А. Балабась
Илъэс еджэгъур ыкIэм фэкIуагъ. Непэ республикэм ит гурыт еджапIэхэм, гимназиехэм, лицейхэм аужырэ одыджыныр къащытео. Мы мафэр кIэлэеджакIохэмкIи кIэлэегъаджэхэмкIи мэфэкI шъыпкъ, ау анахьэу ар зыгу къинэжьыщтыр я 11-рэ, я 9-рэ классхэр къэзыухыхэрэр ары. Мыгъэ ахэм япчъагъэ нэбгырэ минийрэ ныкъорэм ехъу.
АР-м гъэсэныгъэмрэ шIэныгъэмрэкIэ и Министерствэ къызэрэщаIуагъэмкIэ, мыгъэ аужырэ одыджыныр нэбгырэ 2090-мэ къафытеуагъ, я 9-рэ классыр 6480-мэ къызэранэкIыгъ.МэфэкI Iофтхьабзэхэр сыхьатыр 8-м къыщегъэжьагъэу еджапIэхэм ащыкIуагъ. Джы зэтыгъо ыкIи зэфэхьысыжь къэралыгъо ушэтынхэм ныбжьыкIэхэм зафагъэхьазыры. Мыгъэ апэрэу ахэр мэкъуогъум и 1-м аублэщтых. ЗэкIэмкIи зэтыгъо къэралыгъо ушэтынхэр щатынхэу пункт 11, зэфэхьысыжь ушэтынхэр ащызэхащэнэу чIыпIэ 27-рэ агъэхьазырыгъ. ЗыкI къэралыгъо ушэтыныр нэбгырэ 2237-мэ атынэу агъэнафэ. Гурыт сэнэхьат зэзыгъэгъотыгъэ ыкIи ыпэрэ илъэсхэм еджапIэр къэзыухыгъэхэр мы пчъагъэм хэтых. Апэрэ ушэтынхэу тарихъыр, литературэр ыкIи химиер мэкъуогъум и 1-м атыщтых. Ащ ыуж шIокI зимыIэ урысыбзэр мэкъуогъум и 4-м къыкIэлъыкIощт, хьисапыр тIоу гощыгъэу и 8-м, обществознаниер ыкIи физикэр и 11-м, биологиер, географиер, инджылызыбзэр (тхэнымкIэ) и 15-м, инджылызыбзэр (жэрыIокIэ) ыкIи информатикэр мэфитIум къыкIоцI — мэкъуогъум и 18-м ыкIи 19-м атыщт. Ащ ыуж IэпэчIэгъэнэ мафэхэр къыкIэлъыкIощтых.
Хабзэ зэрэхъугъэу, нахьыбэмэ къыхахыгъэх обществознаниер (нэбгырэ 974-мэ), профильнэ хьисапыр (911-мэ), биологиер (523-мэ), тарихъыр (382-мэ). Аужырэ илъэсхэм информатикэмкIэ зызыушэтыхэрэм япчъагъэ хэхъуагъ. Мыгъэ ахэр нэбгырэ 371-рэ мэхъух.Пэублэ еджапIэхэм яодыджынАдыгэ республикэ гимназием мы аужырэ илъэсхэм тIо гощыгъэу мэфэкI Iофтхьабзэр щызэхащэ. Мэкъуогъум и 25-м пэублэ классхэм арысхэм ямэфэкIыгъ. Тыгъуасэ фэдэу еджапIэм апэрэу кIогъэ кIэлэцIыкIухэм яплIэнэрэ классыр къаухыгъ. ЗэкIэмкIи гимназием ипэублэ еджапIэ нэбгырэ 567-рэ щеджэ, ахэм ащыщэу 100-мэ тфызакIэкIэ къаухыгъ, дэгъоу еджэхэрэр — нэбгырэ 230-рэ. Мы илъэсым пэублэ еджапIэм щеджэрэ нэбгырэ 11-мэ къэралыгъо зэнэкъокъухэм ыкIи олимпиадэхэм текIоныгъэр е хагъэунэфыкIырэ чIыпIэхэр къащыдахыгъ. Джащ фэдэу республикэ зэнэкъокъухэм чанэу ахэлэжьагъэх, спортымкIэ гъэхъэгъэшIухэр зиIэхэри бэу ахэтых. МэфэкI Iофтхьабзэр хабзэ зэрэхъугъэу славян тхыбзэмрэ культурэмрэ я Мафэ рапхыгъ. Ащ фэгъэхьыгъэ къэгъэлъэгъонхэр кIэлэцIыкIухэм къашIыгъэх, республикэ зэнэкъокъум текIоныгъэ къыщыдэзыхыгъэхэр агъэшIуагъэх.Делэкъо Анет.