Урысыем икинематографистхэм я Союз иотделениеу АР-м щыIэр кIэщакIо зыфэхъугъэ я VI-рэ кинофестивалэу «Саусэрыкъо дышъ» зыфиIорэр мэзаем и 15-м къыщыублагъэу мэлажьэ.
Режиссерэу, УФ-м икинематографистхэм я Союз икъутамэу АР-м щыIэм ипащэу Нэгъэплъэ Аскэрбый кинофестивалэу «Адыгеир, шIу усэлъэгъу!» зыфиIорэм илъэситфыкIэ узэкIэIэбэжьмэ изэхэщэн кIэщакIо фэхъугъагъ. Шъолъыр Iофтхьабзэм дунэе мэхьанэ иIэ хъугъэ ыкIи «Саусэрыкъо дышъ» зыфиIорэмкIэ ащ ыцIэ зэблахъугъ.Зэнэкъокъум хэлажьэхэрэм лъэныкъуищкIэ заушэты: анимационнэ, документальнэ джэгукIэ шIыкIэм ыкIи нейросетим атет кинор.— Непэрэ мафэмкIэ IофшIэгъэ 569-рэ фестивалым къырахьылIагъ. Ахэм ащыщэу осэшI купыр 100-мэ ахэплъагъ. Дунаим ихэгъэгу 11-мэ ярежиссер анахь IэпэIасэхэм яIофшIагъэхэр фестивалым къырахьылIагъэх. Ахэр Белоруссием, Киргизием, Испанием, Узбекистан, Италием, Иран, Бразилием, Сингапур, Тайвань, Мексикэм ыкIи нэмыкI къэралыгъохэм ялIыкIох. Тарихъ лъапсэ зиIэ художественнэ фильм лъэшхэр ахэтых. Адыгеим щыбгъэфедэн плъэкIыщт гупшысакIэхэр бэу къахэпхын плъэкIыщт, — къыIуагъ Нэгъэплъэ Аскэрбый.2026-рэ илъэсым шышъхьэIум и 15-м кинофестивалыр зэфашIыжьыщт.