Шэуджэн И.
Белгород хэкум ит поселкэу Прохоровкэ дэт зыфэдэ щымыIэ дзэ-тарихъ музей-заповедникэу «Прохоровское поле» зыфиIорэм гала-концерт щыкIуагъ.
Фронтым фэгъэхьыгъэ усэхэу «Рубежи и строки» зыфиIорэм и Урысые фестиваль текIоныгъэ къыщыдэзыхыгъэхэу, тикъэралыгъо иусэкIо анахь дэгъухэр ащ хэлэжьагъэх. Зэнэкъокъур Урысыем щыпсэурэ лъэпкъэхэм языкIыныгъэ и Илъэс ыкIи Хэгъэгу зэошхом ТекIоныгъэ къызщыдахыгъэр илъэс 81-рэ зэрэхъугъэм афагъэхьыгъагъ.Лъэныкъоу «Авторы произведений фронтовой тематики» зыфиIорэм ылъэныкъокIэ фестивалым текIоныгъэ къыщыдихыгъ Краснодар щыщ адыгэ усакIоу, дунэе зэнэкъокъухэм ялауреатэу Шэуджэн Инвер. Ащ иусэу «Ты слышишь ли меня, солдат…» зыфиIорэр гала-концертым къыщигъэлъэгъуагъ.Авторым иусэ дзэ-патриотическэ мэхьанэшхо зэриIэр ыкIи джырэ урыс культурэм ихэхъоныгъэ ащ иIахьышIу зэрэхишIыхьэрэр осэшIхэм къыхагъэщыгъ.Нэужым зэхэщакIохэм рагъэблагъи, Шэуджэн Инвер тарихъ форумэу «Вера. Память. Молодость» зыфиIоу Н. И. Рыжковым ыцIэ зыхьырэ Гупчэ тхылъеджапIэм щыкIуагъэм дзэ-патриотическэ иусэ анахь дэгъухэр къыщигъэлъэгъуагъэх. Iофтхьабзэм хэлэжьагъэх общественнэ ыкIи дин организациехэм ялIыкIохэр, хэушъхьафыкIыгъэ дзэ операцием хэлажьэхэрэр, Белгород къэралыгъо университетым истудентхэр, юнармием хэтхэр.Форумым икIэухым хэгъэгу зэошхом илъэхъан Прохоровскэ шъофым щыхэкIодэгъэ советскэ дзэкIолIхэм ясаугъэт къэгъагъэхэр кIэралъхьагъэх.ШъушIэным пае: усакIоу Шэуджэн Инвер итворчествэ мы аужырэ илъэсхэм бэмэ зэлъашIагъ, тиреспубликэ имызакъоу, нэмыкI шъолъырхэми ыцIэ щаригъэIуагъ. Инвер зэнэкъокъухэм, дунэе мэхьанэ зиIэ Iофтхьабзэхэм чанэу ахэлажьэ ыкIи иусэхэр къащыхагъэщых.— УсакIо пэпчъ мыщ фэдэ зэнэкъокъухэм ахэлэжьэным мэхьанэшхо иI ыкIи лъытэныгъэшхоу щыт. ТхэкIо анахь дэгъухэм зябгъапшэзэ, уитворчествэ уасэ къыфашIыныр насыпыгъэу сэлъытэ, — еIо Инвер.Джащ фэдэу усакIор социальнэ проектхэм кIэщакIо афэхъугъэу творческэ зэхахьэхэр зэхещэх. АщкIэ мурадэу иIэр къыткIэхъухьэрэ лIэужхэм тхылъым уасэ фашIэу, ашIогъэшIэгъонэу, яхэгъэгу шIу алъэгъоу пIугъэнхэр ары.Иусэхэм щыIэныгъэм илъэныкъо зэфэшъхьафхэр къызэлъаубыты, Адыгеим, шIулъэгъум афэгъэхьыгъэх, философие гупшысэ зыхэлъ усэхэри мымакIэу иIэх.Инвер игъэхъагъэхэм тапэкIи ахигъэхъонэу, Адыгеим ыцIэ дахэкIэ раригъэIонэу тыфэлъаIо.КIАРЭ Фатим.