Дзэ сэнэхьатым имэхьанэ зыкъеIэты

УФ-м зыкъэухъумэжьынымкIэ и Министерствэ цIыф зэрымыс быбырэ пкъыгъохэм (БПЛА) яоператор сэнэхьатым фырагъэджэщтхэм, апшъэрэ дзэ еджапIэхэм ачIэхьащтхэм яугъоин, дзэ дэщыгъор зэрэлъыкIуатэрэм афэгъэхьыгъэ пресс-зэIукIэ Мыекъуапэ идзэ комиссариат щыкIуагъ.

Хэгъэгур къэухъумэгъэнымкIэ амалыкIэу къежьагъэм ишапхъэ­хэр, пшъэрылъэу ыкIи ахъщэ тынэу яIэхэр, Iофтхьабзэу рагъэкIокIыхэрэм якIэуххэр къэлэ дзэ комиссариатым ипащэу Алексей Санташовым къыIо­тагъ.КъулыкъухьынырМы илъэсым мэлылъфэгъум и 1-м къыщегъэжьагъэу бэдзэ­огъум и 15-м нэс нэбгыри 100 фэдиз дзэ къулыкъум ащэнэу щыт. Ащ пае нэбгырэ 600-м ехъумэ медицинэ уплъэкIуныр акIугъ, 35-м ехъу дащыгъах. Дзэ комиссарым къызэриIуагъэм­кIэ, а ныбжьыкIэхэр хэушъхьафыкIыгъэ дзэ операциер зыщыкIорэ чIыпIэм ащэщтхэп. Моск­ва, Сыбыр, Къырым ащыIэ дзэ шъолъырхэм, Краснодар краим и хы ШIуцIэ флот илъэсыдзэ, джащ фэдэу, Урысые гвардием исатырхэм, ошъогудзэхэм къулыкъур ныбжьыкIэхэм ащахьыщт.ЗэзэгъыныгъэкIэ къулыкъур зыхьыщт нэбгырэ 300-м ехъу къэлэ дзэ комиссаиатым илъэ­сым къыкIоцI аригъэщэнэу пшъэ­рылъ къыфагъэуцугъ. Мы уахътэм ехъулIэу нэбгыри100-м ехъу агъэкIуагъ.Быбырэ пкъыгъохэр зыгъэIорышIэщтхэрХэушъхьафыкIыгъэ дзэ операциер зыщыкIорэ лъэхъаным къыщынэфагъэхэм ащыщ зэонымкIэ шIыкIэ-амалэу щыIэхэр ыпэрэхэм афэмыдэу зэрэзэхъо­кIыгъэхэр. Пыим нахьыбэу ыгъэ­федэрэр авиациер ары, жьым хэт зэпэуцужь ригъэкIо­кIырэр. Ащ епхыгъэу джы подразделениякIэм игъэпсын фе­жьагъэх. Джырэ дзэм мыр анахь ищыкIэгъэ сэнэхьатхэм ащыщ, ащ епхыгъэхэр ары дронхэр зыгъэIорышIэхэрэр, дзэ IофымкIэ пшъэрылъ шъхьаIэхэр зэшIозыхыхэрэр.— БПЛА-м иоператор хъущт­хэм шэпхъэ гъэнэфагъэхэр апылъых. Илъэс 18-м къыщегъэжьагъэу 45-м нэс аныбжьын фае (FPV-дронхэр зыгъэIорышIэщтхэм аныбжь илъэс 35-м шIокI хъущтэп), шапхъэм диштэу инджылызыбзэр, компьютерыр зэрагъэфедэщтыр ашIэнхэ фае. Джащ фэдэу ипсауныгъэ медицинэ комиссием ыуплъэ­кIущт, купэу «А-м» ыкIи «Б-м» диштэнхэу щыт. Къы­хэзгъэщымэ сшIоигъу, хэу­шъхьафыкIыгъэ дзэ опера­цием административнэ ыкIи уголовнэ пшъэдэкIыжь зыхьыгъэхэр ащэхэмэ, мы подразделением ахэр щагъэзыех, анахь дэгъухэр ары къыхахыщтхэр, — хигъэунэфыкIыгъ дзэ комиссарым.ФэгъэкIотэнхэр, ахъщэ тынхэрПодразделениякIэм къулыкъу щызыхьыщтыр зэзэгъыныгъэм зы илъэс пIалъэкIэ кIэтхэ, ар зиухыкIэ къэкIожьын ылъэкIыщт, шIоигъоныгъэ зиIэм лъигъэ­кIотэн фит. Хъулъфыгъэхэм ямызакъоу, бзылъфыгъэхэри аштэх. Зэтыгъо тынэу сомэ миллиони 3 фэдиз къараты. ЛэжьапкIэр сомэ мин 230-м къыщегъэжьагъ, зэо пшъэры­лъэу зэшIуихырэм елъытыгъэу хэ­гъэхъонхэр иIэщтых.