Анцокъо И.
Урысыем IофшIэнымкIэ и ЛIыхъужъэу, УФ-м и Общественнэ палатэ хэтэу, Адыгеим, Къэбэртэе-Бэлъкъарым, Къэрэщэе-Щэрджэсым ыкIи Абхъазым ялъэпкъ тхакIоу МэщбэшIэ Исхьакъ ыныбжь илъэс 96-рэ хъугъэ. Зипчъэ ренэу зэIухыгъэ нахьыжъым дэжь теблэгъагъ ыкIи имэфэкIыкIэ тыфэгушIуагъ.
Пчъашъхьэм къыщедгъэжьагъэу тхэкIошхом шIуфэс гущыIэхэр етэIох. Зэригуапэр къыхэщэу ежьыри къытфэтэджы. ЫкIыб лIэшIэгъу фэдиз тарихъыр зэрэдэтым тэркIэ ицIыфышхуагъэ хегъахъо, ежьым ыныбжь емытынэу, мэшэлахьэу, дахэу тапашъхьэ ит.Пстэуми апэу АР-м и ЛIышъхьэу КъумпIыл Мурат пчэдыжьым къызэрэфытеуагъэр, къызэрэфэгушIуагъэр Исхьакъ къыIуагъ. ТхэкIошхом зэрэфэгушIорэр АР-м и ЛIышъхьэ ихъытыу нэкIубгъохэми тыгъуасэ къаригъэхьагъ:«Исхьакъ — Адыгеир зэрыгушхоу, зитворчествэ республикэм имызакъоу, зэрэ Урысыеуи икультурнэ кIэн хэпчын умылъэкIыщт цIыф. ТхакIом ыIапэ къычIэкIыгъэхэр лIэужхэм азыфагукIэ лъэмыджых, уичIыгу шIу плъэгъун зэрэфаем ищысэх, акъылыгъэ ин къызпкъырыкIых. Адыгэ лъэпкъым итарихъ ыкIи идунэететыкIэ ахэм къызэIуахы, Урысыем щыпсэурэ лъэпкъхэм язэпхыныгъэ агъэпытэ. ТэркIэ МэщбэшIэ Исхьакъ акъылышIуагъэмрэ чаныгъэмрэ ящыс.Ипсауныгъэ пытэнэу, джыри илъэсыбэрэ ыкIуачIэ изэу республикэми, къэралыгъоми афэлэжьэнэу, иIахьыл-гупсэхэм адэтхъэнэу МэщбэшIэ Исхьакъ сыфэлъаIо!»Джащ фэдэу Къэбэртэе-Бэлъкъар Республикэм и ЛIышъхьэу КIокIо Казбеки шIуфэс телеграммэр лъэпкъ тхакIом къыфигъахьыгъ.Исхьакъ хъурэ-шIэрэмэ сыдигъокIи ащыгъуаз. Пстэумэ апэу гъэзетым иредактор шъхьаIэу МэщлIэкъо Саидэ Москва къызэрикIыжьыгъэм, зыхэлэжьэгъэ Iофтхьабзэр зэрэрекIокIыгъэм къыкIэупчIагъ. Адыгэ культурэм и Мафэу къэралыгъом икъэлэ шъхьаIэ щыкIуагъэм Адыгеим, Къэбэртэе-Бэлъкъарым, Къэрэщэе-Щэрджэсым адыгабзэкIэ къащадэкIырэ лъэпкъ гъэзетхэм ыкIи кIэлэцIыкIу журналхэм яредактор шъхьаIэхэр къырагъэблагъэхи, непэ ахэм Iоф зэрашIэрэм, гумэкIыгъэу яIэхэм зэращытегущыIагъэхэр МэщлIэкъо Саидэ кIэкIэу тхэкIошхом къыфиIотагъ. ЗэIукIэгъур зэрэкIорэр шеф-редакторэу Анцокъо Иринэ телефонкIэ тырихыщтыгъ. «Адыгэ макъэм» ихъытыу нэкIубгъо МэщбашIэм тызэрэIукIагъэр ащ лъыпытэу къыригъэуцуагъ.Рамазан Абдулатиповым мыгъэ ыныбжь илъэс 80 зэрэхъурэр, Дагъыстан ит къуаджэу къызщыхъугъэм ар щигъэмэфэкIынэу зызэригъэхьазырырэр, ежь МэщбэшIэ Исхьакъ ащ къызэрэригъэблэгъагъэр тхакIом къытфиIотагъ. Джащ фэдэу мэкъуогъум и 4-м Абдулатиповым зэхищэрэ онлайн-зэхэсыгъом фэгъэхьыгъэ тхылъхэри Исхьакъ къыфигъэхьыгъэх. Ахэр къыIуатэ пэтзэ ителефон зэпымыоу къытео, нэбгырабэ имэфэкIкIэ къыфэгушIо.