Делэкъо А.
Социальнэ зэзэгъыныгъэм фытегъэпсыхьэгъэ я II-рэ республикэ фестивалэу «День мечты» зыфиIорэр мы мафэхэм Мыекъуапэ щыкIуагъ.
Лъэпкъ проектэу «Унагъу» зыфиIорэм къыдыхэлъытагъэу ар зэхащэ. Iофтхьабзэм кIэщакIо фэхъугъэх АР-м IофшIэнымрэ социальнэ хэхъоныгъэмрэкIэ и Министерствэрэ АР-м IофшIэнымкIэ ыкIи социальнэ ухъумэнымкIэ и Гупчэрэ.Фестивалым цIыфыбэ къекIолIагъ. Къэралыгъо программэм ишIуагъэкIэ зищыIэкIэ-псэукIэ нахьышIу хъугъэ, ежь иунэе Iоф къызэIузыхын зылъэкIыгъэ нэбгырэ 50 фэдизмэ яIэпэIэсэныгъэ къагъэлъэгъуагъ. Ахэр республикэм ирайонхэм ыкIи икъалэхэм къарыкIыгъэх. Ахэтых ахэм дэнымкIэ, пщэрыхьанымкIэ, пхъэкIычым ишIынкIэ, чъыг къэгъэкIынымкIэ, лъэпкъ Iэпэщысэхэм яшIынкIэ ыкIи нэмыкI лъэныкъохэмкIэ сэнаущыгъэ зыхэлъхэр.АР-м и ЛIышъхьэ ыцIэкIэ къэзэрэугъоигъэхэм шIуфэс къарихыгъ АР-м IофшIэнымрэ социальнэ хэхъоныгъэмрэкIэ иминистрэу Мырзэ Джанбэч.— Непэ мэфэкI шъыпкъ, къэралыгъо IэпыIэгъум ишIуагъэкIэ хэхъоныгъэу шъушIыгъэхэр тэлъэгъу. Нэбгырэ пэпчъ исэнаущыгъэ хигъэхъон амал зэрэщыIэр зэкIэми зэхашIэн фае. Адыгеим социальнэ зэзэгъыныгъэм епхыгъэ Iофыгъохэр зэрифэшъуашэу щызэшIуахых. 2021-рэ илъэсым къыщегъэжьагъэу ар щыIэныгъэм щыпхырытэщы. ЫпэрапшIэу ар къызытефэрэр гъот макIэ зиIэ ыкIи сабыибэ зэрыс унагъохэр ары. Джы хэушъхьафыкIыгъэ дзэ операцием хэлэжьэгъэ ветеранхэми IэпыIэгъур ятэты. Тыфай цIыфэу хэлажьэхэрэр нахьыбэ хъунэу, — къыIуагъ министрэм.Мэзихым къыкIоцI хэушъхьафыкIыгъэ дзэ операцием иветерани 10-мэ социальнэ зэзэгъыныгъэхэр адашIыгъэх. Юрий Смирновыр ахэм ащыщ. Ар Мыекъуапэ щэпсэу, мэзаем къэралыгъо IэпыIэгъур къыIукIагъ. Колбаснэ продукциер къыдигъэкIэу ыублагъ. — Дзэ операцием ыуж зыздэзгъэзэщтыр сымышIэу сегупшысагъ, мыщ фэдэ амал зэрэщыIэр зызэхэсэхым, тхылъхэр згъэхазырыгъэх ыкIи ахъщэ къысатыгъ. ПщэрыхьакIоу Iоф сшIэщтыгъэти, колбасахэр сшIынэу езгъэжьагъ, цIыфхэм агу рихьэу ащэфы. Мыщ фэдэ IэпыIэгъу къызэрэтатыгъэм лъэшэу тырыраз, — къыIуагъ ащ.Светлана Юрочкар Красногвардейскэ районым къикIыгъ, чъыгхэр къегъэкIых. Муниципальнэ къулыкъум илъэс пчъагъэрэ Iоф щызышIэгъэ бзылъфыгъэм ежь иIоф къызэIуихынэу сыдигъокIи фэягъ, ау ахъщэшхо зэрэхэхьащтым пае зыфэIэтыщтыгъэп. Социальнэ хъытыум мыщ фэдэ IэпыIэгъу зэрэщыIэр рилъэгъуагъ, ащ икъыдэхын хэлэжьагъ. КъыIэкIэхьэгъэ ахъщэмкIэ фэбапIэ ышIыгъ, ащ ищыкIэгъэ Iэмэ-псымэхэр къыщэфыгъэх.Адыгэкъалэ къикIыгъэ Нэужьэрэкъо Ларисэ мыстхъум хэшIыкIыгъэ пкъыгъо дахэхэр ешIых. Бзылъфыгъэ IэпэIасэм къыIэкIэхьэгъэ ахъщэмкIэ ищыкIэгъэ Iэмэ-псымэхэр ыщэфыгъэх, хэхъоныгъэхэр ышIыгъэх. Программэм анахь ныбжьыкIэу хэлэжьагъэр Даниил Широковыр ары. Ащ спорт гимнастикэмкIэ къыткIэхъухьэрэ лIэужхэм япсауныгъэ епсыхьэ, спортым фэщагъэхэ ешIых. Фестивалым лъэныкъо зэфэшъхьафхэмкIэ текIоныгъэ къыщыдэзыхыгъэхэр агъэшIуагъэх. Ахэр Мыекъуапэ щыщэу Грач Варельджан, Адыгэкъалэ къикIыгъэ Абрэдж Асиет, Мыекъопэ районым щыщхэу Даниил Мельникрэ Даниил Широковымрэ, Теуцожь районымкIэ — Нэхэе Алина, Шэуджэн районымкIэ — Гъыщ Ахьмэд, МыекъуапэкIэ — Виктория Манашировар. Къэзэрэугъоигъэхэм къыхахыгъ Мыекъуапэ щыщ Хъуджыкъо Зарет.ЦIыфхэм яIэпэIэсэныгъэ хагъэхъонымкIэ, ежь яIоф къызэIуахынымкIэ социальнэ зэзэгъыныгъэм мэхьанэшхо зэриIэр фестивалым джыри зэ къыгъэлъэгъуагъ. 2021-рэ илъэсым къыщегъэжьагъэу программэр нэбгырэ мини 4,5-мэ къызфагъэфедагъ, мыгъэ сомэ миллион 257-рэ пэIуагъэхьагъ.ДЕЛЭКЪО Анет.