Следственнэ гъэIорышIапIэр
Урысыем и Следственнэ комитет иследственнэ гъэIорышIапIэ загъэпсыгъэр илъэс 15 зэрэхъурэм фэгъэхьыгъэу Къыблэ федеральнэ шъолъырым иследственнэ гъэIорышIапIэхэм азыфагу Урысые спартакиадэ зэхащагъ. ЖъоныгъуакIэм и 27 — 28-м Мыекъуапэ испорт комплексэу «Ошъутенэм» ар щыкIуагъ. Зэнэкъокъум хэлэжьагъэх Астрахань, Волгоград ыкIи Ростов хэкухэм, Краснодар краим ыкIи Республикэу Къырым, къалэу Севастополь якомандэхэр.
Зэхахьэм къекIолIагъэх АР-м и ЛIышъхьэрэ иминистрэхэм я Кабинетрэ я Администрацие ипащэу Владимир Свеженец, АР-м и Къэралыгъо Совет – Хасэм и Тхьаматэ игуадзэу, УФ-м и ЛIыхъужъэу Цей Эдуард, Урысыем и Следственнэ комитет иследственнэ гъэIорышIапIэу АР-м щыIэм ипащэу Василий Лариныр, ащ игуадзэу Юрий Андреевыр, нэмыкIхэри.Пэублэм УФ-м и Следственнэ комитет итхьаматэу, юстицием игенералэу Александр Бастрыкиным ишIуфэс псалъэ къеджагъ Ю. Андреевыр.Зэнэкъокъум хэлажьэхэрэм, тренерхэм ыкIи хьакIэхэм закъыфигъазэзэ Ю. Андреевым къыIуагъ псауныгъэр гъэпытэгъэнымкIэ физическэ культурэм ыкIи спортым имэхьанэ зэрэиныр, ащ IофышIэхэр зэрэзэрипхыхэрэр ыкIи Урысыем и Следственнэ комитет икъулыкъушIэхэм къафагъэуцугъэ пшъэрылъхэм язэшIохынкIэ ишIогъэшхо къызэрыкIорэр.АР-м и ЛIышъхьэу КъумпIыл Мурат ыцIэкIэ Iофтхьабзэм къекIолIагъэхэм шIуфэс гущыIэхэмкIэ закъыфигъэзагъ В. Свеженец. КъулыкъушIэхэм псауныгъэ пытэ яIэу, спортым ылъэныкъокIэ ягъэхъагъэхэм ахагъэхъонэу къафэлъэIуагъ. Адыгэ чIыгум ягуапэу зэрэрагъэблэгъагъэхэр ыкIи спортсменхэм ар дахэкIэ агу къызэринэжьыщтым ицыхьэ зэрэтелъыр къыIуагъ.
ГъэIорышIапIэм ипащэу Василий Лариным къызэриIуагъэмкIэ, УФ-м и Следственнэ комитет икъулыкъушIэхэмкIэ мыщ фэдэ Iофтхьабзэхэм язэхэщэн мэхьанэшхо иI. Спорт зэнэкъокъухэм яшIуагъэкIэ яшэн апсыхьэ, зэныбджэгъуныгъэр агъэпытэ, яIэпэIэсэныгъэ хэхъо.МэфитIум къыкIоцI Урысыем и Следственнэ комитет иследственнэ гъэIорышIапIэ икъулыкъушIэхэр баскетболымкIэ, волейболымкIэ, футбол цIыкIумкIэ, атлетикэ псынкIэмкIэ, шахматхэмкIэ, теннисымкIэ ыкIи есынымкIэ зэнэкъокъугъэх. ЗэкIэ мыщ хэлэжьагъэхэм текIоныгъэ къызэрэдахыщтым фэбэнагъэх, физическэ ухьазырыныгъэ дэгъу къагъэлъэгъуагъ.Зэнэкъокъум илъэныкъо пэпчъ текIоныгъэ къыщыдэзыхыгъэхэр ыкIи къызтекIуагъэхэр щыI, арэу щытми, спортсменхэм агухэр зэIухыгъэхэу ыкIи зэкъотыныгъэ азыфагу илъэу пшъэрылъэу къафагъэуцугъэр агъэцэкIагъ.Зэнэкъокъум икIэуххэмкIэ апэрэ чIыпIэр къыдихыгъ Республикэу Къырымрэ къалэу Севастопольрэ яследственнэ гъэIорышIапIэ. ЯтIонэрэ чIыпIэр Краснодар краим, ящэнэрэр Ростов хэкум ащыIэ следственнэ гъэIорышIапIэхэм афагъэшъошагъэх.КъэIогъэн фае, спартакиадэм хэлэжьагъэхэм зэкIэми зэдырагъаштэу къаIуагъ командэ пэпчъ ухьазырыныгъэ дэгъу къызэригъэлъэгъуагъэр, спортсменхэм кIуачIэрэ щэIагъэрэ зэрахэлъыр.КIАРЭ Фатим.