Теннис цIыкIумкIэ Джэлэукъо Хъусен и Кубок икъыдэхын фэгъэхьыгъэ зэнэкъокъум Адыгеим икъэлитIумэ ыкIи ирайонитIумэ яспортсмен ныбжьыкIэхэм зыщаушэтыгъ. Красногвардейскэ районым икIэлэцIыкIу-ныбжьыкIэ спорт еджапIэ изэIухыгъэ первенствэ нэбгырэ 50 хэлэжьагъ.
МэфэкI зэхахьэм щагъэшIуагъ народнэ просвещениемкIэ отличникэу, кIэлэегъэджэ IофшIэным иветеранэу Джэлэукъо Хъусен Исхьакъ ыкъор. Мыщ ыныбжь илъэс 80 хъугъэ. Ащ щыщэу 60-р еджапIэм ыкIи спортым афигъэхьыгъ. Районым ищытхъу языгъэIогъэ спортсмен пчъагъэ Хъусен ыгъэсагъ. Ащ ишIуагъэкIэ Красногвардейскэ районыр илъэс тIокIым къыкIоцI шъолъыр Спартакиадэхэм анахь щылъэшыгъ. Непи юбилярым икъоджэ гупсэу Хьатикъуае теннис цIыкIур щарегъэхьы.
ЗимэфэкI хэзыгъэунэфыкIырэм къыфэгушIонхэу зэхахьэм къеблэгъагъэх Красногвардейскэ районым иадминистрацие ипащэ, иIофшIэгъу-кIэлэегъаджэхэр, спортсмен ныбжьыкIэхэр, нэмыкIхэри.Зэнэкъокъум хэлажьэхэрэр аныбжь елъытыгъэу купищэу гощыгъагъэх. Медальхэм афэбэнагъэх Красногвардейскэ ыкIи Теуцожь районхэм, Мыекъуапэ ыкIи Адыгэкъалэ ялIыкIохэр. АнахьыкIэхэм якуп текIоныгъэр къыщыдахыгъ Роман Мироновымрэ (псэупIэу Красногвардейскэр) Бзаго Даринэрэ (Мыекъуапэ). Гурыт купым анахь щылъэшыгъэх Бзаго Дамиррэ Пэфыф Суандэрэ (тIури Мыекъуапэ). Анахьыжъхэм якуп дышъэ медальхэр къыщахьыгъэх Владимир Скобелевымрэ (Мыекъуапэ) Владислава Трофимовамрэ (псэупIэу Красногвардейскэр).ХагъэунэфыкIырэ чIыпIэхэр къыдэзыхыгъэхэм щытхъу тхылъхэр ыкIи медальхэр афагъэшъошагъэх, анахь лъэшхэм зэнэкъокъум ишIухьафтын шъхьаIэу кубокхэр къалэжьыгъэх.Мыщ фэдиз гъэхъагъэ зиIэ Хъусен Исхьакъ ыкъом псауныгъэ пытэ иIэу джыри илъэсыбэ къыгъэшIэнэу фэтэIо, Iофэу ышIэрэмкIэ тыфэраз.