А. Авагимян.
ЕджакIохэри, кIэлэегъаджэхэри, ны-тыхэри зэфэзыщэгъэхэ кIэлэцIыкIу телевидение Мыекъопэ районым ит гъэсэныгъэмкIэ и Гупчэ къыщызэIуахыгъ.
Мы илъэс еджэгъум иублэгъу къыщегъэжьагъэу Мыекъопэ районым гъэсэныгъэмкIэ и Гупчэу N 2-м медиапроектэу «Орленок в эфире» зыфиIорэр щагъэцакIэ. Ар зигукъэкIыр ыкIи иIофшIэн зэхэзыщэрэр пIуныгъэмкIэ еджапIэм ипащэ иупчIэжьэгъоу Александра Соколовар ары. ЕджапIэм ушэтынэу рихьыжьэгъэ Iофыр мэзэ заулэм къыкIоцI кIэлэцIыкIу телевидение шъыпкъэ хъугъэ. КIэлэеджакIо пэпчъ къэтынзещэм, къэбарытхым, операторым ыкIи тхыгъэеджэм ачIыпIэ зыригъэуцон елъэкIы.
Непэ проектым ныбжьыкIэ 50-м нахьыбэ хэлажьэ. ЕгъэжьапIэм я 2-рэ «А» классым исхэу «Орлята России» зыфиIорэ программэм хэлажьэхэрэм апае Iофтхьабзэр рахъухьэгъагъ. Ау апэрэ къэтынхэр къызагъэлъагъохэм ащ хэлажьэ зышIоигъохэм япчъагъэ псынкIэу хахъоу ыублагъ. НэмыкI классхэм ащеджэхэрэри купым къыхэхьагъэх ыкIи ублэпIэ классхэр зэкIэ къызэлъиубытыгъэх.— Проектым ишIуагъэкIэ цIыфхэм апашъхьэ сыкъыщыгущыIэным сытеукIытыхьажьырэп. Джы сымыгумэкIыхэу микрофоныр сIыгъэу кIэлэеджакIохэми еджапIэм ипащэхэми сакIэрыхьан сэлъэкIы. ЕтIани, тишъуашэхэмрэ «къэбарытх» ыIоу тыбгъэ хэдгъэнэрэ тамыгъэхэмрэ лъэшэу сыгу рехьых. ЦIыфхэр нэмыкIэу къысэплъых: кIэлэегъаджэхэр къысщэгушIукIых ыкIи ягуапэу гущыIэгъу къысфэхъух, кIэлэеджакIохэр кадрэм итынхэу фаех, — къеIуатэ я 2 «А» классым иеджакIоу Зэфэс Салбый.
Мы илъэс еджэгъум къыкIоцI журналист ныбжьыкIэхэм къэтын 20 агъэхьазырыгъ. Ары пэпчъ Iоф адэзышIагъэр кIэлэцIыкIу шъхьаф.— ШIоигъоныгъэ зиIэхэр зэкIэ проектым хэдгъэлэжьэнхэу тыфай. Ны-тыхэри, кIэлэцIыкIухэри ащ къыкIэлъэIух, — къыIуагъ Александра Соколовам.Ащ къызэрэхигъэщыгъэмкIэ, къызэрыкIоу, ау шъхьаIэу щыт гулъытэм проектыр къыхэкIыгъ: кIэлэеджакIохэм ящыIакIэ ежь ялэгъухэм къафаIуатэмэ нахь ашIогъэшIэгъон.— Ежь кIэлэцIыкIум къэбарыкIэхэр къыIуатэхэ хъумэ нахь цыхьэ фашIы ыкIи ашIогъэшIэгъон. Iофтхьабзэхэр къэдгъэлъэгъонхэ къодыер арэп тэ тимурадыгъэр, кIэлэцIыкIухэм яамалхэр къызщагъэлъэгъошъущт, къэбарым Iоф дашIэу зызщагъэсэшъущт ыкIи шъхьафитэу зыщыгущыIэшъущтхэ чIыпIэ дгъэпсыныр ары, — къыддэгощагъ проектыр зигукъэкIыр.