МКъТУ-м ипресс-къулыкъу
НыбжьыкIэ проектхэмкIэ Урысые зэнэкъокъоу «Воплоти свою мечту» зыфиIорэм илъэныкъоу «Медиам» икIэух едзыгъо мы мафэхэм Мыекъопэ къэралыгъо технологическэ университетым щыкIуагъ.
2013-м къыщегъэжьагъэу илъэс къэс мы зэнэкъокъур апшъэрэ еджапIэм щызэхащэ, кIэлэеджакIохэм ыкIи студентхэм яшIэныгъэхэр къыщагъэлъагъох. Iофтхьабзэр зэхащэнымкIэ IэпыIэгъу къафэхъугъэх Урысые Федерацием просвещениемкIэ и Министерствэ, Адыгэ Республикэм гъэсэныгъэмрэ шIэныгъэмрэкIэ и Министерствэ ыкIи «Точка кипения» зыфиIорэм хэхьэрэ «Лъэпкъ технологическэ гухэлъхэмкIэ Платформэхэр. 2018-рэ илъэсым къыщегъэжьагъэу зэнэкъокъур Урысые Федерацием ПросвещениемкIэ Министерствэм иIофтхьабзэхэм ахагъэхьагъ.2026-рэ илъэсым ныбжьыкIэхэм лъэныкъуитфкIэ зыкъагъэлъэгъуагъ. Ахэр: «Предпринимательствэр», «ИТ ыкIи цифрэ технологиехэр», «Медиар», «Зэтегъэпсыхьаныр» ыкIи «ГуфэкIоныр».Лъэныкъоу «Медиа» зыфиIорэм иаужырэ уцугъо зэфэхьысыжьэу фэхъугъэхэм ялъытыгъэу текIоныгъэ къыдэзыхыгъэхэр къэнэфагъэх.Илъэс 14 — 18 зыныбжьхэмкIэ апэрэ чIыпIэр къыдихыгъ Женя Поповым ыцIэ зыхьырэ лицееуN 8-м къыгъэхьазырыгъэ купым. ЯтIонэрэр зэдагощыгъ къалэу Краснодар дэт гурыт еджапIэу N 11-мрэ Луганскэ Народнэ Республикэм ит Алчевскэ къэбарлъыгъэIэс-технологическэ лицеимрэ. Ящэнэрэ хъугъэх къуаджэу Нэчэрэзые дэт гурыт еджапIэу N 4-м, селоу Красногвардейскэм игурыт еджапIэу N 11-м ыкIи поселкэу Инэм дэт еджапIэу N 6-м якупхэр.Илъэс 19 — 25-рэ зыныбжьхэмкIэ анахь дэгъоу зыкъагъэлъэгъуагъ Ростов икъэралыгъо экономическэ университет истудентхэм, ащ тIэкIу ыуж къинагъэх Новотроицкэ псэолъэшI техникум истудентхэмрэ Тульскэ хэкум имедицинэ колледж иеджакIохэмрэ. Ящэнэрэ хъугъэх Адыгэ къэралы-гъо университетым и Мыекъопэ къэралыгъо гуманитар-техническэ колледж ыкIи Мыекъопэ къэралыгъо технологическэ университетым ястудентхэр.— НыбжьыкIэхэр чанэу гъэсэгъэнхэмкIэ мы зэнэкъокъум мэхьанэшхо иI. Социальнэ проектхэм ягъэпсын зэрэфэхьазырхэм имызакъоу, ахэр щыIэныгъэм щыпхыращышъунхэм фагъасэх. НыбжьыкIэхэм проект гъэшIэгъонхэр къагъэхьазырых, яшIэныгъэхэр къагъэлъагъо. Мыщ фэдэ зэнэкъокъухэм ныбжьыкIэхэр зэрахэлажьэхэрэм шIогъэшхо къеты, — къыIуагъ социальнэ проектхэм я Гупчэу «Медиарост» зыфиIорэм ипащэу, зэнэкъокъум иэкспертэу Анастасия Хажгериевам.Шъугу къэдгъэкIыжьын, текIоныгъэ къыдэзыхыгъэхэр Мыекъопэ къэралыгъо технологическэ университетым чIахьэхэ хъумэ балл тедзэхэр афыхалъытэщтых, джащ фэдэу ахэм ацIэ-алъэкъуацIэхэр Урысые Федерацием и Президент ифондэу «Сэнаущыгъэр ыкIи гъэхъагъэхэр» зыфиIорэм рагъэхьащтых.Зэнэкъокъур зызэхащагъэм къыщегъэжьагъэу студент, кIэлэеджэкIо ыкIи гъэсэкIо 5000 фэдизмэащ зыщаушэтыгъ. Проект 2000 агъэхьазырыгъ. Мы илъэсым Урысые Федерацием ишъолъыр 28-рэ хэлэжьагъ.Джащ фэдэу жъоныгъуакIэм и 19-м «Зэтегъэпсыхьаныр» зыфиIорэ лъэныкъом ипроектхэр къагъэлъэгъуагъэх, и 21-м «ГуфэкIоным» епхыгъэу ныбжьыкIэхэм яшIэныгъэхэр къагъэлъэгъуагъ.Мыекъопэ къэралыгъо технологическэ университетым ипресс-къулыкъу.