Адыгэ Республикэм Iоф щызышIэрэ гъэсэныгъэ организациехэм якIэлэеджакIохэм яапэрэ Спартакиадэ икIэух гъэшIэгъон дэдэу кIуагъэ.
Мыщ текIоныгъэр къыщыдэзыхыщтыр футбол цIыкIумкIэ зэнэкъокъум къыгъэнэфэнэу щытыгъ.Спартакиадэм иаужырэ едзыгъо ехъулIэу республикэм икъэлэ шъхьаIэ, Тэхъутэмыкъое, Красногвардейскэ ыкIи Мыекъопэ районхэм якомандэхэр апэ итыгъэх, ахэр ары текIоныгъэм фэбэнагъэхэр. Спорт лъэпкъ зэфэшъхьафхэмкIэ зэнэкъокъухэм ащарагъэкъугъэ баллхэр ары мыщ дэжьым мэхьанэшхо зиIагъэр.Тэхъутэмыкъое районым пэрытныгъэр ыIыгъэу финалым къекIолIагъ, ар очкоуи 3-кIэ апэ итыгъ. Арышъ, апэрэ чIыпIэр къыдихынымкIэ амалышIу иIагъ. Мыекъуапэ икомандэ футбол цIыкIумкIэ зэнэкъокъум къекIолIагъэп, ащ фэдэ «шIухьафтыныр» тэхъутэмыкъуаехэм къызфагъэфедэн алъэкIыщтыгъ. Красногвардейскэ районым очко 15 иIагъ, Мыекъопэ районыр пэрытныгъэ зыIыгъым очкоуи 6-кIэ ыуж къинэщтыгъ.Тэхъутэмыкъое районым икомандэ футбол цIыкIумкIэ зэнэкъокъум дэеу щешIагъ. Ащ зэIукIэгъоу иIагъэхэр шIуахьыгъэх, мы турнирым яблэнэрэ чIыпIэр щиубытыгъ. Ащ къыхэкIыкIэ командэхэм язачет ящэнэрэ чIыпIэр щиубытыгъ. Красногвардейскэ районым икъуаджэу Улапэ игурыт еджапIэу N 9-м икIэлэеджакIохэм нахь дэгъоу зыкъагъэлъэгъуагъ, футбол цIыкIумкIэ зэнэкъокъум яплIэнэрэ чIыпIэр къыщахьыгъ, мы районым зэфэхьысыжь ятIонэрэ чIыпIэ фагъэшъошагъ. Мыекъопэ районым илIыкIохэм дэгъу дэдэу зыкъагъэлъэгъуагъ, ахэм футбол цIыкIумкIэ турнирым пэрытныгъэр щаубытыгъ, Спартакиадэм ичемпион хъугъэх.