Апэрэ IофшIэгъу мафэхэр сабыйхэмкIэ хьалэмэт дэдагъэх. Тырахыным, кадрэм итынхэм ахэр зыпищагъэх, сюжетхэри къаугупшысых. ЗэдэгущыIэгъухэр ашIынхэр, а пстэур зэхагъэуцожьыныр якIасэ хъугъэ. Ны-тыхэми проектым IэпыIэгъушхо къырагъэкIыгъ. ДэкIыгъохэм, техынхэм язэхэщэнкIэ, хъытыу нэкIубгъохэм ахэм яIофшIэн къыщытыгъэнымкIэ яшIогъэшхо къэкIо.— Хъурэ-шIэрэр къэтIотэрэ къодыеп, къэтэугупшысых. Адыгеим ичIыопс идэхагъэ, лъэпкъ шхыныгъохэр, культурэр, шэн-хабзэхэр тикъэтынхэм къащытэгъэлъагъох. Урысыем илъэпкъхэм языкIыныгъэ и Илъэс къыдыхэлъытагъэу тишъолъыр тынаIэ нахь тедгъэтыгъ, — къыIотагъ Александра Соколовам.ЕджапIэм икIэлэегъаджэхэри проектым чанэу къыхэлажьэх: къэбархэр атхынхэмкIэ, къэIуакIэр тэрэзэнымыкIэ ыкIи камерэм ыпашъхьэ мыщтэнхэмкIэ кIэлэцIыкIухэм Iоф адашIэ. Ны-тыхэмрэ еджапIэм икупрэ зэгъусэхэу студием игъэпсын дэлэжьагъэх ыкIи къэтынзещэхэмрэ къэбарытхыхэмрэ апае хэушъхьафыкIыгъэ тамыгъэ къаугупшысыгъ.Непэ «Орленок в эфире» зыфиIорэ проектыр еджэпIэ къэбархэр къэзыIотэрэ къодыеп, ар медиа чIыпIэ ин хъугъэ, творчествэр, хэкушIэныгъэр, хэкупсэныгъэр ыкIи кIэлэцIыкIу гукъэкIхэр щызэIокIэх.— ДэкIыгъо IофшIэнхэр анахьэу сыгу рехьых. Тирайон, тишэн-хабзэхэр зэтэгъашIэх, цIыф гъэшIэгъонхэм нэIуасэ тафэхъу. Ужурналистыныр кIочIэ лые уиIэным фэд. Тиреспубликэ адырэмэ зэратекIырэр джы зэкIэми афэсIотэн слъэкIыщт. Эфир пэпчъ зы хъугъэ-шIэгъэ гъэшIэгъон ыкIи сэ ар лъэшэу сыгу рехьы! — къыддэгощагъ я 2-рэ «А» классым иеджакIоу Кира Соколовар.ЕджапIэм исоциальнэ хъытыухэм анахьэу зыщяплъыхэрэм «Орленок в эфире» зыфиIорэм икъэтынхэр ащыщ. Журналист ныбжьыкIэхэр цIыфхэм агу рехьых. ГущыIэ дахэхэр къафатхых, якъэтыныкIэхэм къяжэх. Проектым Iоф зишIэрэм къыкIоцI видео кIэкIхэм гъогогъу мини 10-м нахьыбэрэ яплъыгъэх, нэбгырэ мини 2-м нахьыбэ агу рихьэу тамыгъэ къычIагъэуцуагъ, еплъыкIэ 700 фэдиз къатхыгъ.Ау зэфэхьысыжь анахь шъхьаIэу ащ дэлажьэхэрэм алъытэрэр пчъагъэхэр арэп, ежь кIэлэцIыкIухэм афэхъугъэ зэхъокIыныгъэхэр ары. КIэлэеджакIохэм яцыхьэ нахь зытелъыжь хъугъэ, тэрэзэу ягупшысэхэр къыраIотыкIышъух, купым щэлэжьэшъух, къэбарыр зэхафын ыкIи ежь ягукъэкIхэр къаIон алъэкIы. Арышъ «Орленок в эфире» зыфиIорэ къэтыныр кIэлэцIыкIу макъэхэмрэ творчествэмрэ ячIыналъэ хъугъэ.Арусяк Авагимян.