Обществэу «ШIэныгъэм» еджэпIэ музеймэ язэнэкъокъоу зэхищагъэм хэлэжьэнхэу хэгъэгум иеджапIэмэ лъэIу тхылъ мини 4,6-рэ къатыгъ. Проектыр УФ-м и Президентэу Владимир Путиным иунашъокIэ зэхащэ, УФ-м гъэсэныгъэмкIэ и Министерствэ яIэпыIэгъу.
Адыгеим ит гъэсэныгъэ организациемэ лъэIу тхылъ 29-рэ агъахьыгъ, нахьыбэр лъэныкъоу «Этнографическэ/краеведческэ экспозицие анахь дэгъу» ыкIи «Тарихъ экспозицие анахь дэгъу» зыфиIохэрэм афэгъэхьыгъ.Къуаджэу Нэшъукъуае игурыт еджапIэу N 8-м дзэ щытхъум илъэныкъоу «Тхьашъуегъэпсэу, тигупсэхэр, ТекIоныгъэм пай!» зыцIэр къагъэлъагъо. Экспозицием щызэхаугъоягъэх фронтым къыратхыкIыгъэ письмэхэр, документхэр, еджапIэр къэзыухыгъэ ветеранхэм ясурэтхэр, ящыгъынхэр. Шъхьафэу ащ къыщыгъэлъэгъуагъэх шъолъырым илIыхъужъхэр, ахэм яписьмэхэр. Джащ фэдэу экспозицием дзэкIолIмэ яунэе пкъыгъохэр, щыуанхэр, каскэхэр, шъуашэхэр къыщытыгъэх, ахэм алъыпыдзагъ QR-кодхэу хъарзынэщ материалхэр къэзыгъэнафэхэрэр, виртуальнэ экскурсиехэр ыкIи тематическэ квестхэр.Мыекъопэ районым ит гъэсэныгъэ гупчэу N6-м къэзэкъ унэр я XIX-рэ лIэшIэгъум икIэухым ыкIи я XX-рэ лIэшIэгъум икъежьэгъум зыфэдагъэр къыригъэлъэгъукIыгъ. Ащ игупчэр урыс хьакур ары. Ащ къешIэкIыгъагъэх иконэхэр, хэдыкIыгъэхэр, зыщышхэхэрэ Iанэр, бзылъфыгъэр зыщыхъэрэ чIыпIэр, зыщыгыкIэрэр.— ЕджэпIэ музеймэ язэнэкъокъу къыдыхэлъытагъэу къатыгъэ лъэIу тхылъ мини 4,6-м щыщэу процент 43-р Хэгъэгум иухъумакIохэм афэгъэхьыгъ, процент 23-р — этнографием ыкIи краеведением. Лъэшэу тигуапэу къыхэтэгъэщы прооектым музейхэм япащэхэри зэрэхэлажьэхэрэр. А зэкIэхэри зы пшъэрылъ зэзыпхыхэрэр: тихэгъэгу итарихъ ыкIи икультурнэ кIэн къэухъумэгъэнхэр ары, — къыIуагъ Урысые обществэу «ШIэныгъэм» игенеральнэ пащэ игуадзэу Кирилл Хвиль.ЕджэпIэ музеймэ непэрэ уахътэм диштэрэ цифрэ шапхъэхэр агъэфедэх: виртуальнэ экскурсиехэр, фондмэ яэлектроннэ каталогхэр, экспедициемэ яинтерактивнэ картэхэр ыкIи мультимедийнэ экспозициехэр.Зэнэкъокъум къыдыхэлъытагъэу музеймэ яIофышIэмэ Iофтхьэбзэ 966-рэ рагъэкIокIыгъах, ахэм нэбгырэ мин 20 ядэIугъ, яплъыгъ. Зэнэкъокъум щытекIуагъэхэр чъэпыогъум къэнэфэщтых. Ар Юнармиемрэ Апэрэхэм я Движениерэ зэхащэ. Джащ музейнэ практик анахь дэгъухэр къыщагъэлъэгъощтых.Джащ фэдэу зэнэкъокъум хэлажьэрэмэ онлайн-зэдэгущыIэгъухэр къяжэх, музеймэ яIофышIэхэм ыкIи хъарзынэщхэм ащылажьэхэрэм, къэралыгъо музеймэ япащэм аIукIэщтых.