Щэ щэрыонымкIэ Урысыем ичемпионат Республикэу Удмуртием икъэлэ шъхьаIэ щыкIуагъ.
Дэеу зэхэзыхырэ спортсменхэр ары мыщ хэлэжьагъэхэр. Къэралыгъом ишъолъыр зэфэшъхьафхэм къарыкIыгъэ лIыкIохэм ахэтыгъ олимпийскэ резервым испорт еджапIэ зыщызыгъэсэрэ Юлия Башмаковар. Адыгеир къэзыгъэлъэгъогъэ пшъашъэм гъэхъэгъэшIу ышIыгъ, хагъэунэфыкIырэ чIыпIэ къыдихыгъ. Ижевскэ щыкIогъэ зэнэкъокъум нэбгыришъэм ехъу зэрэхэлэжьагъэр къыдэплъытэмэ, тиспортсменкэ имедаль мэхьанэшхо зэриIэр къыбгурэIо. Илъэс пчъагъэ хъугъэу Юлие мы спорт лъэпкъым хэщагъ, Урысыем изаслуженнэ тренерэу Георгий Гуляйченкэм егъасэ. НэбгыритIум яIо зэхэлъэу зэрэзэдэлажьэхэрэм мы къэгъэлъэгъон дэгъур къыкIэлъыкIуагъ.Тиспортсменкэрэ ащ итренеррэ тафэгушIо, тапэкIи мыщ фэдэ гъэхъэгъэшIухэр ашIынхэу, республикэм ыцIэ дахэкIэ рарагъэIонэу афэтэIо.