Урысые зекIо слетэу «Маевка» зыцIэм проектэу «Апэрэхэм язекIо — зекIо гъогум нахьыб» зыфиIорэм къадыхэлъытэгъэ Iофтхьабзэ Адыгэ Республикэм щызэхащэгъагъ, ащ нэбгырэ 70-рэ хэлэжьагъ. Лъыхъон-къэгъэнэжьын амалхэр зэрагъэгъотынхэр, ошIэ-дэмышIэ къэхъумэ зэрэзекIощтхэр зэрагъэшIэныр ары ащ пшъэрылъ шъхьаIэу иIагъэр.
Росмолодежым ипащэ игуадзэу Юрий Лескиныр, Апэрэхэм я Движение игъэIорышIэкIо тхьаматэ игуадзэу Ксения Яновар, «Апэрэхэм язекIо — зекIо гъогум нахьыб» зыфиIорэ организацием игенеральнэ пащэу Олеся Тетеринар, ащ игуадзэхэу Станислав Киреевымрэ Юлия Величкэрэ зекIо Iофтхьабзэм хэлэжьагъэх.«ЗекIо укIоныр, уиунагъо, уиныбджэгъумэ, уиIофшIэгъумэ задэбгъэпсэфыныр шIуагъэ къэзытырэ IофыгъошIу. Ащ гур къеIэты, пэрыохъухэм уапэшIуекIоным уфегъасэ, дунаим идэхагъэ зэхыуегъашIэ. Урысыем ишъолъырхэм зекIоным зыщаушъомбгъунымкIэ мыщ фэдэ Iофтхьабзэхэм язэхэщэн мэхьанэшхо иI», — къыIуагъ Юрий Лескиным.«Непэ гъогу шIагъо къэткIугъ. Шъофым тызэритэу къушъхьэу Лъэгъо-Накъэ тинэплъэгъугъ, станицэу Дахъо тачIэгъ алрэгъоу теубгъогъагъ, чIыопсым идэхагъэ нэр пIэпихыщтыгъ, гушхуагъэ къытхилъхьэщтыгъ. Купым хэтхэр ныбджэгъу зэфэхъугъэх. Сэ зекIоным ыкIи альпинизмэм сапылъыгъэти, джыри зэ гукъэкIыжьмэ сахилъэсагъ, зекIоным нахь тхъагъо зэрэщымыIэр джыри зэ зэхэсшIагъ», — игупшысэхэмкIэ къыддэгощагъ Ксения Яновар.Къушъхьэм къызехыжьхэм ыуж лъыхъон-къэгъэнэжьын IофшIэныр рагъэжьагъ, зекIохэр зыдэхъугъэхэр амышIэу ошIэ-дэмышIэ IофхэмкIэ Министерствэм макъэ къаригъэIугъ, ахэр зыдэщыIэн ылъэкIыщт чIыпIэхэм ягъэунэфын фежьагъэх. Къиныгъуи, пэрыохъуи къызэранэкIи, Iофтхьабзэм хэлажьэхэрэм цIыфхэр къагъотыжьыгъэх, ящыкIэгъэ апэрэ IэпыIэгъур арагъэгъотыгъ.«Непэрэ зекIоным ипшъэрылъыр ар зыфэдэ хъун ылъэкIыщтыр къыхэгъэщыгъэныр ары. Зы чIыпIэхэм ащыхьылъэщт, нэмыкIхэм ащыпсынкIэщт, ау сыдигъокIи командэу ущытын ыкIи узэкъотын фае, джащыгъум сыд фэдэрэ пэрыохъуи упэшIуекIошъущт. Адыгеим ичIыопс ибайныгъэ, икъушъхьэмэ ядэхагъэ гур аумэхъы», — къыхигъэщыгъ Олеся Тетеринам.ЗекIоным ыуж Юрий Лескиным, Ксения Яновам ыкIи Олеся Тетеринам «Маевкэм» иплощадкэ зэрагъэлъэгъугъ, Адыгэ Республикэм икультурэ фэгъэхьыгъэ пчыхьэзэхахьэу зэхащагъэм къыщыгущыIагъэх, чIыпIэ шхыныгъохэм ахэIагъэх, зекIо Iофтхьабзэм хэлэжьагъэхэм зэдэгущыIэгъухэр адашIыгъэх.