Адыгэ Республикэм щыпсэурэ хъулъфыгъэу интернетыр къызфигъэфедэзэ терроризмэм ыкIи экстремизмэм зэрадыригъаштэрэр шъхьэихыгъэу къэзыIощтыгъэм ыкIи нэмыкIхэр ахэм ахищэнхэм ыуж итыгъэм иIоф хьыкумыр хэплъагъ.
Къыблэ шъолъыр дзэ хьыкумыр (къ.Ростов-на-Дону) къалэу Иркутскэ къикIыгъэу Мыекъуапэ щыпсэущтыгъэ хъулъфыгъэм уголовнэ Iофэу къыфызэIуахыгъэм хэплъагъ. Илъэс 21-рэ зыныбжь Михаил Кузнецовыр Урысыем и Уголовнэ кодекс ия 205.2-рэ статья ия 2-рэ Iахь ыкIи ия 280-рэ статья ия 2-рэ Iахь къадэлъытэгъэ бзэджэшIагъэхэр зэрихьагъэхэу агъэмысагъ.ЩынэгъончъэнымкIэ Федеральнэ къулыкъум АР-мкIэ и ГъэIорышIапIэ иIофышIэхэм зэрагъэунэфыгъэмкIэ, М.В. Кузнецовым быслъымэн диным диштэрэ еплъыкIэ иIэу, социальнэ хъытыоу «Вконтакте» зыфиIорэм нэкIубгъоу щыриIэм терроризмэм зэрэдыригъаштэрэм, экстремизмэм епхыгъэ Iофхэм ахэлэжьэнхэу цIыфхэм къызэряджэрэм афэгъэхьыгъэ тхыгъэхэр къыригъэхьагъэх. Ащ имызакъоу быслъымэн диным пылъ ныбжьыкIэхэм зэхащэгъэ купхэм ахэтэу анахь гъэдэIогъошIоу къыщыхъухэрэм афатхэщтыгъ, терроризмэм хищэнхэм фэшI ащ пылъ организациехэм къагъэхьазырыгъэ материалхэр ахэм афигъэхьыщтыгъэх.ЩынэгъончъэнымкIэ Федеральнэ къулыкъум АР-мкIэ и ГъэIорышIапIэ уголовнэ Iоф къызэIуихыгъ ыкIи зэхифыгъ.Къыблэ шъолъыр дзэ хьыкумым М.В. Кузнецовыр мысэу ылъытагъ, Урысыем и Уголовнэ кодекс ия 205.2-рэ статья ия 2-рэ Iахь ыкIи ия 280-рэ статья ия 2-рэ Iахь къызэращыдэлъытагъэм тетэу, илъэси 3 хьапс ыкIи ащ фэдиз пIалъэм интернетым ихъытыухэм япхыгъэ Iоф ышIэн фимытэу тырилъхьагъ.
ЩынэгъончъэнымкIэ Федеральнэкъулыкъум АР-мкIэ и ГъэIорышIапIэ ипресс-къулыкъу