Делэкъо А.
Урысые зэнэкъокъоу «ЗисэнэхьаткIэ анахь дэгъу» зыфиIорэм ишъолъыр уцугъо мы мафэхэм Адыгэ къэралыгъэ университетым и Мыекъопэ къэралыгъо гуманитар-техническэ колледж щыкIуагъ. «ПщэрыхьакIу» зыфиIорэ лъэныкъомкIэ нэбгыритф зэнэкъокъугъ.
Зэнэкъокъур лъэпкъ проектэу «IофышIэхэр» зыфиIорэм къыдыхэлъытагъэу зэхащэ. Урысые Федерацием IофшIэнымрэ социальнэ хэхъоныгъэмрэкIэ и Министерствэ ащ икIэщакIу, цIыфхэм IофшIэн ягъэгъотыгъэнымкIэ федеральнэ къулыкъум и ГъэIорышIапIэ игъэцэкIакIу.— Гурыт сэнэхьатым имэхьанэ къэIэтыгъэныр, ар къыхэзыхырэ цIыфхэм япчъагъэ нахьыбэ шIыгъэныр ары зэнэкъокъум ипшъэрылъ шъхьаIэр. Апэрэу 2004-рэ илъэсым Адыгеир мыщ хэлэжьагъ, къоеихынымкIэ анахь IэпэIасэр агъэунэфыгъагъ, ащ федеральнэ уцугъом зэрифэшъуашэу зыкъыщигъэлъэгъуагъ. ГъэрекIо апэрэу «ПщэрыхьакIу» зыфиIорэ лъэныкъор зэхэтщагъ. Ащи текIоныгъэ къыщыдэзыхыгъэр къалэу Вологда щырагъэкIокIыгъэ аужырэ уцугъом хэлэжьагъ. Ащ ишIуагъэкIэ исэнэхьаткIэ хэхъоныгъэхэр ышIыгъэх, «шеф-повар» хъугъэ, — къыIуагъ ГъэIорышIапIэм ипащэу Галина Цыганковам.
Республикэм ит ресторан анахь дэгъухэм япщэрыхьакIохэр мы мафэм зэнэкъокъугъэх: Нина Тюляевар, Вероника Божковар, Юлия Ступницкаяр, Юлия Михайловар, Юрий Тепляковыр.— ЯIофшIэн хэшIыкI ин зэрэфыряIэр нэрылъэгъу тфэхъугъ. ПщэрыхьанымкIэ IэпэIэсэныгъэшхо ахэлъэу пстэуми зыкъагъэлъэгъуагъ, аупщэрыхьыгъэхэр IэшIух. Мы зэнэкъокъур илъэс къэс зэхэтщэн мурад тиI. Ащ хэлэжьагъэхэм пщэрыхьан закъор арэп япшъэрылъыгъэр, ар шапхъэхэм адиштэу, IэшIоу шIыгъэн фэягъ, дахэу къатыжьынэуи щытыгъ, — еIо зэнэкъокъум ишъо-лъыр экспертнэ комиссие исекретарэу, цIыфхэм IофшIэн ягъэгъотыгъэнымкIэ федеральнэ къулыкъум и ГъэIорышIапIэ иIофышIэу Борс Иринэ.Зэнэкъокъум хэлэжьагъэхэм пцэжъыем хэшIыкIыгъэ шхыныгъохэр ашIыгъэх, къупшъхьэхэр хэхыгъэу, дахэу зэгъэфагъэу ахэр къагъэхьазырыгъэх, сыхьатым къыкIоцI IофшIэныр агъэцэкIагъ. Нэужым былымылым е чэтылым гарнир голъэу агъэхьазырыгъ. КIэухым шхыныгъо IэшIу ашIыгъ. Джащ фэдэу пщэрыхьаным ылъэныкъокIэ шIэныгъэу аIэкIэлъхэр къызыщагъэлъэгъогъэ тест акIугъ, упчIэ 20-мэ яджэуап нахь тэрэзхэр къыхахыгъэх.— Шхынхэр ашIыфэ талъыплъагъ, ахэр зэрэIабэхэрэр тыуплъэкIугъэ. Пцэжъыер зэрэзэIахырэм, къупшъхьэхэр къызэрэхахырэм ыкIи нэмыкIыбэмэ тынаIэ атетыгъ, — еIо экспертхэм ахэтэу Нэгъой Фатимэ.Анахь дэгъоу зыкъэзыгъэлъэгъуагъэр ресторанэу «Мэздах» зыфиIорэм ипщэрыхьакIоу Юлия Ступницкаяр ары. Ащ шIухьафтынэу сомэ мини 100 фагъэшъошагъ. Ащ джы федеральнэ уцугъом зыкъыщигъэлъэгъощт. ЯтIонэрэ хъугъэ Вероника Божковар, ащ сомэ мин 50 ратыгъ, ящэнэрэ чIыпIэр къыдихыгъ Юлия Михайловам, ащ сомэ мин 30 фагъэшъошагъ. Зэнэкъокъум хэлэжьагъэхэм зэкIэми шIухьафтынхэр аратыгъэх.ДЕЛЭКЪО Анет.