Гурыт еджапIэу N 6-м ихъарзынэщ
ЦIыфхэр къыхэлажьэхэзэ агъэпсырэ бюджетым ишIуагъэкIэ республикэм икъоджэ псэупIэхэр нахь зэтегъэпсыхьагъэ зэрэхъухэрэр нэрылъэгъу.
Урысые Федерацием и Президент къыдыригъэштагъэу, партиеу «Единэ Россиер» икIэщакIоу Iофыгъохэр зэшIуахых. Мы аужырэ илъэсхэм къоджэ псэупIэхэм ямызакъоу, гурыт еджапIэхэми ар ащагъэцакIэ.2024-рэ илъэсым мы проектым епхыгъэ зэнэкъокъур апэрэу республикэм щырагъэкIокIыгъагъ. Кощхьэблэ районыр пилотнэу аштэгъагъ ыкIи мыщ ит гурыт еджэпIэ 13-мэ тхьамафэм къыкIоцI лъэныкъо зэфэшъхьафхэмкIэ проектхэр агъэхьазырыгъэх ыкIи ахэр къагъэлъэгъожьыгъэх. А илъэсым купищмэ текIоныгъэ къыдахыгъагъ, республикэм ибюджет къыхэхыгъэ сомэ мин 350-рэ зырыз афагъэшъошэгъагъ, чIыпIэ бюджетхэм мин 35-рэ афыхагъэхъуагъ, проектхэр щыIэныгъэм щыпхыращыгъэх.
Гурыт еджапIэхэм хэхъоныгъэхэр ашIынхэмкIэ мыщ шIуагъэ къызэритырэр агъэунэфыгъ. Ащ дакIоу кIэлэеджакIохэм гухэлъэу яIэхэр къыраIотыкIынхэм, ахэр къагъэшъыпкъэжьынхэм, ныбжьыкIэхэр общественнэ щыIакIэм хэщэгъэнхэмкIэ амалышIоу зэрэщытыр нэрылъэгъу хъугъэ.АР-м финансхэмкIэ и Министерствэ къызэрэщытаIуагъэмкIэ, проектым игъэцэкIэн республикэм щылъагъэкIуатэ, гъэрекIо гурыт еджапIэхэр чанэу зэнэкъокъум къыхэлэжьагъэх ыкIи республикэм къыхэхыгъэ сомэ мин 350-рэ зырыз текIоныгъэ къыдэзыхыгъэ еджэпIи 10-мэ афагъэшъошагъ. КIэлэцIыкIухэр зычIэс гурыт еджапIэхэм хэхъоныгъэ ашIынымкIэ гухэлъышIухэр щыIэныгъэм щыпхыращыгъэх. КIэлэеджакIохэм зызщагъэпсэфын, творчествэм зыщыхагъэхъон алъэкIыщт чIыпIэхэр гъэпсыгъэнхэм, еджапIэм ищагу зэтегъэпсыхьэгъэным афэгъэхьыгъэу ныбжьыкIэхэм проектхэр къагъэлъэгъуагъэх. Мыгъи зэнэкъокъур рагъэкIокIыщт. Мы илъэсым къыщегъэжьагъэу ащ кIэщакIо фэхъущтыр АР-м ныбжьыкIэ IофхэмкIэ и Комитет.
Проектым шIуагъэу пылъыр ыушэтыгъ Кощхьэблэ районымкIэ Поселкэу Дружбэм ит гурыт еджапIэуN 6-м. Мыщ икIэлэеджакIохэр кIэлэегъаджэхэр ягъусэу тIогъогогъоу зэнэкъокъум хэлэжьагъэх ыкIи тIумкIи текIоныгъэ къыщыдахыгъ.— Апэрэу тызыхэлажьэм гухэлъэу тиIагъэр еджапIэм ищагу зэтедгъэпсыхьаныр ары. Iофтхьэбзэ зэфэшъхьафхэр мыщ щызэхэтщэнхэмкIэ къины къытфэхъущтыгъ, сыда пIомэ Iупэр цIыкIугъэ. Республикэ ыкIи муниципальнэ бюджетхэм къахэхыгъэ сомэ мин 385-м ишIуагъэкIэ гухэлъыр щыIэныгъэм щыпхырытщыгъ, чIыпIэр зэтедгъэпсыхьагъ. КIэлэеджакIохэм языгъэпсэфыгъо уахътэ зыщагъэкIон алъэкIыщт чIыпIэ щагум щыдгъэпсыгъ. ТикIэлэеджакIохэр патриотэу гъэсэгъэнхэм сыдигъокIи мэхьанэшхо етэты, ар къыдэтлъытэзэ «ШIэжьым иаллей» зыфиIорэр дгъэпсыгъэ, ТекIоныгъэм итамыгъэу щыт къэгъагъэу сиреньир бэу дгъэтIысхьагъ, ащ нэмыкI чъыгхэри еджапIэм ищагу дэт хъугъэ. КIэлэеджакIохэр ахэм афэсакъых. Джащ фэдэу футбол ыкIи баскетбол зыщыджэгущтхэ чIыпIэхэр дгъэпсыгъэх, турникхэр дэдгъэуцуагъэх. ЯтIонэрэмкIэ, медиагупчэу «Твой взгляд» зыфиIорэр къызэIутхынэу зэнэкъокъум тыхэлэжьагъ ыкIи тигухэлъ осэшIу къыфашIи, анахь дэгъухэм ащыщ тыхъугъ, — еIо еджапIэм ипащэу Бэрзэдж Эллэ.КъатIупщыгъэ ахъщэмкIэ медиам фытегъэпсыхьэгъэ Iэмэ-псымэхэр, микрофонхэр, принтер, колонкэхэр, интерактивнэ панелыр, ноутбук ыкIи нэмыкIыбэ зэрагъэгъотыгъэх. Проектым ишIуагъэкIэ еджапIэр нахь зэтегъэпсыхьагъэ, Iофтхьабзэхэр зыщызэхащэрэ чIыпIэ дахэ иIэ хъугъэ. Джырэ лъэхъаным диштэрэ медиагупчи ащ хэт.
— Медиам ылъэныкъокIэ тикIэлэеджакIохэм шIэныгъэ дэгъухэр ядгъэгъотынхэ амал тиIэ хъугъэ. Медиа-текстхэр, видео-къэбархэр ыкIи сурэт репортажхэр тикIэлэеджакIохэм агъэхьазырых. ЕджапIэм исайт, Интернет нэкIубгъохэм ахэр къарэхьэх. НыбжьыкIэхэм мы лъэныкъор лъэшэу ашIогъэшIэгъон. Iофтхьабзэу, зэнэкъокъоу, фестивалэу зэхатщэхэрэм чанэу ахэлажьэх, ахэр тырахых, дахэу, зэгъэфагъэу къагъэлъэгъожьых. ТиеджапIэ игъэхъагъэхэр, иIофшIакIэ джы зэкIэми алъэгъун амал яIэ хъугъэ. Медиагупчэ зэрэтиIэм ишIуагъэкIэ муниципальнэ Iофтхьабзэхэри бэрэ тиеджапIэ щызэхащэх, — еIо пащэм.ГухэлъышIухэр зиIэ ныбжьыкIэхэм ягъогу зэрэзэIухыгъэр, ахэм гъэхъагъэхэр ашIынхэ зэралъэкIыщтыр кIэухым Бэрзэдж Эллэ къыхигъэщыгъ.ДЕЛЭКЪО Анет.