ОшIэ-дэмышIэ Iофым ишапхъэхэм Адыгеир атехьагъ

Мы къэбарыр АР-м и Къэралыгъо Совет — Хасэм изичэзыу я LVII-рэ зэхэсыгъо тыгъуасэ къыщаIуагъ.

Ащ хэлэжьагъэх АР-м и ЛIышъхьэу КъумпIыл Мурат, министрэхэм я Кабинет хэтхэр, федеральнэ ыкIи шъолъыр къулыкъу зэфэшъхьафхэм ялIыкIохэр, нэмыкIхэр. Iофтхьабзэр зэрищагъ Парламентым и Тхьаматэу Владимир Нарожнэм.Агъэнэфагъэхэм атегущыIэнхэр рамыгъажьэзэ, жъоныгъуакIэм и 22-м Луганскэ народнэ республикэм ипсэупIэу Старобельскэ дэт колледжым иобщежитие Украинэм иуIэшыгъэ кIуа­чIэхэр къызеохэм хэкIодагъэхэм зы такъикъы­рэ афэшъыгъуагъэх.ЗэкIэмкIи Iофыгъо 40 зыхэплъагъэхэр. АпэрапшIэу Дзыбэ Саидэ респуб­ликэм ихьыкумышIхэм яквалификационнэ коллегие хэгъэхьэгъэным депутатхэр тегущыIагъэх. Адыгэ къэралыгъо универ­ситетым «ПравэмкIэ иинститут» июридическэ факультет теориемкIэ, къэралыгъо тарихъымкIэ, правэмкIэ, конституционнэ гъэпсынымкIэ ыкIи политологиемкIэ икафедрэ идоцентэу юриспруденцием опытышхо щызиIэм апэрэп мыщ фэдэ пшъэрылъ зэрэфашIырэр. АР-м и Къэралыгъо Совет — Хасэм и Конституционнэ Совет хэтхэми ар ащыщ. Джыри коллегием хэгъэхьэгъэжьыгъэным дырагъэштагъ.

