсэIо», — къыIуагъ КъумпIыл Мурат.Официальнэ Iофтхьабзэм ыуж Iофыгъо гъэнэфагъэхэм атегъэпсыхьэгъэ чIыпIэхэм экспертхэр къащыгущыIагъэх ыкIи экономикэмкIэ анахь зигъо Iофыгъохэу къэуцугъэхэм яшIошIхэр къараIолIагъэх.АР-м и ЛIышъхьэ ипресс-къулыкъукъытырэ къэбархэмкIэТхьаркъохъо Сафыет.