Н. Алексеевам ихъарзынэщ
ТхылъеджапIэхэм я Мафэ къыдыхэлъытагъэу, ищыIэныгъэ щыщ илъэс 20-р мыщ епхыгъэ сэнэхьатым фэзгъэхьыгъэ Наталья Алексеевам «Адыгэ макъэр» IукIагъ. Ащ изы IофшIэгъу мафэ зыщигъэгъозагъ.
Илъэс пчъагъэхэм Наталье тхылъеджэхэм Iофтхьэбзэ пчъагъэ афызэхищагъ. ЩыIэныгъэр зэрэзэхъокIырэм диштэу шIыкIакIэхэр къыхихэзэ, иIоф нахь гъэшIэгъонэу зэригъэцэкIэщтым пылъ. СыдигъокIи апэ ригъэшъырэр тхылъеджапIэм къычIэхьэрэ нэбгырэ пэпчъ нэгушIоу пэгъокIыныр, зэрифэшъуашэу ынаIэ тыригъэтыныр, тхылъэу къызфэкIуагъэр ригъэгъотыныр, ащ фэгъэхьыгъэ къэбарыр къыфиIотэныр ары.— СиIофшIэнкIэ анахь шъхьаIэу слъытэрэр тхылъеджэу къытэуалIэрэм ифэIо-фашIэ зэрифэшъуашэу фэзгъэцэкIэныр ары. Илъэс пчъагъэ хъугъэу къычIахьэхэрэр тиIэх, ахэм агу рихьырэр сэшIэшъ, къякIущтыр зэу къафыхэсэхы. Джащ фэдэу тхылъыкIэу къычIэхьагъэхэм нэIуасэ афэсэшIых, — къеIуатэ Наталье.ИIофшIэн кIэлэцIыкIу къэлэ тхылъеджапIэм щыригъэжьэгъагъ. Охътэ гъэнэфагъэ тешIагъэу тигущыIэгъу ищыIэныгъэ едзыгъуакIэ хэхъухьагъ — Гавердовскэ къоджэ тхылъеджапIэм агъэкIуагъ. ИIэпэIэсэныгъэ ащ щыхигъэхъуагъ. «Библиотекарь» сэнэхьатыр Мыекъопэ кIэлэегъэджэ колледжым щызэригъэгъотыгъ. Ащ къыщымыуцоу семинархэм, практикумхэм, вебинархэм ахэлажьэ, тхылъеджэпIэ IофшIакIэм зэхъокIыныгъэу фэхъухэрэм защегъэгъуазэ.— СиIофшIэн фэгъэхьыгъэмэ сычан, шIэныгъакIэ зэзгъэгъотыным сыдэшъхьахырэп, седжэ зэпытыным сыфэхьазыр. ТхылъеджэпIэ IофшIэныр зычIыпIэ итэп, арышъ, укъэмыуцуным, уахътэм удиштэу хэхъоныгъэ пшIыным мэхьанэ иI, — хигъэунэфыкIыгъ Наталье.Непэ Гавердовскэ тхылъеджапIэр ныбжь зэфэшъхьаф зиIэ тхылъеджэхэм адэлажьэ. МэфэкI Iофтхьабзэхэр щыхагъэунэфыкIых, къэгъэлъэгъонхэр, зэдэгущыIэгъухэр, анкетированиехэр щызэхащэх, къакIохэрэм агу рихьырэр зэрагъашIэ. Анахьэу Iофтхьабзэхэм къахагъэлажьэхэрэр кIэлэеджакIохэмрэ кIэлэцIыкIу IыгъыпIэм чIэсхэмрэ. АщкIэ тхылъеджапIэр Iэрыфэгъоу щыт — культурэм и Унэу «Ошъадэм» ар хэт, гъэсэныгъэм иучреждениехэр пэгъунэгъух.— ТиIофшIэн зэхатщэ зыхъукIэ анахь цIыкIухэм апае театральнэ къэгъэлъэгъонхэр тэгъэфедэх. Ахэм ахэт лIыхъужъхэр ашIогъэшIэгъонхэу тхылъхэр аштэх, яджэнхэу яунэ ахьы. Гурыт еджапIэхэм ащеджэхэрэм япрограммэ елъытыгъэу ящыкIэгъэщт литературэр аIэкIэтэгъахьэ. Джащ тетэу тхылъым фэтэщэх, — къыIуагъ тигущыIэгъу.Тызыхэт лъэхъаным электроннэ шъуашэм илъ литературэр ныбжьыкIэхэм нахь агу рехьы. Зыныбжь хэкIотагъэхэри бэу къяуалIэх, ахэм тхылъхэм яджэнхэр якIас.— Непэ титхылъеджапIэ тхылъ мини 9 чIэлъ, икIыгъэ мазэм а пчъагъэм джыри 90-рэ къыхэхъуагъ. ТынаIэ зытедгъэтырэр тхылъым имэхьанэ зэрэиныр къытэуалIэхэрэм агурыдгъэIоныр ары, — къыхигъэщыгъ Н. Алексеевам.Илъэс зэкIэлъыкIохэм Гавердовскэ тхылъеджапIэр зэнэкъокъу зэфэшъхьафхэм ахэлэжьагъ, рэзэныгъэ тхылъхэр къыфагъэшъошагъэх, игугъу дэгъукIэ ашIы. Непэ тхылъеджапIэр къэбарлъыгъэIэс, гъэсэныгъэ, культурнэ гупчэу щыт, лъэныкъо зэфэшъхьафхэм афытегъэпсыхьагъэу мэлажьэ.IЭШЪЫНЭ Сусан.