ЕсынымкIэ зэнэкъокъухэр федеральнэ мэхьанэ зиIэ чIыпIэу «Сириусым» щыкIуагъэх.
Олимпийскэ резервым испорт еджапIэу В. Максимовым ыцIэ зыхьырэм зыщызыгъасэхэрэм тиреспубликэ къагъэлъэгъуагъ. Турнирым нэбгырэ 300-м ехъу хэлэжьагъ.Мыекъуапэ икомандэ хэтыгъэхэм медалиплI къахьыгъ. Анахьэу къахэбгъэщын фае Диана Натаовар. 2017-рэ илъэсым къэхъугъэхэм язэнэкъокъу ащ дышъэ медалитIу къыщихьыгъ. Софья Тришинамрэ Виктория Исаковамрэ текIоныгъэр къыдахыгъ. Джащ фэдэу Виолетта Журавлевам хагъэунэфыкIырэ чIыпIэ къыфагъэшъошагъ.Елизавета Шестаковар, Диана Михайловар, Виолетта Журавлевар ыкIи Виктория Исаковар зэгъусэхэу команднэ зэнэкъокъухэм ахэлэжьагъэх, типшъашъэхэр яплIэнэрэ хъугъэх.Сириусым щыкIогъэ зэнэкъокъум тиспортсменкэхэр фэзгъэхьазырыгъэхэр Урысыем изаслуженнэ тренерэу Нина Говорковамрэ спортымкIэ мастерэу Иван Говорковымрэ. Типшъашъэхэм ыкIи ахэм ятренерхэм ягъэхъагъэхэмкIэ тафэгушIо, текIоныгъакIэхэр къыдахынхэу афэтэIо.