Адыгабзэр фэIо-фашIэу «Яндекс Переводчик» зыфиIорэм официальнэу хагъэхьагъ.
Ащ фэгъэхьыгъэу Москва щыкIогъэ конференциеу «КъэбарлъыгъэIэс технологиехэмрэ Урысыем щыпсэурэ лъэпкъхэм абзэхэмрэ» зыфиIорэм макъэ къыщагъэIугъ.Платформэр къызфагъэфедэзэ адыгабзэкIэ тхыгъэхэр нэмыкIыбзи 100-м ехъукIэ джы зэрадзэкIынхэ алъэкIыщт. Сайтри, Переводчикым имобильнэ гуадзи ащкIэ къызфагъэфедэн алъэкIыщт.Урысые Федерацием щыпсэурэ лъэпкъхэм абзэ икъэухъумэн тегъэпсыхьэгъэ программэм къыдыхэлъытагъэу мы проектыр пхыращыгъ компаниеу Яндекс, Урысыем щыпсэурэ лъэпкъхэм я Унэ, лъэпкъ IофхэмкIэ Федеральнэ агентствэм. Переводчикым адыгабзэр щагъэфедэнымкIэ ищыкIэгъэ материалхэр зыугъоигъэр ыкIи аIэкIэзыгъэхьагъэр Адыгэ къэралыгъо университетыр ары.Текстхэр зэрадзэкIызэ, шIоигъоныгъэ зиIэ пстэуми адыгабзэр зэрагъэшIэн, титхакIохэмрэ усакIохэмрэ ныдэлъфыбзэкIэ атхыгъэхэм, адыгабзэкIэ къыхаутыгъэхэм яджэнхэ, адыгэхэм якультурэ бай зыщагъэгъозэн алъэкIыщт.— УФ-м и Президентэу Владимир Путиным 2026-рэ илъэсыр Урысыем щыпсэурэ лъэпкъхэм языкIыныгъэ и Илъэсэу зыгъэнэфагъэм тефэу платформэу «Яндекс Переводчик» зыфиIорэм адыгабзэр щызэрадзэкIы зэрэхъугъэр лъэшэу тигуап. Адыгеир, Темыр Кавказым ишъолъырхэр, адыгэхэр зышIогъэшIэгъон, тихэгъэгушхо щыпсэурэ лъэпкъхэм нахь благъэу нэIуасэ зафэзышIы зышIоигъо пстэуми ащкIэ сафэгушIо! — къыIуагъ Адыгеим и ЛIышъхьэу КъумпIыл Мурат.