Славян тхыбзэмрэ культурэмрэ я Мафэ хэдгъэунэфыкIыгъ. Ащ фэгъэхьыгъэу Адыгеим и ЛIышъхьэу КъумпIыл Мурат республикэм исхэм къафэгушIуагъ.
Ащ ишIуфэс псалъэ къызэрэщыхигъэщыгъэмкIэ, шIэныгъэзехьэхэу Кириллрэ Мефодийрэ славян лъэпкъхэм яхьарыфылъэ зэрэзэхагъэуцуагъэмкIэ шIэныгъэмрэ гушъхьэ байныгъэм изыкъегъэIэтынрэ якIурэ гъогур къызэIуахыгъ. УрысыбзэкIэ тхыгъэ литературнэ произведениехэм дунэе культурэр къагъэбаигъ, научнэ текIоныгъэшхохэу Урысыем ышIыгъэхэм дунаим уасэу къащыфашIырэм зыкъырагъэIэтыгъ. Непэ урысыбзэр Урысыем ис лъэпкъхэр зэзыпхырэ лъэмыджэу, хэгъэгум изыкIыныгъэ зыгъэпытэрэ амалэу щыт.«Бзэмрэ культурэмрэ якъэухъумэн къэралыгъоми, Урысыем щыпсэурэ пстэуми япшъэрылъэу зэрэщытыр зыщыдгъэгъупшэ хъущтэп. Урысыер зыгъэлъапIэхэрэм, Донбасс щыпсэурэ урысхэм яныдэлъфыбзэкIэ гущыIэнхэу яIэ фитыныгъэр къэзыухъумэзэ, фронтым псэемыблэжьэу щызаохэрэм «тхьэегъэпсэушхо» ясэIо. Адыгеим щыпсэухэрэм а мэфэкIымкIэ сафэгушIо, псауныгъэ пытэ, щыIэкIэ-псэукIэшIу яIэнэу, урысыбзэм изэгъэшIэнкIэ ыкIи икъэухъумэнкIэ гъэхъагъэхэр ашIынэу, шIоу щыIэр зэкIэ къадэхъунэу сафэлъаIо!» — къыщеIо Адыгэ Республикэм и ЛIышъхьэу КъумпIыл Мурат ишIуфэс псалъэ.