Iофтхьабзэм изэхэщакIохэр
Республикэ гъэзетэу «Адыгэ макъэм» иредактор шъхьаIэу МэщлIэкъо Саидэ адыгэ культурэм и Мафэу Москва щыкIуагъэм хэлэжьагъ. Ащ къыдыхэлъытагъэу, бзэм ыкIи лъэпкъ культурэм якъэухъумэн зыщытегущыIэгъэхэ Iэнэ хъурае рагъэкIокIыгъ. Iофтхьабзэм рагъэблэгъагъэх Адыгеим, Къэбэртэе-Бэлъкъарым, Къэрэщэе-Щэрджэсым адыгабзэкIэ къащадагъэкIырэ лъэпкъ гъэзетхэм ыкIи кIэлэцIыкIу журналхэм яредактор шъхьаIэхэр.Iофтхьабзэм кIэщакIо фэхъугъэх Москва и Правительствэ лъэпкъ зэфэшъхьафхэмкIэ и Унэрэ мысатыу организациеу «Ныдэлъфыбзэмрэ лъэпкъ культурэмрэ якъэухъумэн и Гупчэрэ». Джащ фэдэу ащ хэлэжьагъэх шIэныгъэлэжьхэр, кIэлэегъаджэхэр, общественнэ IофышIэу Юрий Агирбовыр, Адыгеим иофициальнэ лIыкIоу УФ-м и Президент дэжь щыIэ Мыгу Бислъан, АР-м ижурналистхэм я Союз итхьаматэу ТIэушъу Светланэ, Москва щыпсэурэ адыгэхэр.Лъэпкъ тедзэгъухэм яредактор шъхьаIэхэм ягъэзетхэмрэ яжурналхэмрэ Iэнэ хъураим хэлэжьагъэхэр нэIуасэ афэзышIырэ видео кIэкIхэр къагъэлъэгъуагъэх, ныдэлъфыбзэкIэ Iоф зышIэрэ къэбарлъыгъэIэс амалхэм гумэкIыгъоу яIэхэр къаIотагъ. НахьыбэмкIэ ахэр зыфэгъэхьыгъэр Урысые Почтэм иIофшIэн, ныдэлъфыбзэмкIэ тхэрэ журналистхэр зэрафимыкъухэрэр ары.— Мыщ фэдэ Iофтхьабзэу Урысыем илъэпкъхэм языкIыныгъэ и Илъэс фэгъэхьыгъэм тызэрэхэлэжьагъэм, лъэпкъ зэфэшъхьафхэм я Унэ тычIэсэу хэкум пэIудзыгъэ адыгэхэм тиныдэлъфыбзэкIэ тазэрэдэгущыIэрэм тэркIэ мэхьанэ ин иI. Непэ хэхэс адыгэхэм адыгабзэкIэ къыдэкIырэ тедзэгъухэр къыратхыкIынхэу фаех ыкIи ащкIэ амалэу щыIэхэм тяусэ, — къыхигъэщыгъ «Адыгэ макъэм» иредактор шъхьаIэу МэщлIэкъо Саидэ.Адыгэ культурэм и Мафэу Москва щыкIуагъэм фэгъэхьыгъэ игъэкIотыгъэ къэбар къыкIэлъыкIорэ къыдэкIыгъохэм арытыщт. Гъэзетым шъулъыплъ!