Джащ фэдэу зэзэгъыныгъэ кIатхэрэм ыныбжьыкIэ къулыкъоу ыхьынэу щытым мыр пэIохьэ. ДзэкъулыкъушIэхэм ыкIи ахэм яунагъохэм социальнэ фэгъэкIотэнэу яIэхэр зэкIэри мыхэм атегъэпсыхьагъ. «Зэо зэфэшъхьафхэм яветеран» цIэр къафагъэшъуашэ.— АныбжьыкIэ къатефэрэ дзэ къулыкъур зыхьыщтхэр зэзэгъыныгъэм кIэтхэнхэ амал яI, а пIалъэм къулыкъур ахьыгъэкIэ макIо ыкIи зэтыгъо тынэу сомэ миллиони 3 къатефэ. Ахъщэр зыIукIэ­хэ­рэм ащыщых хэушъхьафыкIыгъэ подразделениехэм къулыкъур ащызыхьынэу зэзэгъыныгъэм кIатхэхэрэр. ­Ау ныбжьыкIэр къулыкъум ащэгъахэу зэзэгъыныгъэм ащ зыщыкIатхэкIэ, зэтыгъо ахъ­щэ тынэу къыратыщтыр бэкIэ нахь макI, — къыIуагъ Алексей Санташовым.Дзэ гъэсэныгъэрУФ-м зыкъэухъумэжьынымкIэ и Министерствэ иапшъэрэ еджа­пIэхэм ачIэхьащтхэм яугъоин рагъэжьагъ. Мы илъэсым ахэм нэбгырэ 40 фэдиз ачIэхьанэу загъэхьазыры, бзылъфыгъэхэри ахэтых.— Апшъэрэ классхэр къэзыухыхэу зыкI къэралыгъо ушэтынхэр зытыщтхэр, колледжхэм, училищхэм гъэсэныгъэ щызэзгъэгъоты­гъэ­хэу, дзэкъулыкъур зыхьыгъа­хэхэу, зыныбжь илъэс 24-м шIомыкIыгъэхэу апшъэрэ гъэсэныгъэ зиIэ зышIоигъохэр УФ-м зыкъэухъумэжьынымкIэ и Министерствэ иеджапIэхэм ачIэхьанхэшъ, кадровэ офицер хъунхэм иамал зэрэщыIэр алъыдгъэIэсы тшIоигъу. АщкIэ пшъэрылъэу щытыр къэралыгъом ищы­нэ­гъончъагъэ ыкIи изыкъэухъу­мэжьын фытегъэпсыхьэгъэ IофышIэхэр нахьыбэу гъэхьазырыгъынхэр ары, — къы­хигъэщыгъ дзэ комиссарэу Алексей Санташовым.Мыщ шIуагъэу пылъым игугъу къэпшIымэ, апшъэрэ дзэ еджапIэхэм чIэсыфэхэ Урысыем зыкъэухъумэжьынымкIэ и Министерствэ шапхъэхэм адиштэу ыфэпэщтых, ыгъэшхэщтых, зыщыпсэунхэ чIыпIэ ыкIи ахъщэ тын къаритыщт. Къэзыуххэрэм IофшIапIэхэр къафигъотыщтых, лэжьэпкIэшхо къагъэхъэщт, яеджэгъу илъэсхэр яIофшIэгъу уахътэ хэхьащтых, дзэкъулы­къушIэхэм яфэшъошэ социальнэ фэгъэкIотэнхэр ежьхэми, яунагъохэми яIэщтых, къэралыгъо программэм диштэу псэупIэ зэрагъэгъотышъущт, илъэс 20 зытешIэкIэ пенсием кIонхэ алъэкIыщт.Связист сэнэхьатыр мы уахътэм анахь агъэлъапIэхэрэм ащыщ. Ар зэзгъэгъоты зышIоигъохэр апшъэрэ дзэ училищэу Новочеркасскэ дэтым чIэхьанхэ алъэкIыщт. Ащ пае зыкI къэралыгъо ушэтыным балл ин къыщыпхьын ищыкIагъэп. ШIоигъоныгъо зиIэхэм АР-м идзэ комиссариат зыфагъэзэн алъэ­кIыщт.Зэзэгъыныгъэ шIыкIэм тетэу къулыкъур зыхьынэу фаеу Мые­къуапэ щыпсэухэрэм дзэ комиссариатэу ащ дэтым зыщарагъэтхышъущт. УпчIэ зиIэхэм зыздагъэзэшъущтыр: къ. Мые­къуапэ, ур. Комсомольскэр, 217-рэ, я 119, 102-рэ кабинетхэр е телефонхэу: 8 (8772) 52-11-27, 52-11-25. Зэзэгъыныгъэ шIыкIэкIэ къулыкъу зыхьы зышIоигъохэм апае линие плъырыр: 117#4 ыкIи 8 (8772) 52-11-28.Джащ фэдэу шъхьадж зыщы­псэурэ чIыпIэм щыIэ дзэ комис­сариатым зыфигъазэмэ, ищыкIэ­гъэ къэбарыр ыгъотыщт. Телеграм-каналэу «Адыгея — Служу Родине» зыфиIорэм игъэкIотыгъэ къэбар ит.IЭШЪЫНЭ Сусан.