Адыгэ Республикэм ошIэ-дэмышIэ тхьамыкIагъохэр къэмыгъэхъугъэнхэмкIэ ыкIи ахэм къыздахьыхэрэр дэгъэзыжьыгъэнхэмкIэ, машIом зыкъемыгъэштэгъэнымкIэ и Комиссие изэхэсыгъо Адыгеим и Правительствэ зычIэт унэм щыкIуагъ. АР-м и ЛIышъхьэу КъумпIыл Мурат ар зэрищагъ.
Зэхэсыгъом хэлэжьагъэх Краснодар краим игубернатор игуадзэу Дмитрий Масловыр, Адыгэ Республикэм иминистрэхэм я Кабинет хэтхэр, щынэгъончъэнымкIэ Федеральнэ къулыкъум АР-мкIэ и ГъэIорышIапIэ, Адыгеим хэгъэгу кIоцI IофхэмкIэ и Министерствэ, Урысыем ошIэ-дэмышIэ IофхэмкIэ и Министерствэ АР-мкIэ и ГъэIорышIапIэ, Адыгэ гидрометгупчэм, Пшызэ псы гъэIорышIапIэм, Краснодар псыубытыпIэм, Адыгеямелиоводхозым, Кубаньмелиоводхозым, республикэм ирайонхэм япащэхэр.Зэхэсыгъом хэлэжьагъэхэр псыхъоу Пшызэ икъуладжэхэм адэт псым зыкъызэриIэтыгъэм, шапхъэхэм адиштэу Краснодар псыубытыпIэм псыр зэрэдагъэчъырэм япхыгъэу Красногвардейскэ, Тэхъутэмыкъое, Теуцожь районхэм яIофхэм язытет зыфэдэ хъугъэм тегущыIагъэх.«Зэлъыпытэу лъэшэу къызэрещхыгъэм, чIыгум шынэгъакIэр къызэребэкIырэм къахэкIэу жъоныгъуакIэм и 26-м къыщегъэжьагъэу ошIэ-дэмышIэ Iофым ишапхъэхэм Адыгеим щатехьагъэх. Синоптикхэм къызэратыгъэмкIэ, ом изытет джыри зыпкъитыныгъэ хэлъэп, ау псыхъохэу Пшызэрэ Лабэрэ псэу адэтыр нахь макIэ хъуным игугъапIэ щыI. Iофхэм язытет гъунэ лъыфыгъэным пае шапхъэхэм адиштэу псыр псыубытыпIэхэм адэгъэчъыгъэным мэхьанэшхо иI», — къыIуагъ КъумпIыл Мурат.Краснодар краим игубернатор игуадзэу Дмитрий Масловым зэрэхигъэунэфыкIыгъэмкIэ, краим ирайон заулэмэ ошIэ-дэмышIэ Iофым ишапхъэхэм щатехьагъэх. Краснодар псыубытыпIэм игидроузлэхэм мэкIэ-макIэзэ псэу адагъэчъырэм хагъахъо. Щынэгъо чIыпIэ 50-мэ псым идэгъэчъын нахь къызэрагъэхьылъэрэр зэхэсыгъом щыхагъэунэфыкIыгъ. Псыхъоу Пшызэ лъэш дэдэу къыдэкIоягъ. Синоптикхэм къызэратырэмкIэ, жъоныгъуакIэм и 28-м къыщегъэжьагъэу и 31-м нэс чIыпIэ-чIыпIэу ощхышхо къащещхын, хыуае щыIэн ылъэкIыщт.Красногвардейскэ, Тэхъутэмыкъое, Теуцожь районхэм япащэхэм мы IофымкIэ зэфэхьысыжьэу къашIыгъэхэм зэхэсыгъом щядэIугъэх. Ом изытет нахь дэй къэхъун зэрилъэкIыщтым зэрэфэхьазырхэр ахэм къаIуагъ. Республикэм и ЛIышъхьэ чIыпIэхэм, зыкъэухъумэжьынымкIэ ыкIи ошIэ-дэмышIэ IофхэмкIэ къулыкъухэм япащэхэм пшъэрылъ афишIыгъ псыхъохэм язытет зэрэлъыплъэхэрэр нахь агъэлъэшынэу, ищыкIагъэу зыхъурэм гидропостхэр нахьыбэ ашIынэу. Джащ фэдэу псыр къыдэмыкIыным фытегъэпсыхьэгъэ псэуалъэхэм яшIынкIэ къызфагъэфедэрэ дзыохэмрэ пкъыгъохэмрэ щыIэхэмэ, техникэмрэ насос оборудованиемрэ ошIэ-дэмышIэ Iофхэм зэрафэхьазырхэр зэрагъэшIэнэу, цIыфхэм макъэ зэрарагъэIурэ системэхэм Iоф зэрашIэрэр ауплъэкIунэу пшъэрылъ афишIыгъ.АР-м и ЛIышъхьэ ипресс-къулыкъу къытырэ къэбархэмкIэЛIышэ Саныет.