Лъэпшъыкъо Ф.
«Курсантский рубеж» зыфиIорэ зэнэкъокъу Мыекъуапэ щыкIуагъ. МКъТУ-м и Дзэ егъэджэн Гупчэ щеджэрэ кIэлакIэмэ ясэнаущыгъэ ащ къыщагъэлъэгъуагъ.
Гупчэм ипащэу Нурлан Самадьяновым Iофтхьабзэр къызэIуихыгъ. Мыекъопэ къэралыгъо технологическэ университетым щеджэрэ курсант 200-у зэнэкъокъум хэлажьэхэрэм зэрифэшъуашэу зыкъагъэлъэгъонэу ар къафэлъэIуагъ.— Мыщ фэдэ ушэтынхэр тикурсантхэм илъэс къэс афызэхэтэщэ. Илъэс еджэгъум зэрагъэшIагъэр тэуплъэкIу. КъыкIэлъыкIорэ курсым ихьанхэм фэшI, шапхъэхэр зэкIэ агъэцэкIэнхэ фае, — къыIуагъ Нурлан Самадьяновым.«Курсантский рубеж» зыфиIорэ чемпионатым изы едзыгъоу автоматым изэхэхынрэ изэхэлъхьанрэ закъыщызыгъэлъэгъуагъэхэм ащыщ курсантэу Глеб Вихровыр. Ар МКъТУ-м и Дзэ егъэджэн Гупчэ чIэс. Охътэ кIэкIым Iашэр зэхэпхыным ыкIи зэхаплъхьажьыным изэнэкъокъу ащ зыщиушэтыгъ.— Нахьыбэрэ Iашэр зэхэпхымэ ыкIи зэхэплъхьажьымэ, ащ нахь фэкъулае ухъущт. Сыздеджэрэ кIалэхэм сянэкъокъуныр сшIогъэшIэгъоныгъ, — къыIуагъ Глеб Вихровым.ЩэрыонымкIэ гъэцэкIэнхэр зэрафэукIочIырэм зэхэщакIохэр лъыплъагъэх. Апэрэ купым икъэгъэлъэгъонхэм судьям зэфэхьысыжьхэр афишIыгъ ыкIи анахьэу анаIэ зытырагъэтын фэе лъэныкъохэр къыгъэнэфагъэх.— Курсант ныбжьыкIэхэр чанэу гъэсэгъэнхэмкIэ мы зэнэкъокъум мэхьанэшхо иI. ЩэрыонымкIэ гъэцэкIэнхэр псынкIэхэп, нэм дэгъоу ылъэгъун, пIэ мыкIэзэзэу узэщэрыорэм тебгъэпсыхьан фае. АщкIэ зызыушэтыгъэ кIалэхэм чанэу зыкъагъэлъэгъуагъ, — къыIуагъ МКъТУ-м икIэлэегъаджэу, щэрыонымкIэ зэнэкъокъум исудья шъхьаIэу Татьяна Манченкэм.Зэнэкъокъум къыдыхэлъытэгъэ тест уплъэкIуныр Iофтхьабзэм икIэухыгъ. Охътэ гъэнэфагъэкIэ ар агъэцэкIагъ.— Практикэ ушэтынхэм анэмыкIэу, упчIэхэм яджэуапхэри курсантхэм къаратыжьыгъ. Ахэм шIэныгъэ куухэр зэраIэкIэлъыр къагъэшъыпкъэжьыгъ. Аужырэ уцугъом изэфэхьысыжьхэм ялъытыгъэу текIоныгъэ къыдэзыхыгъэхэр къэнэфагъэх, — къыIуагъ МКъТУ-м къыщызэIуахыгъэ «Точка кипения» зыфиIорэм ипрограммнэ пащэу Светлана Новиковам.Зэнэкъокъум хагъэунэфыкIрэ чIыпIэхэр къыщызыхьыгъэхэм щытхъу тхылъхэр, медальхэр афагъэшъошагъэх, кубокхэр аратыжьыгъэх. Мы Iофтхьабзэр илъэс къэс зэхащэнэу рахъухьагъ.Лъэпшъыкъо Фатим.