Обществэу «ШIэныгъ»
Урысые обществэу «ШIэныгъэм» проектэу «ШIэныгъ. Щынэгъончъагъ» зыфиIорэр ытIупщыгъ.
Узыгъэгъозэрэ программакIэр кIэлэеджакIохэм къащегъэжьагъэу ныбжь зиIэхэм анэс атегъэпсыхьагъ. Проектым игъэхьазырын къытегущыIагъ УФ-м и Президент и Администрацие итхьаматэ иапэрэ гуадзэу Сергей Кириенкэр.Проектэу «ШIэныгъ. Щынэгъончъагъ» зыфиIорэр терроризмэм ыкIи экстремизмэм апэуцужьыгъэным, хэбзэукъоныгъэхэр ыкIи гъэпцIагъэхэр зэрамыхьанхэм, джащ фэдэу щынэгъончъэ зекIуакIэхэм афытегъэпсыхьэгъэ Iофтхьабзэхэр зэхэщэгъэнхэм фэгъэхьыгъ. Сергей Кириенкэм къызэриIуагъэмкIэ, непэрэ щыIэкIакIэу тызыхэтым иамалхэм ыкIи гъэпцIакIохэм шIыкIакIэу агъэфедэхэрэм яIофыгъохэр къызыдэплъытэкIэ, лъэпкъ щынэгъончъэным имэхьанэ зыкъеIэты.— Гукъау нахь мышIэми, Урысыем ипыйхэм непэ мурадэу яIэр тикIэлэцIыкIухэр ары. ЗэкIэми тэлъэгъу ахэм къызэрябэныхэрэр, бзэджэшIагъэхэм зэрахащэхэрэр, — къыIуагъ С. Кириенкэм.Апэрэ мафэм проектым шъолъыр 28-рэ къыхэхьагъ. КIэлэеджэкIо ыкIи студент нэбгырэ мини 8-м ехъумэ зэIукIэгъуи 100 фэдиз афызэхащагъ.Проектэу «ШIэныгъ. Щынэгъончъагъ» зыфиIорэм лъэныкъуитIукIэ Iоф ышIэщт. Апэрэм хахьэ техническэ ухъумэгъэныр: хэбзэнчъэу Iоф зышIэрэ кол-гупчэхэр къыхэгъэщыгъэнхэр, гъэпцIакIохэм зэрахьэрэ бзэджашIэхэм ягъогу пыбзыкIыгъэныр. Ащ пае хэбзэухъумэкIо къулыкъухэр, зэпхыныгъэм ыкIи цифрэ платформэм яоператорхэр зэгъусэхэу Iоф зэдашIэщт. Узыгъэгъозэрэ программэм къыдыхэлъытагъэу лекциехэр, мастер-классхэр зэхащэщтых, пцIыр къызэрэчIэбгъэщыщтым, гъэпцIакIохэм узэрапэшIуекIощтым афэгъэхьыгъэ егъэджэнхэр рагъэкIокIыщтых.ЗэрагъэнафэрэмкIэ, илъэсым ыкIэм нэс проектым кIэлэеджэкIо ыкIи студент миллионым нэс къыхагъэлэжьэщт. Ащ хахьэу мы системэм икъулыкъушIэхэм яегъэджэн лъэшэу анаIэ тырагъэтыщт. Ахэм апае тикъэралыгъо ишъолъыр зэфэшъхьафхэм семинархэр афызэхащэщтых. 2026-рэ илъэсым бэдзэогъум мыщ фэдэ форумхэм яIофшIэн рагъэжьэщт. Ахэм шъолъыр организациехэм якъулыкъушIэ мин 13-м ехъу ахэлэжьэщт.Ащ нэмыкIэу Обществэу «ШIэныгъэм» пэшIорыгъэшъ Iофтхьабзэхэм язэхэщэн пае методическэ материалхэр къыдигъэкIыщтых, ахэр яIэубытыпIэу егъэджэнхэр зэхащэщтых. Урысые обществэу «ШIэныгъэм» исайт мы мэфэ благъэхэм ахэр къарыхьащт. Джащ фэдэу щынэгъончъэным фэгъэхьыгъэ фильмхэр тырахых.