Нэужым шъолъыр хэбзэгъэуцугъи 7 апэрэ ыкIи ятIонэрэ еджэгъухэмкIэ аштагъ. Ахэр муниципальнэ къулыкъум, таксихэм цIыфхэмрэ ахэм ябагажрэ зэрэзэращэхэрэм игъэIорышIэн, Хэгъэгу зэошхом илъэхъан советскэ цIыфхэм ягеноцид хэкIодагъэхэм яшIэжь мыкIодыжьыным ылъэныкъокIэ шъолъырым икъэралыгъо хэбзэ къулыкъухэм пшъэ­рылъэу яIэхэм, нэмыкIхэм афытегъэ­псыхьэгъэ хэбзэгъэуцугъэхэм зэхъокIыныгъэхэр афэшIыгъэнхэм афэгъэхьы­гъэх.УФ-м и Президент сабый зэрыс унагъохэм социальнэ IэпыIэгъу ятыгъэным фытегъэ­псыхьэгъэ пшъэрылъэу къышIыгъэм ипхырыщын къыщыдэлъытагъ студент унагъом сабый къихъухьагъэмэ, зэтыгъо ахъщэ тын фэгъэкIогъэным фэгъэхьыгъэ хэбзэгъэ­уцугъэр.Зэшъхьэгъусэхэр сэнэхьат зыщарагъэгъотырэ еджапIэу республикэм итхэм ащыщ чIэсхэу, тIумэ язи ыныбжь илъэс 35-м шIомыкIыгъэу кIэлэцIыкIу къафэхъу­гъэмэ, сомэ мин 200 ятыгъэнэу ащ къыщеIо. 2024-рэ илъэсым итыгъэгъазэ и 28-м аштэгъэ республикэ хэбзэгъэуцугъэу N 425-м къызэрэщыдэлъытагъэм тетэу бзылъфыгъэр сабый ежэу учетым зыхэуцом зэтыгъо ахъщэ тын къыратыгъэми, нэмыкI IэпыIэгъу къыфакIоми, ащ пае къэмынэу мы пособием хэфэщт. Ары пакIошъ, тIолъфэныкъо е нахьыбэ къыфэхъугъэмэ, ащ пэпчъ къыратыщт.2026-рэ илъэсымкIэ мы хэбзэгъэуцугъэм къыхиубытэрэ студент унагъоу республикэм исыр 33-рэ мэхъу.Джащ фэдэу АР-м и Къэралыгъо Совет — Хасэр Республикэу Беларусь и Брестскэ хэку идепутатхэм я Советрэ Къэбэртэе-Бэлъкъар Республикэм и Парламентрэ зэрадэлэжьэщтым фэгъэ­хьыгъэ зэзэгъыныгъэхэм мы зэхэсы­гъом щытегущыIагъэх, депутатхэм ахэм адырагъэштагъ.Пстэуми ауж КъумпIыл Мурат гущыIэр зештэм, аужырэ уахътэм ощххэр зэрэзэпымыухэрэм, мэкъумэщ чIыгухэм псыр бэу ахэты зэрэхъугъэм ыпкъ къикIкIэ ошIэ-дэмышIэ режимым республикэр зэрэтехьагъэр къыIуагъ. ЛIышъхьэм ипшъэрылъкIэ АР-м мэкъумэщ хъызмэтымкIэ иминистрэу Къуанэ Анзаур ом изытет гъэтхасэхэм япхъын иягъэу ригъэкIыгъэм кIэкIэу къыщигъэгъоза­гъэх.Ащ къызэриIуагъэмкIэ, ощх зэпымыужьым ыпкъ къикIкIэ чIыгулэжьхэм техникэр хьасэхэм ахагъэхьан алъэкIырэп. Гъэтхасэхэм япроцент 56-р ары ныIэп апхъышъугъэр. БлэкIыгъэ илъэсхэм мыщ фэдэ уахътэм процент 90-м ехъур хэлъхьэгъахэщтыгъ. Iофхэр нахь зыщыдэйхэр Теуцожь ыкIи Тэхъутэмыкъое районхэр ары. Ахэм гъэтхэсэ лэжьыгъэ­хэм апае агъэнэфэгъагъэм проценти 6 нахьыбэ хагъэкIышъугъэп.Ощххэр зэпыухэу, хьасэхэр къэгъу­шъыхэмэ, лэжьыгъэм ихэлъхьан па­дзэжьыным фэхьазырых, ау мэфэ благъэхэм ащ фэдэ гугъапIэ яIэп. Синоптикхэм къызэратырэмкIэ, къихьащт мэкъуогъу мазэм и 6-м нэс джыри къещхыщт.— ХъызмэтшIапIэхэм ащыщхэм халъхьэнэу агъэнэфэгъагъэр зэблахъун, техникэр ащ тырагъэ­псыхьажьын фаеу хъущт. Гъэтхасэхэм япхъын ипIалъэ икIыгъэ нахь мышIэми, ор зэтеуцожьэу, амал щыIэ хъумэ, ар лъагъэкIотэн фаеу сэлъытэ. Псыхъохэу Пшызэ, Лабэ ыкIи Шъхьэгуащэ псэу адэтым зыщыхэхъогъэ къуаджэу Хьатикъуае иIофхэм язытет тылъэплъэ. Техникэр едгъэолIагъ, специалистхэр ащ щыIэх, Iофыр нахь дэй хъумэ ищыкIагъэр охътэ кIэкIым зэшIохыгъэным тыфэхьазыр, — къы­Iуагъ КъумпIыл Мурат.Шъолъыр Парламентым ипащэ ащ джэуап къыритыжьзэ, гъэцэкIэкIо хэбзэ къулыкъухэм Iофэу зэшIуахырэ пстэуми ахэлэжьэнхэм депутатхэр зэрэфэхьазыр­хэм къыкIигъэтхъыгъ.Адыгеим и ЛIышъхьэ хэушъхьафыкIыгъэ дзэ операцием хэлажьэхэрэмрэ ахэм яунагъохэмрэ яIофхэри Iэпэдэлэл мыхъунхэм анаIэ атетыныр пшъэрылъ шъхьаIэхэм зэращыщым анаIэ тыраригъэдзагъ.— Урысыем и Президентэу Владимир Путиным тиIофшIэнкIэ апшъэ тшIын фаер къыгъэнэфагъ, ар хэушъхьафыкIыгъэ дзэ операцием епхыгъ. Къэралыгъо IэпыIэгъоу хэбзэ къулыкъухэм, хэбзэихъу­хьэхэм ыкIи «Хэгъэгум иухъумакIохэр» зыфиIорэ Фондым аIэ илъыр зэкIэ Iоф­тхьабзэм хэлажьэхэрэм ыкIи ахэм яунагъохэм аIэкIэхьан фае, — къыкIигъэтхъыгъ КъумпIыл Мурат.Адыгеим и ЛIышъхьэ къызэрэхигъэщыгъэмкIэ, стратегическэ пшъэрылъэу шъолъырым ыпашъхьэ итхэм къащыдэлъытагъэу, лъэпкъ проектхэр, къэралыгъо программэхэр, партиеу «Единэ Россиер» кIэщакIо зыфэхъугъэхэр, промышленнэ паркэу «Инэмрэ» гъэпсыфыпIэу «Лэгъонакъэрэ» япроектхэр республикэм щыпхыращых.ХЪУТ Нэфсэт.