Мыекъопэ район администрациер
БлэкIыгъэ зыгъэпсэфыгъо мафэхэр оялэу зэрэщытыгъэхэм къыхэкIэу чIычIэгъ псыхэм зыкъаIэтыгъ ыкIи псыхъохэм псыбэ адэт хъугъэ. ГидрометеорологиемкIэ шъолъыр гупчэм ипащэ иIэнатIэ зыгъэцэкIэрэ Виктория Гусевам къызэрэтиIуагъэмкIэ, мазэм къещхырэм изыщанэ сыхьатитфым къыкIоцI шэмбэтым Мыекъуапэ къыщещхыгъ.
ЖъоныгъуакIэм и 20-м къыщыублагъэу Мыекъопэ районым гъэлъэшыгъэ шIыкIэм тетэу чIыопсым изытет щылъэплъэх. Коммунальнэ къулыкъухэм псыдэчъыпIэхэр агъэкъабзэх, ащ пае ищыкIэгъэ техникэр агъэфедэ. Мыекъопэ районым ипсэупIэхэм ащыщхэм псыр зыдэхьэгъэ щагухэр къахэкIыгъэх. Зэрар зэрихыгъэхэр зэхащэгъэ комиссием къыхегъэщых.Мыекъопэ районым иадминистрацие къызэрэщытаIуагъэмкIэ, ошIэ-дэмышIэ IофхэмкIэ къулыкъухэм ямызакъоу, юнармейцэхэр, Апэрэхэм я Движение хэт ныбжьыкIэхэр, гъогушI къулыкъоу ДСУ-3-м иIофышIэхэр псэупIэу Тульскэм ипчэгу щыкIогъэ гъэкъэбзэн IофшIэнхэм ахэлэжьагъэх. Джащ фэдэу саугъэтхэм къапэIулъ чIыпIэхэри агъэкъэбзагъэх.ДжырэкIэ псыхъохэр янэпкъхэм къадэкIыгъэхэу агъэунэфыгъэп. ГидрометеорологиемкIэ шъолъыр гупчэм къызэритырэмкIэ, ощхышхор, ошъур ыкIи жьыбгъэр (зы секундэм метрэ 22 — 24-м нэс илъэшыгъэу) зыщызэхэт циклоныр джыри мэфищырэ республикэм шъхьарытыщт.