Лъэпкъым итарихъ, инепэрэ мафэ, ишэн-хабзэхэм, икультурэ афэгъэхьыгъэу том 27-рэ хъоу адыгабзэкIи урысыбзэкIи къыдэзгъэкIыгъэ тхэкIошхом иIофшIэгъу мафэ пэпчъ къэлэмкIэ регъажьэ. Ироманхэр, ипрозэ, иусэхэр къыздэхьэгъэ тхылъхэр япчъагъэкIэ 100 фэдиз мэхъух. Ахэр дунаим тет лъэпкъхэм ащыщхэм абзэкIэ зэрадзэкIыгъэх. Адыгэ литературэр къэзгъэбаихэрэм ащыщ МэщбашIэм итхыгъэхэу «Адыгэхэр», «Мыжъошъхьал», «Хъан-Джэрый», «Айщэт», нэмыкIхэри. 2025 — 2026-рэ илъэсхэм язакъоми, романитIу бзитIукIэ къыдигъэкIыгъ — «Ошъуанэр», «Лыу», ящэнэрэр — «Неп.Тыгъуас. Неущ» къеухы.АР-м и Гимн игущыIэхэр, КъурIаным адыгабзэкIэ изэдзэкIын, апэрэ лъэпкъ оперэм игущыIэхэр — лъэпкъ культурэм идышъэ кIэн МэщбэшIэ Исхьакъ ихьатыркIэ хэхьагъэх. Лъэпкъ тарихъым, культурэм, шэн-хабзэхэм ямызакъоу, лъэпкъым зэрэщытэу иухъумакIу, упчIэжьэгъу ашIырэ нахьыжъ. Непэ щыIэхэри, тапэкIэ къэхъущт лIэужхэри итхыгъэхэм арыгъозэщтых, ныдэлъфыбзэр лъызгъэкIуатэрэмэ, щыIэныгъэ къезытырэмэ, зыгъэлажьэрэмэ ащыщ.РСФСР-м и Къэралыгъо шIухьафтынэу М.Горькэм ыцIэ зыхьырэр, Дунэе премиеу М.Шолоховым ыцIэкIэ щытыр, АР-м и Къэралыгъо шIухьафтын, нэмыкI къэралыгъо тынхэри итворчествэкIэ къылэжьыгъэх, зэкъош шъолъырхэм ялъэпкъ тхэкIошхо хэгъэгум, республикэм яобщественнэ ыкIи яполитическэ щыIакIэ сыдыгъокIи хэщагъ. НыбжьыкIэхэм — кIэлэеджакIохэм, студентхэм бэрэ аIокIэ, гъэсэныгъэ-пIуныгъэм мэхьанэшхо реты.Исхьакъ дэжь тычIэхьагъэу, гъэзетым къыриджыкIыгъэм фэгъэхьыгъэу зыгорэ къытимытэу къыхэкIырэп. Нахьыжъым ынаIэ ренэу къызэрэттетыр сыдигъокIи зэхэтэшIэ. ИныбжьыкIэгъум илъэситф фэдизрэ Iоф зыщишIэгъэ гъэзетэу «Социалистическэ Адыгеим», джы «Адыгэ макъэм», къихьэрэ пстэуми яджэ. Къыддэхъугъэу ылъэгъурэмкIэ тыгу къыдещае, тынаIэ нахь лъэшэу зытедгъэтын фэе лъэныкъохэр къытиIоу къыхэкIы. АщкIэ тыфэраз.Исхьакъ тхылъхэр сыдигъокIи къетэкъокIыгъэх. «Адыгэ Хабзэр» иIанэ текIырэп. Ар зэхэзгъэуцуагъэу, философие шIэныгъэхэмкIэ докторэу, гуманитар ушэтынхэмкIэ Адыгэ республикэ институтым ипащэу ЛIыIужъу Адам Исхьакъ имэфэкIкIэ къыфэгушIонэу къэкIуагъ. Нахьыжъхэм тахэтэу тарихъым къыхэнэщт сурэтыр зытетхыгъ.МэщбэшIэ Исхьакъ псауныгъэ пытэ иIэнэу, джыри илъэсыбэрэ лъэпкъым фэлэжьэн ылъэкIынэу, къыдигъэкIырэ тхылъхэм япчъагъэ хэхъонэу фэтэIо!Тэу Замир.