Делэкъо А.
АР-м хэдзынхэмкIэ и Гупчэ комиссие тыгъуасэ зэхэсыгъоу иIагъэм Iофыгъо 17-мэ щахэплъагъэх. Iофтхьабзэр зэрищагъ Гупчэ комиссием и Тхьаматэу Сэмэгу Нурбый.
ЫпэрапшIэу муниципальнэ образованиехэм хэдзынхэмкIэ ячIыпIэ комиссиехэм япащэхэр агъэнэфагъэх. Республикэм чIыпIэ комиссии 9 щагъэпсыгъ. Адыгэкъалэ хэдзынхэмкIэ ичIыпIэ комиссие ипащэу Ожъ Руслъан, Джэджэ районымкIэ — Галина Самойловар, Кощхьэблэ районымкIэ — Гъурыжъ Заремэ, Красногвардейскэ районымкIэ — Осмэн Руслъан, МыекъуапэкIэ — Татьяна Ларинар, Мыекъопэ районымкIэ — Анна Ярковар, Тэхъутэмыкъое районымкIэ — Татьяна Цыцылинар, Теуцожь районымкIэ — Блэгъожъ Казбек, Шэуджэн районымкIэ — КIэнышх Руслъан агъэнэфагъэх. Нэбгырэ пэпчъ иIофшIэн зэрифэшъуашэу зэригъэцакIэрэр Гупчэ комиссием и Тхьаматэ къыхигъэщыгъ.Нэужым УФ-м и Къэралыгъо Думэ ыкIи АР-м и Къэралыгъо Совет — Хасэм ядепутатхэм яхэдзынхэу къэблагъэрэм языфэгъэхьазырын фэгъэхьыгъэ Iофыгъохэм къэзэрэугъоигъэхэр атегущыIагъэх.Хэдзын зэхахьэхэм ыкIи кандидатхэм къагъэхьазырырэ тхылъхэр зыфэдэн фаехэм хэдзынхэмкIэ Гупчэ комиссием исекретарэу ХьацIэцIэ Фатимэ къатегущыIагъ. Мы лъэныкъом мэхьанэшхо зэриIэр ащ къыхигъэщыгъ, аужырэ илъэсхэм хэдзынхэм афэгъэхьыгъэ хэбзэгъэуцугъэм зэхъокIыныгъэу фэхъугъэхэр зэкIэ къыдыхэлъытагъэх. Джащ фэдэу хэдзынхэм ахэлажьэхэрэм зэрифэшъуашэу тхылъхэр агъэхьазырынхэмкIэ IэпыIэгъу къафэхъущт хэушъхьафыкIыгъэ программэ зэрэщыIэр къыIуагъ.Iофтхьабзэм нэмыкI Iофыгъохэри щызэхафыгъэх, унэшъо гъэнэфагъэхэр ашIыгъэх.ДЕЛЭКЪО Анет.