Урысые Iофтхьабзэу «Забег.РФ» зыфиIорэм Адыгеим икъэлэ шъхьаIэ хэлэжьагъ. Мыр я 10-у мыгъэ рагъэкIокIыгъ. Къэралыгъом инэмыкI шъолъырхэм къызэдэчъэныр ягупчэ урамхэм ащыкIуагъэмэ, Мыекъуапэ ар республикэ стадионэу «Зэкъошныгъэм» щырагъэкIокIыгъ.
ЗэхэщакIохэм къызэраIуагъэмкIэ, Iофтхьабзэм хэлажьэхэрэм япчъагъэ мы илъэсым нахьыбэ хъугъэ. Зы километрэ, километри 5 ыкIи 10 хъурэ гъогууанэхэр унагъохэм, студентхэм ыкIи зипсауныгъэ зыгъэпытэ зышIоигъохэм къачъыгъ, километрэ 21,1-рэ хъурэм нэбгырэ 70-рэ фэдиз хэлэжьагъ.— Къэлэ паркыр — Мыекъуапэ игупч, мыщ укъыщычъэныр псынкIэп, анахьэу километрэ 15 къызэунэкIыгъэу, плъакъохэр нахь хьылъэ зыхъухэкIэ, — къыIуагъ Мыекъуапэ щыпсэурэ Надежда Михальцовам.
Километрэ 21,1-рэ къэзычъынэу изхъухьагъэхэр зэкI пIоми хъунэу зэнэкъокъум икIэух едзыгъо нэсыгъэх. Ащ къегъэлъагъо ахэм физическэ ухьазырыныгъэ дэгъу зэряIэр. ХъулъфыгъэхэмкIэ пэрытныгъэр зыубытыгъэм гъогууанэр сыхьатрэ такъикъи 10-м ехъукIэ, бзылъфыгъэхэмкIэ – сыхьатрэ такъикъ 26-кIэ къачъыгъ.Мыщ фэдэ Iофтхьабзэхэм IэнатIэ зыIыгъ пащэхэр ыкIи студентхэр, пенсионерхэр ыкIи кIэлэеджакIохэр ахэлэжьэнхэ алъэкIыщт. Арышъ, аныбжь, щыIэныгъэм чIыпIэу щаубытырэм ямылъытыгъэу, цIыф пстэуми заушэтын, япсауныгъэ агъэпытэн амал яI. Ары нэмыкI спорт лъэпкъхэм къызэдэчъэныр къахэзгъэщырэр.