АМ
Джары зэреджагъэр тхакIоу, профессиональнэ литераторхэм я Урысые Союз хэтэу Иван Бормотовым мы илъэсым къыдигъэкIыгъэ тхылъым.
ТхакIоу Иван Бормотовыр гупсэфыгъо зимыIэ тхакIу, ренэу зымыгъэгупсэфырэр блэкIыгъэ Хэгъэгу зэошхом ихьазаб машIу. Сапашъхьэ илъ тхылъыкIэу «Подснежник» зыфиIорэр ащ ытхыгъ.Тхылъыр ежь авторым игущыIапэ кIэкI къызэIуехы ыкIи щыIэныгъэмкIэ, цIыфхэмкIэ анахь мэхьанэ зиIэр мамырныгъэр, рэхьатныгъэр, шъхьафитныгъэр арэу зэрэщытхэр кIегъэтхъы. Хэгъэгу зэошхом хэтыгъэ Николай Долголенкэм ышъхьэ къырыкIуагъэр, иеджэкIагъэр, игъэпсыкIагъэр, щэIэфэ зэрэпсэугъэр, Хэгъэгум пае зэрэпсэемыблэжьыгъэр тхылъым иапэрэшъхьэу «Майкопчанин» зыфиIорэм къыщиIотыкIыгъ.ТиблэкIыгъэ хэз имыIэу тикIэлакIэхэм ашIэн зэрэфаер къыщытыгъ И. Бормотовым итхылъэу «Наказ молодым» зыфиIоу плIэгъогогъурэ Советскэ Союзым и ЛIыхъужъэу, маршалэу Г. К. Жуковым игущыIэ шыгъэкIэ. Ащ къыкIэлъэкIо Мыекъуапэ заом ыпэкIэ зыфэдагъэр, Кавказ зэпырыкIыпIэхэм Вермахт икъушъхьэ щэрыуакIохэр зэратетыгъэхэр ыкIи Наур зэраштэгъэ шIыкIэмрэ гъаблэмыкIи чъыIэм зэрапэшIуекIуагъэхэмрэ гуимыкIыжь къэбарэу къызэрэнагъэхэр тхылъым иапэрэ повесть къыщыIотагъэх.«Братья партизаны» зыфиIорэ повестри тарихъ хъугъэ-шIэгъэ инхэу граждан заор, Совет хабзэр щыIэ зэрэхъугъэр, Хэгъэгу зэошхом къежьапIэ фэхъугъэр, псэр атызэ напэр зэращэфыгъэр, партизан отрядэу «За Сталина» лIыгъэ-пытэгъэ инэу хэлъыгъэр зыщыгъэунэфыгъэх.«Евдокия» зыфиIорэм бзылъфыгъэхэм заом яIахьэу хэлъыгъэр, яIофшIэкIагъэр, ячаныгъэ-гушхуагъэр щыхэгъэунэфыкIыгъ.Я 4-рэ повестэу тхылъым къыдэхьагъэр «Полвека в пути». Ар ежь И. Бормотовым къырыкIуагъэм фэгъэхьыгъ — икъэхъукI, иеджакI, Кавказым, яунагъокIэ Адыгеим къэкIонхэу зэрэхъугъэр. ЗэкIэ повести 4-м гупшысэ ин ащыпхырыщыгъ. Заор зэрэхьэзабым, зэрэнэпс закIэр, ау ущыIэным пае тынчэу, шъхьафитэу Родинэр къэуухъумэн зэрэфаер, ЧIыгум — Ным пае цIыф миллион пчъагъэхэм апсэ зэратыгъэр, ТекIоныгъэшхор — нэпсырэ гушIогъуабэрэ зыхэлъ мэфэкI анахь лъапIэу зэрэщытыр. А пстэури итхылъыкIэу «Подснежник» зэрилъэкIэу щыкIигъэтхъыгъ.Мамырыкъо Нуриет.