ЦIыфхэр рагъэблэгъагъэх

Урысыем и Президентэу Владимир Путиным пшъэрылъ зэрэфишIыгъэм тетэу УФ-м и Президент Къыблэ федеральнэ шъолъырымкIэ и Полномочнэ лIыкIоу Владимир Устиновым пэIудзыгъэ шIыкIэм тетэу цIыфхэр ригъэблэгъагъэх. Шъолъы­рым щыпсэухэрэм ялъэIу тхылъ заулэхэм ахэплъагъэх, ахэм зыкIэ ащыщыгъ Теуцожь районымкIэ къуаджэу Нэшъукъуае щыщ ЯхъулIэ Римэу Адыгэ район сымэджэщэу К. М. Батмэным ыцIэкIэ щытым иучасткэ терапевт илъэIу тхылъ.ЦIыфхэм яегъэблэгъэн хэлэжьагъэх Адыгеим и ЛIышъхьэу КъумпIыл Мурат, федеральнэ инспектор шъхьаIэу Сергей Дрокиныр, АР-м иминистрэхэм я Кабинет и Тхьаматэ игуадзэу, финансхэмкIэ иминистрэу Виктор Орловыр, АР-м гъэ­сэныгъэмрэ шIэныгъэмрэкIэ иминистрэу Евгений Лебедевыр, Теуцожь районым ипащэу УдыкIэко Адам.ЛъэIу тхылъыр къэзыгъэхьыгъэр къыз­кIэлъэIурэр къуаджэу Нэшъукъуае дэт гурыт еджэпIэ закъоу кIэлэцIыкIуи 100-м ехъу зыщеджэрэм игъэцэкIэжьынкIэ яшIуагъэ къарагъэкIыныр ары. 1979-рэ илъэсым еджапIэр зычIэт унэр ашIы­гъагъ, непэ ащ игъэкIотыгъэ гъэцэкIэжьынхэр ищыкIагъэх.Республикэм и ЛIышъхьэ Полномочнэ лIыкIом риIуагъ а Iофыгъом зэрэхэплъа­гъэхэр. УФ-м гъэсэныгъэмкIэ и Министерствэ а лъэIум къыдыригъэштагъ. 2027-рэ илъэсым щылэ мазэм игъэ­кIотыгъэ гъэцэкIэжьынхэр аублэщтых. Лъэпкъ проектэу «Унагъом», шъолъыр къэралыгъо программэу «Гъэсэныгъэм хэхъоныгъэ егъэшIыгъэныр» зыфиIохэрэм ыкIи муниципальнэ программэм атегъэ­сыхьагъэу ямылъку зэхэлъэу IофшIэнхэр зэшIуахыщтых. Проектым сомэ миллиони 100-м ехъу пэIухьащт.Инженер коммуникациехэм язэблэ­хъун, джэхашъом, унашъхьэм ягъэцэ­кIэжьын, унэ гупэм изэтегъэпсыхьан, унэ кIоцIхэр икъоу гъэцэкIэжьыгъэнхэм а ахъщэр апэIуагъэхьащт. Джащ фэдэу Iэмэ-псымэхэмрэ мебелыкIэмрэ сомэ миллиони 8,5-рэ апэIуагъэхьащт. Шы­шъхьэ­Iум нэс IофшIэнхэр зэкIэ аухынхэу ыкIи 2027-рэ илъэсым Iоныгъом и 1-м къыщыублагъэу агъэкIэжьыгъэ еджа­пIэм иIофшIэн пидзэжьынэу мэгугъэх. ГъэцэкIэжьын IофшIэнхэр макIофэхэ нэс къуаджэу Нэшъукъуае игъунэгъу Джэ­джэхьаблэ дэт еджапIэм кIэлэеджакIохэр ащэхэзэ ашIыщт.КъумпIыл Мурат АР-м гъэсэныгъэмрэ шIэныгъэмрэкIэ и Министерствэ, джащ фэдэу Теуцожь районым ипащэхэм пшъэрылъ афишIыгъ дэгъоу ыкIи игъом проектыр гъэцэкIагъэ хъуным анаIэ тырагъэтынэу. Ащ нэмыкIэу агъэнэфагъэхэм ащыщ еджапIэм къыпэIулъ чIыпIэр зэтырагъэпсыхьаныр, чъыгхэмрэ къэгъа­гъэхэмрэ агъэтIысхьанхэр.«Проект IофшIэнхэр ыкIэм фэкIох. Субсидиехэр къызэратIупщыхэрэм лъыпытэу, 2027-рэ илъэсым щылэ мазэм къыщегъэжьагъэу, гъэцэкIэ­жьын IофшIэнхэм тафежьэщт ыкIи илъэсэу къихьащтым гъэмафэм ахэр зэкIэ гъэцэкIагъэ хъущтых. Гъэсэныгъэ зыщарагъэгъотырэ организациехэр гъэкIэжьы­гъэнхэм лъэшэу тынаIэ тетэгъэты. УФ-м и Президентэу Владимир Путиным ипшъэрылъхэр ыкIи пар­тиеу «Единэ Россием» инароднэ программэ къыдалъытэрэ Iофтхьабзэхэу еджапIэхэмрэ кIэлэцIыкIу Iыгъы­пIэхэмрэ ягъэцэкIэжьын епхыгъэхэр дэх имыIэу тэгъэцакIэх. Къалэхэм ямызакъоу, къуаджэхэми адэт псэуалъэ пэпчъ тэркIэ мэхьа­нэшхо иI. Джыри зэ къэсэIожьы, цIыфхэм ящыIакIэ нахьышIу шIыгъэным, хэти IэкIэлъ амалышIухэр нахь икъоу къызэIуихынхэм тынаIэ атетэгъэты», — къыIуагъ КъумпIыл Мурат.УФ-м и Президент и Полномочнэ лIыкIоу Владимир Устиновым къызэрэхигъэщыгъэмкIэ, еджапIэр игъом ыкIи дэгъоу агъэцэкIэжьын фае.Проектым игъэцэкIэн Адыгеим ипащэ ежь ышъхьэкIэ ынаIэ тет.Шъугу къэтэгъэкIыжьы: 2022-рэ илъэ­сым къыщегъэжьагъэу 2025-м нэс республикэм иеджэпIэ 28-мэ яунэ 33-мэ игъэкIотыгъэ гъэцэкIэжьынхэр арашIылIагъэх. 2026 – 2027-рэ илъэсхэм еджэпIэ 17-мэ яунэ 19-мэ игъэкIотыгъэ гъэцэкIэжьынхэр арашIылIэщтых.

АР-м и ЛIышъхьэ ипресс-­къу­лы­къу къытырэ къэбархэмкIэТхьаркъохъо Сафыет.