Диныр зылэжьыхэрэм ыкIи ащ епхыгъэ къулыкъухэм апае «НыбжьыкIэхэр террористическэ организациехэм зэрахащэхэрэ шIыкIэхэр» зыфиIорэ зэхэсыгъо бэмышIэу АР-м и Лъэпкъ музей щыкIуагъ.
АР-м лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитетрэ лъэпкъ ыкIи дин зэмызэгъыныгъэхэр къэмыгъэхъугъэнымкIэ, терроризмэм ыкIи экстремизмэм ныбжьыкIэхэр ащыухъумэгъэнхэмкIэ Адыгэ къэралыгъо университетым и Координационнэ гупчэрэ Iофтхьабзэм кIэщакIо фэхъугъэх.Зэхэсыгъом хэлэжьагъэх Мыекъуапэ ыкIи Адыгэ епархием, АР-м ыкIи Пшызэ шъолъыр ащыпсэурэ быслъымэнхэм ядинлэжьхэр.Iофтхьабзэм къекIолIагъэхэм шIуфэс гущыIэкIэ закъыфигъэзагъ Комитетым итхьаматэ игуадзэу Константин Щербаковым.Гъэсэныгъэм ылъэныкъокIэ ыкIи ныбжьыкIэхэм азыфагу терроризмэм пэшIуекIорэ Iофтхьабзэу ащызэрахьэхэрэм шIуагъэу къатырэм зыкъегъэIэтыгъэныр ыкIи къэбарлъыгъэIэс амалхэмкIэ а IофшIэныр нахь гъэлъэшыгъэныр япшъэрылъ шъхьаIэу ащ къыIуагъ.— Адыгеир цIыф лъэпкъыбэ зыщыпсэурэ шъолъыр, ижъыкIэ къыщегъэжьагъэу мамырныгъэрэ зэгурыIоныгъэрэ азыфагу илъэу лъэпкъ зэфэшъхьафхэм къахэкIыгъэхэр ыкIи дин зэмылIэужыгъохэр зылэжьыхэрэр ащ щэпсэух. Арышъ, лъэпкъ зэгурыIоныгъэм, мамырныгъэм тэркIэ мэхьанэшхо яI. Пыим гухэлъ шъхьаIэу къыздырихьакIырэр ащ фэдэ зыкIыныгъэр ыкIоцIыкIэ зэщигъэкъоныр ары. АщкIэ къэбарлъыгъэIэс амал зэфэшъхьафхэр егъэфедэх, а лъэныкъомкIэ ныбжьыкIэхэр ары анахьэу ынаIэ зытыридзэрэр. Ащ пае тэркIэ ныбжьыкIэхэм якъэухъумэнрэ тэрэзэу ахэр гъэгъозэгъэнхэмрэ пшъэрылъ шъхьаIэх, — къыIуагъ К. Щербаковым.НыбжьыкIэхэр террористическэ организациехэм зэрахащэрэ шIыкIэхэм афэгъэхьыгъэу зэхэсыгъом доклад къыщишIыгъ Координационнэ гупчэм ипащэу Оксана Малхожевам. Интернетыр къызфагъэфедэзэ гъэпцIагъэ зыхэлъ бзэджэшIагъэу зэрахьэхэрэм ягугъу къышIыгъ. Ахъщэ псынкIэ къагъэхъэнэу ныбжьыкIэхэм ашIошъ агъэхъузэ зэрагъэделэхэрэр, джащ фэдэу дин нэпцIыр алэжьынэу зэрэхащэхэрэр ащ къыIуагъ.НыбжьыкIэхэр мыщ фэдэхэм ащыухъумэгъэнхэм фэшI зэдэгущыIэгъу зэрадэпшIын, ащкIэ унаIэ зытебгъэтын фаехэм, зыгорэкIэ Iэтахъохэр террористическэ организациехэм ахэщагъэхэу егуцафэхэмэ, психологыр ыкIи хэбзэухъумэкIо къулыкъухэм яIофышIэхэр адагъэгущыIэнхэ зэрэфаем ягугъу къышIыгъ.«УФ-м терроризмэм иидеологие щыпэуцужьыгъэнымкIэ зэхэубытэгъэ планэу 2024 – 2028-рэ илъэсхэм ателъытагъэр» зыфиIорэм хахьэу мыщ фэдэ Iофтхьабзэхэр тапэкIи лъагъэкIотэщтых.КIАРЭ Фатим.